Maika 1:1-16
1 Ota ri Jihova ro bru Maika* ri Morẹshẹt rhe, rọ mrẹre vwẹ emramrẹ vwọ kpahen Sameria kugbe Jerusalẹm vwẹ ọke ri Jotam, Ehaz, kugbe Hẹzikaya, ivie ri Juda:
2 “Ovwan nyo, ovwan ihwo ejobi!
Kerhọ, E otọrakpọ na kugbe obo rehẹ evun rọyen,Jihova hẹ uwevwin rẹ ẹga ọfuanfon rọyenE jẹ Ọrovwori ro Me Kpenu Jihova soseri hwe ovwan.
3 Kidie nighere! Jihova ro otafe nẹ asan rọyen;O che wontọ rhe rhi chiyin asan sansan ri kpenu vwẹ otọrakpọ na.
4 Igbenu na cha wran vwẹ obotọ rọyen,Kerẹ ivwri re mu kẹrẹ erhanre,Iyara* na cha ghareKerẹ ame re ku phiyọ ọghwrọrọ.
5 Enana eje phiare fikirẹ egbe vwọsua ri Jekọp,Fikirẹ imwemwu rẹ uwevwin rẹ Izrẹl.
Die yen egbe vwọsua ri Jekọp?
Ọ dia Sameria?
Die yen asan ri kpenu ri Juda?
Ọ dia Jerusalẹm?
6 Me cha nẹrhẹ Sameria hirhephiyọ asan ra ghwọrọre vwevunrẹ aghwa,Asan ra kọn ogba rẹ ivaini phiyọ;Mi che do* ikuta rọyen phiyọ evunrẹ iyara,Je ghwọrọ totọ karekare.
7 A cha guọghọ ema rọyen eje ra kare chẹghẹchẹghẹ,A cha vwẹ erhanre vwọ torhẹ okẹ* eje rọ mrẹre vwo nẹ iruo rẹ igberadja egbe rọyen rhe.
Me cha ghwọrọ edjọ rọyen eje.
Kidie osa rẹ igberadja egbe rọyen yen o vwo vwo ayen,Kẹ ayen cha rhoma hirhephiyọ osa ra hwa kẹ igberadja.”
8 Fikirẹ ọnana mi che vwerhe oma ji kperi;Me cha vwẹ awọ fefe vẹ ẹbẹban vwọ yan.
Ekperẹ mẹ cha dia kerẹ ọ rẹ eranko rẹ aghwa,Uvweri mẹ kerẹ ọ rẹ igomugoro.
9 Kidie e che se sivwin omaẹwan rọyen kpoo;O te Juda re.
Ọtiekọ na hrabọ te anurhoro ri Jerusalẹm rọ dia asan rẹ ihwo mẹ dia re.
10 “Ovwan ghwoghwo vwẹ Gatii;Ovwan viẹ kakakaa.
Ovwan gbune vwẹ ekpẹn vwẹ Bẹt-Afra.*
11 Ovwan shariẹ vrẹ ẹbẹban vẹ omavovwẹ, E ihwo re dia* Shefiẹ.
Ihwo re dia* Zeanan je rhe ro otafee.
Omaevwerhe cha dia vwẹ Bẹt-izẹl, o rhe che bicha wẹ ọfaa.
12 Kidie ihwo re dia* Merọt hẹrhẹ obo ri yoma,Ẹkẹvuọvo obo re brare nẹ obọ ri Jihova rhe anurhoro ri Jerusalẹm re.
13 Ovwan gba akpẹrẹ na si iyesi ivẹ, E ihwo re dia* Lekish.
Ovwan yen ọtonphiyọ rẹ umwemwu vwọ kẹ ọmọtẹ ri Zayọn,Kidie a mrẹ egbe vwọsua rẹ Izrẹl vwevunrẹ ovwan.
14 Ọtiọyena wọ cha vwẹ okẹ vwọ kẹ Morẹshẹt-gat vwọ hẹriẹ ekpuyovwin rọyen uwevwin.*
Iwevwin rẹ Akzib eyen emu rẹ ophiẹnvwe vwọ kẹ ivie rẹ Izrẹl.
15 Me je cha reyọ ọ ro phikparobọ na bru ovwan rhe, E ihwo re dia* Marishah.
Urinrin rẹ Izrẹl cha yanran rhirin re te Adọlam.
16 Ovwan wanre uyovwin rẹ ovwan ji bru ẹton rẹ ovwan muotọ fikirẹ emọ rẹ ovwan re pha ghanghanre na.
Ovwan wanre uyovwin rẹ ovwan muotọ kerẹ ọphran re se ọphrorivwin,*Kidie e mu ayen mie ovwan kpo ighuvwu.”
Eta rehẹ obotọ na
^ Obrukrẹ rẹ odẹ na Maikẹl (o mudiaphiyọ “Ono Yen Họhọ Ọghẹnẹ?”) yẹrẹ Mikaya (o mudiaphiyọ “Ono Yen Họhọ Jihova”).
^ Yẹrẹ “Ushekpotọ.”
^ Yẹrẹ “ku.”
^ Yẹrẹ “osa.”
^ Yẹrẹ “vwẹ uwevwin rẹ Afa.”
^ Vwẹ Hibru, “E aye rọ dia.”
^ Vwẹ Aramaik, “Aye rọ dia.”
^ Vwẹ Hibru, “Kidie aye rọ dia.”
^ Vwẹ Hibru, “E aye rọ dia.”
^ Yẹrẹ “vwọ vuẹ nẹ ọ yan eghwerẹ.”
^ Vwẹ Hibru, “E aye rọ dia.”
^ Yẹrẹ “ivọshọ.” Ota ri Hibru na ji se mudiaphiyọ ugo.
