Ame nda kulila konepa yimue yofeka yo Austrália. Olonjali viange kuenda vakukululu yange va lilongisa ocili kunyamo wo 1950. Nda fetika oku kunda eci nda kuata 6 kanyamo kuenda nda papatisiwa eci nda kuata 13 kanyamo. Kotembo yepuyuko kosikola, nda enda oku talavaya kupange wakundi vasokamo. Ame nda solele calua Yehova kuenda nda nõlapo oku u vumba otembo yosi.

 Eci nda kuata 15 kanyamo, alongisi vange kosikola va limbuka okuti nda loñolohele calua koku imba ombunje. Omo liesunga liaco, olonumiwa viocimunga cimue ci tukuiwa Rúgbi via nyĩha onima yimue yoku lilongisa okuti si feti. Ame nda sola calua esapulo liokuti ndi ka tasuila ombunje vocimunga caco. Pole, nda tumbikile ale omuenyo wange ku Yehova. Isiange wa ndi vetiya oku sokolola kohuminyo nda lingile osimbu sia fetikile oku tasula ombunje. Nda tava kelungulo liaye kuenda nda limbuka okuti upange waco nda wa ndi tateka oku linga eci ca velapo kupange wa Yehova. Omo liaco, nda likala ombanjaile yaco. Noke liolosãi vimue, Ocisoko co ko Austrália Coku Tasula Ombunje, ca nyĩha ombanjaile yimue, konjanja eyi coku pindisiwa oco ndi kaile ukuakulupuka loku kala onumiwa yo Austrália ko Commonwealth ale Kalupesi a Lingiwa Kolofeka Vikuavo. Pole, nda yonguile calua oku tẽlisa ohuminyo yelitumbiko liange nda lingile ku Suku una ndi sole. Omo liaco, nda likaila ombanjaile yaco.

 Eci nda mala oku lilongisa kosikola nda linga ukundi wotembo yosi, okuti oco ocimãho nda kuata vokuenda kuotembo yalua. Pole, epata liange lia kuata ocitangi cekambo liolombongo kuenje nda siapo upange wakundi votembo yosi kuenda nda sanga upange umue woku talavaya olowola vialua okuti, woku endisa olomakina vioku lima. Nda tunda konjo eci nda kala handi umalẽhe calua. Sia pitisile vali kovaso efendelo liange ku Yehova. Nda sumuile kuenda nda honguele konepa yespiritu. Nda nõlele olonjila vĩvi, nda linga ukamba lomanu oloholua haivo va ligaile ovina vĩvi kuenda nda enda oku seteka oku linga eci va lingailevo. Nda velisilepo calua ayele okuti ukamba wange la Yehova ci sule.

 Nda sukilile oku kũlĩha eci ca velelepo komuenyo wange. Kuenje nda ilukila kolupale lukuavo, kuna nda kala ocipãla lakamba vaco vãvi. Nda pamisa vali ukamba wange la Yehova loku linga esokiyo lioku kala vali ukundi wotembo yosi. Noke, nda kũlĩha Leann McSharry ufeko umue wa kala ukuasõi haiye wa kala ukundi wotembo yosi. Tua linga ukamba kuenda tua enda oku lianja poku sapela catiamẽla kovimãho vietu muna mua kongelele oku talavaya kupange wolomisionaliu. Kunyamo wo 1993, tua kuela. Tua yonguile okuti Yehova o songuila omuenyo wetu.

Oku Telĩsa Ovimãho Vietu

 Vunyamo waco ame la Leann tua linga akundi votembo yosi. Omo okuti tua nõlelepo oku leluisa omuenyo wetu kuenda oku yuvula olofuka, tua landa onjo yimue yosimbu oco tu kalemo. Vokuenda kuanyamo epandu, tua enda oku ilukila kuosi ocisoko ca enda oku tu tuma okuti kua kala esukila kuenda tua lingaile ovopange a litepa oco tu litekule. Tua enda oku kunda lakongelo a tito kovikanjo vinene, vina via kukuta havio vi kasi ocipãla lolupale luo Queensland. Olonjanja vialua tua enda oku kala kovitumãlo ka kuli omanu kuenda tua enda oku lingila olohongele voluayela ale kovitumãlo kua enda oku liongoluila omanu. Tua sanjuke, pole, tua enda oku sokolola nda tua ponduile oku lingila vali calua Yehova. Noke tua kuata etambululo.

