Maika 5:1-15
5 “Asaọkiephana ovwan brẹ era phiyọ oma rẹ ovwan,E ihwo re dia orere ra gbogba riariẹ;A gbogba riariẹ avwanre phiyọ.
Ayen vwẹ ọkpọ vwọ fa ọhwa rẹ oguẹdjọ rẹ Izrẹl.
2 Wẹwẹ, E Bẹtlẹhẹm Ẹfrata,Ọ rọ hanvwe nọ rọ vwọ dia ohri rẹ erua* ri Juda,Ohwo ọvo rọ cha dia osun vwẹ Izrẹl che nẹ evun wẹn rhe vwọ kẹ vwẹ,Ohwo rọ herọ nẹ awanre rhe, vwo nẹ ọke grongron rhire.
3 Ọtiọyena ọ cha kpairoro vrẹ ayenRhirin re te ọke rẹ aye ro che vwiẹ na vwo vwiẹ nu.
Iniọvo rọyen ri chekọ che rhivwin bru ihwo rẹ Izrẹl.
4 O che vrẹn mudia je vwẹrote ihwo rọyen vwẹ ogangan ri Jihova,Vwẹ ọrho rẹ odẹ ri Jihova Ọghẹnẹ rọyen.
Kẹ ayen cha dia vwẹ ofuvwegbe,Kidie asaọkiephana ọrho rọyen che te oba rẹ akpọ na.
5 Ọ cha ghwa ufuoma rhe.
Ihwo rẹ Asiria da kpare ofovwin rhe otọ rẹ avwanre ji chiyin iwevwin avwanre ri kpenu ra gbogba riariẹ muotọ,Avwanre cha vwẹ isuigodẹ ighwrẹn, e, isun ẹrenren vwo mu vwẹ ohri rẹ ihworakpọ ri che nene ayen họnre.
6 Ayen cha vwẹ ọlọkọ vwo sun otọ rẹ Asiria,Kugbe otọ ri Nimrọd vwẹ asan sansan ra wan ruọ.
O che sivwin avwanre vwo nẹ obọ rẹ ihwo rẹ Asiria,Vwẹ ọke rọ da kpare ofovwin rhe otọ rẹ avwanre ji chiyin ekogho rẹ avwanre.
7 Ihwo ri Jekọp ri chekọ cha dia ohri rẹ ihwo buebunKerẹ irho ro nẹ obọ ri Jihova rhe,Kerẹ eghwẹghwẹ rẹ osio vwẹ enu rẹ ekankọnRo phiẹrophiyọ ohworakpọọYẹrẹ hẹrhẹ emọ rẹ ihworakpọọ.
8 Ihwo ri Jekọp ri chekọ cha dia ohri rẹ ẹgborho na,Vwẹ ohri rẹ ihwo buebun,Kerẹ okpohrokpo vwẹ ohri rẹ eranvwe rẹ egbo na,Kerẹ ọmọ rẹ okpohrokpo* vwẹ ohri rẹ igodẹ,Rọ wanvrẹ ro de shabọ phiyọ ayen je bẹrẹ ayen chẹghẹchẹghẹ;O vwo ohwo vuọvo ro che sivwin ayeen.
9 Wo che phi ivwighrẹn wẹn kparobọ,A cha ghwọrọ ivwighrẹn wẹn eje.”
10 “Vwẹ ẹdẹ yena,” ọtiọyen Jihova tare,“Me cha teyen iyesi rehẹ ohri wẹn na hwe je guọghọ ekpẹrẹ wẹn.
11 Me cha ghwọrọ irere rẹ otọ wẹnJi kporon asan sansan wẹn eje ra gbogba riariẹ totọ.
12 Mi che phioba phiyọ imajiki ru wo ruẹ na,Ohwo ro ruẹ imajiki vuọvo rha cha dia ohri wẹẹn.
13 Me cha guọghọ ema wẹn ra kare kugbe ichivwo wẹn vwo nẹ ohri wẹn,Wọ rha cha vwẹ uyovwin kpotọ vwọ kẹ iruo rẹ abọ wẹn ọfaa.
14 Mi che ghwie ekpọ rẹ ẹga* wẹn vwo nẹ ohri wẹnJe ghwọrọ irere wẹn karekare.
15 Ivuemiovwo vẹ ophu ọgangan yen me cha vwọ reihriVwẹ enu rẹ ẹgborho ri nyẹmee na.”
Eta rehẹ obotọ na
^ Vwẹ Hibru, “rẹ uriorin buebun.”
^ Yẹrẹ “ọmọ rẹ okpohrokpo ro vwo ẹton ohọre.”
^ Ni Eta re Vwomaphia.
