Calumingu, 20 ya Kuvala 2022, COP27 okuti ohongele yolo Nações Unidas, yatiamẽla Kepongoloko Liofela ya malusuiwa. Ndaño okuti kua lingiwa ohuminyo yoku kuatisa lolombongo olofeka vina kua siata oku pita ovilunga vialua, omanu vamue va limbuka okuti, ohuminyo yaco ka yi ka tepulula ocitangi caco.

•   “Ame ndi tava konjila ya nõliwa yoku kongola olombongo yovina vi pesiwa, ocili, ka ci ka tẽla, oluali luetu lu kasi handi vohondo yoku kevelela.”—António Guterres, usonehi-wolo Nações Unidas, 19 ya Kuvala 2022.

•   “Oluali lu laika oku liyaka lovilunga vialua.”—Mary Robinson, wa kala ombiali ko Irlanda, haiye wa kala Usonehi wa velapo wolo Nações Unidas o teyuila olonjongole viomanu, 20 ya Kuvala 2022.

 Ca piãla enene amalẽhe va sakalala lovina vi ka pita loluali kovaso yoloneke. Anga hẽ olofeka vi pondola oku likuata omunga loku tẽlisa ohuminyo yoku tetulula ovitangi viovilunga? Nye Embimbiliya li popia?

Anga hẽ olofeka vi ka likuata omunga kuenda oku kuata onima yiwa?

 Embimbiliya li popia okuti ndaño lupange walua lalikolisilo omanu valua, olofeka ka vi ka tẽla oku tetulula ocitangi covilunga. Kũlĩhĩsa asunga avali:

•   “Eci ca penga ka citava oku ci pengulula.”—Ukundi 1:15.

   Elomboloko liocinimbu eci: Olombiali ka vi tẽla oku ci tetulula momo omanu ka va lulikiwile oco va li viale ovo muẽle. (Yeremiya 10:23) Ndaño okuti olofeka vi tẽla oku liongolola, pole ka vi tẽla oku tetulula ovitangi violuali, ndaño vi likolisilako calua.

•   “Momo omanu va ka linga vakuakulisola ovo muẽle, vakuakusola olombongo, . . . vakuamanya.”—2 Timoteo 3:2, 3.

   Elomboloko liocinimbu eci: Embimbiliya lia popele ale okuti omanu valua koloneke vilo, va laikele oku li sola ovo muẽle kuenda ka va ka yongola oku talavayela kumosi oco va kuatise vakuavo.

Tu pondola oku kuata elavoko

 Elavoko liongongo, ka lia tambele kolohuminyo violombiali viomanu. Suku wa nõla Ombiali yimue yosungulukila oco yi viale omanu okuti, Yesu Kristu. Catiamẽla kokuaye Embimbiliya li popia hati:

•   “Uviali u ka kala kapepe aye. Onduko yaye yi ka tukuiwa hati, Ndunguli o Komõhisa, Suku Ukuonene, Isia Ka Pui, Mbiali Yombembua.”—Isaya 9:6, etosi.

 Yesu eye Osoma Yusoma wa Suku, ale uviali umue u kasi kilu. (Mateo 6:10) Eye o yongola oku tu tata, loku tatavo ongongo, o kuete unene kuenda olondunge vioku ci linga. (Olosamo 72:12, 16) Pocakati Cusoma wa Suku, Yesu o ka kundula omanu “va vĩhisa ilu lieve” kuenda oku malako ovina viosi vi vĩhisa ofela.—Esituluilo 11:18; etosi; Isaya 35:1, 7.

 Oco o lilongise ovina vikuavo viatiamẽla koku potolola ovitangi viovilunga, tanga ocipama losapi, “Mudanças climáticas e o futuro da humanidade—O que a Bíblia diz.”