 Tua tambula elaleko lioku talavaya kupange wumisionaliu kofeka yikuavo! Pole, tua yeva esakalalo kuenda tua liyeva okuti ka tua loñolohele oco tu kaile olomisionaliu osimbu ka tua pindisiwile Kosikola yo Gileada. Tua solaile calua upange woku kunda, pole, omo okuti ka tua kuatele olondonge vialua kovitumãlo vi kasi ocipãla tua enda oku kundila, tua li tendaile okuti ka tua kaile alongisi vawa.

 Tua lomboluila esakalalo lietu kumanji Max Lloyd o panga Onepa Kocimunga Cakulu vo Betele. a Eye wa tu sapuila okuti, nda tua lieca olomue ndaño ka tua loñolohele, Yehova wa ponduile oku tu kuatisa kocikele cosi a ponduile oku tu ĩha. Lepamiso liaco liocisola, tua tava ocikele coku ka tavaya ko Sri Lanka.

Ocikele Cimue ca Tĩla

 Kunyamo wo 1999, oco tua pitĩla ko Colombo ombala yo Sri Lanka. Omuenyo wetu wa litepele calua lomuenyo uwa tua kuata eci tua kala ko Austrália! Tua sanga uyaki, uhukũi, omanu va liongolola, vana ka va kuete olonjo kuenda alimi a litepa. Pole, ko Sri Lanka kua kala ovina vi kuete esilivilo ndeci: Vamanjetu va soliwe alume lakãi kuenda olohuluwa viomanu ambombe ka va kũlĩhĩle handi Yehova.

 Tua tumiwile ko Kandy, okuti olupale lumue lua posoka lua ñualiwa lovikũla kuenda ovisenge. Olupale luaco lua kũlĩhĩwa calua omo liolonembele vialua via va Budista. Pokati komanu vaco vatito va kũlĩhĩle ovina vimue viatiamẽla Kululiki wetu ukuacisola. Vekongelo lietu mua kongelele omanu va vangula elimi lio Cingalês leli lio Tâmil kuenda olohongele via enda oku lingiwa kalimi aco avali. Oku lilongisa o Cingalês ca tĩlile, pole, vamanji kumue lolondonge Viembimbiliya va solaile a likolisilo tua lingaile ndaño ceci tua enda oku lueya olondaka vimue!

 Pole, elimi halioko lia kala ocitangi ca velapo. Onjanja yatete komuenyo wetu, tua liyaka locitangi coku lambalaliwa lungangala omo liupange wetu. Vepuluvi limue, tua ñualiwile lowiñi walua wa tu suvukile. Vamue va timĩha alivulu etu, osimbu vakuavo va kala oku ndi veta kuenda oku vetavo manji ukuavo. Vokuenda kuotembo yaco ya tĩla, tua likutilila ku Yehova oku pinga kokuaye oco a tu kuatise oku tulumuha kuenda oku tu ivaluka nda tua fa. Ci sanjuisa ceci okuti noke owiñi waco wa li sandula. Tua tundako okuti tua lemehiwa, pole, tua eca olopandu ku Yehova omo a tu teyuila.

 Vokuenda kuotembo tua fetika oku lianja kofeka yo Sri Lanka. Ndaño luyaki wa tepa ofeka, tua sola calua ndomo Yehova a vetiya omanu va kuete enyona liocili oku iya vocisoko caye. Tu kuete olonjivaluiso viwa viotembo tua kala vocifuka caco ca posoka. Pole, noke lioku kalako lika anyamo avali, omo liombiali oku vetiyiwa lasongui vatavo, olomisionaliu vialua via sukilile oku tunda vofeka.

 Olosemana via kuamamo via kala viesakalalo lialua. Tua sokolola oku tua ponduile oku kala. Noke, Osungu Yolombangi Via Yehova ya tu tuma ko Papua-Nova Guiné. Kosãi Yenyenye linene yunyamo wo 2001 oco tua pitĩla vombala okuti o Port Moresby.

O Papua-Nova Guiné—Ofeka yimue ya Sumũlũho

 Ndaño okuti o Papua-Nova Guiné yi kasi ocipepi lo Austrália, omuenyo kuenda ovituwa via litepele. Omo liaco, yimue vali onjanja, tua sukilile oku hikisa ekalo liaco. Ofeka yi kuete eci ci soka 800 kalimi. Tua lilongisa o Tok Pisin, okuti olio elimi li vanguiwa vali!

 Noke lioku pita anyamo atatu volupale luo Popondetta, tua tambula ocikele coku nyula akongelo. Lalimue eteke tua sokoluile oku vumba Yehova lonjila eyi! Olonjanja viosi nda enda oku komõha olonumbi, oku pama kespiritu kuenda uloño woku longisa wa vamanji va kuakunyula akongelo. Nda liyeva okuti sia loñolohele oco ndi tẽlise ocikele caco. Olonjanja viosi ocimãho cange coku kala omisionaliu. Lalimue eteke nda simile oku kala ukuakunyula akongelo! Toke cilo, si tava okuti Yehova wa nyĩha ocikele eci ci likasi.

 Eci tua enda oku nyula valupale, tua kuataile ocinyi lovava kuenda ohondo lula umue. Pole, kakongelo a kasi kovaimbo, olonjanja vialua ka tua kuataile ovina viaco. Tua enda oku pekela volombalaka, oku telekela kosamua kuenda tua enda oku li sukuila volondui. Ocili okuti, nda volondui vimue mua enda oku kala olongandu, tua enda oku tapa ovava lovikuata loku yuila volombalaka.

 Oco tu tẽlise ocikele caco tua sukilile ongusu yalua okuti kovikele vikuavo ci sule. Pole, tua kolelele okuti ‘nda tua endele longusu tua kuatele,’ Yehova nda wa tu kuatisa oku litunda ciwa. (Olonganji 6:14) Ca tĩlile oku pitĩla kakongelo alua tua sukilile oku nyula, momo a kala kovitumãlo via litepa ndeci, vovisenge, kovitumãlo kuli ovava kuenda kolomunda. Tua enda oku linga ovongende lakãlu, olowato, olombalãu kuenda olonjanja vialua tua endela posi oco tu lisange la vamanjetu. b

 Oco tu nyule ekongelo limue li kasi kohulo yo Indonésia, tua linga ungende weci ci soka 350 kolokilometulu, olonjanja vialua vatapalo amue ka a tungiwile. Vungende waco tua sukilile oku yoka eci ci pitahãla 200 kolondui vinene levi vitito, pole, haviosiko via kuata ayahu. Vokuenda kuanyamo, ka tua ivalukile vali olowola tua pumba oco tu sakulule ekãlu lietu volonata. Eci tua enda oku pitĩla, vamanjetu omo liocisola va enda oku tu talamẽla lesanju kuenda oku tu nenela okulia.

 Eci tua linga ungende lombalãu yitito haiyo yi linga onjuela yalua oco tu ende kolomunda, ukuakuendisa wa enda oku sandiliya pokati kalende oco a mole apa citava oku talamisa ombalãu. Noke wa enda oku pita kilu liocitumãlo caco oco a limbuke nda pali ocinyama ale omõla umue. Omo liaco, tua enda oku kuatelela kolomangu viombalãu oco tu lipongiyile oku vata posi yi kuete ovitunu kuenda olonata vialua, ya kala kilu liomunda yimue yi kuete ci soka 2.100 kolometulu voku lepa. Olonjanja vimue kovitumãlo viaco, citava lika oku katuka lombalãu kohulo yocitunu cimue ca longa. c

 Olonjanja vimue, tua sukilile oku londa kolomunda loku pita vovisenge muli owuya haimo muli ovava, tua enda oku ambata akolombele etu mua kala alivulu kuenda ovina vikuavo vi sukiliwa. Poku enda la vamanji, ovongende aco a enda oku kala epuluvi lioku kuata olombangulo vi sanjuisa kuenda oku yola.

 Tua liyevaile ndupostolo Paulo eci a soneha olondaka vi sangiwa 1 Va Tesalonike 2:8 viokuti: “Omo tuo kuateli ohenda, ka tua nõlele lika oku vu sapuili . . . tuo wĩhivo ovimuenyo vietu, momo vu soliwe calua letu.” Tua limbuka okuti vamajetu va yonguile oku tu lingila ovina vimuamue, toke muẽle va yonguile oku eca ovimuenyo viavo oco va tu popele kovingumba via limalehẽle. Eteke limue, ulume umue wa saluisa Leann lomoko yimue yinene. Pole, lonjanga yalua manji umue weya loku kala pokati kaye locingumba kuenda vakuavo va enda oco va va kuatise. Ci sanjuisa ceci okuti, manji wa kuata lika apute atito. Yehova wa tu kuatisa eteke leteke vofeka yaco mua kala ungangala. Eci ca ecelela okuti tu kuatisa vamanjetu konepa yespiritu.

 Kofeka yo Papua-Nova Guiné uloño woku tata uhayele ka wa luile. Eli olio esunga okuti ca tĩlile calua oku tata uhayele wetu. Kunyamo wo 2010, Leann nda wa fa omo liepuka limue a kuata. Omo liaco, tua sukilile oku enda ko Austrália lonjanga yalua oco a ka tatiwe. Lekuatiso lia Yehova, tua tẽla oku tulumũha. Noke, olondotolo via sanga ovihemba vio kuatisa. Umue pokati kolondotolo wa popia ndoco: “Ene wa kali oku lingila upange Suku. Kaliye epuluvi liaye lioku ku lingiliko upange.” Noke lioku pita olosãi vimue, tua tiukila kocikele cetu.

Ovina Vialua Vioku Linga ko Austrália

 Vunyamo wa kuamamo, tua sukilile oku enda olonjanja vialua ko Austrália oku ka tata uhayele wa Leann. Kunyamo wo 2012, o Betele ya tu sapuila oco tu kale ko Austrália loku tata uhayele wetu. Noke lianyamo alua, ocitangi cinene ka ca kaile cuhayeleko, pole, oku likisa kovisimĩlo kuenda kutima. Tua sumuile omo lioku siapo ocikele cetu kuenda vamanjetu tua solele calua. Tua enda oku liyeva ndu okuti tua lueya kuenda ka tua kuatele vali esilivilo ku Yehova. Omo liotembo yalua ya pitapo, ca tĩlile oku sima okuti o Austrália ofeka yetu. Vepuluvi liaco, ca tu kolisa vali calua ekuatiso tua tambula ku vamanjetu.

 Eci Leanna a kaya, tua linga akundi valikasi ko Wollongong, okuti olupale lumue lu kasi kombuelo yo Sydney, ko Nova Gales yo Kombuelo. Noke liunyamo umosi, tua kuata esanju lioku tambula elaleko oco tu pindisiwe Kosikola Yakundi Vusoma. Noke, o Betele yo Australásia ya tu ĩha ocikele coku nyula akongelo. Vokuenda kuanyamo aco, tua enda oku nyula akongelo kuenda ovimunga via kala valupale muli omanu valua, apata a kala kovitumãlo ka kuli omanu valua kuenda alupale a kasi kohulo yokalunga. Cilo, vocikanjo cetu mua kongela onano yekalasoko lio Austrália kuenda ofeka yosi yo Timor-Leste.

 Ngeca olopandu vialua ku Yehova omo lioku nyĩha ukãi umue wa pama kespiritu haiye wa siata oku ñuatisa vokuenda kuanyamo osi a-a. Eye ombanjaile yimue Yehova a nyĩha. Leann lalimue eteke a likalele ocikele cimue, ndaño okuti ocikele caco ca tĩlile calua. Eci a pulisiwa ndomo a siata oku liyaka lovitangi, eye wa siata oku popia okuti ‘o sapuila cosi Yehova.’ Noke, osimbu a tanga Embimbiliya, eye ecelela okuti Yehova u sapuila ndomo a sukila oku sokolola, oku liyeva kuenda oku linga ovina.

 Lalimue eteke nda livelele omo lioku eca omuenyo wange peka lia Yehova, okuti oku imba ombunje hacoko. Nda limbuka okuti eci tu tava ocikele cimue, Yehova o pondola oku tu ĩha uloño oco tu tẽlise ocipango caye. Eci ndi liyaka loloseteko ale ceci ndi nõla onjila yimue, nda lilongisa okuti ocina catete ndi sukila uku linga oku likutilila ku Yehova oku pinga olondunge kuenda espiritu sandu. Isietu ukuacisola, Yehova, wa siata oku tu ĩha omuenyo wesanju. Tu lavoka lesanju oku mola eci eye a ka linga lomanu va sokisiwa ndukuasi “volombia viotuma,” ndeci etu.—2 Va Korindo 4:7.