Ukundi 1:1-18
1 Evi olondaka viukundi,*+ omõla a Daviti, soma ko Yerusalãi.+
2 “Esanda linene!”* oco ca popia ukundi,“Esanda linene! Ovina viosi esanda!”+
3 Onima yipi omunu a kuata omo liupange waye wosi wa tĩla;Una eye a likolisilako calua oku linga vemẽhi liekumbi?+
4 Ocitumbulukila cimue cenda kuenda ocitumbulukila cikuavo ciya,Pole, ongongo yamamako* otembo ka yi pui.+
5 Ekumbi li tunda* kuenda ekumbi li iñila;Noke li tiukila lonjanga kocitumãlo cina olio li tunda vali.+
6 Ofela yenda kombuelo kuenda yi ñuala konano;Yi ñuala loku ñuala, oyo yamamako oku ñuala; ofela yamamako oku ñuala ñuala.
7 Olondui viosi vi lupukila vokalunga, pole, okalunga ka keyuka.+
Olondui vi tiukila kocitumãlo via tunda, oco vi lupuke vali.+
8 Ovina viosi vi kavisa;Lomue o pondola oku popia catiamẽla kovina viaco.
Iso ka li kuta oku vanja;Ndaño muẽle etũi, ka li kuta loku yevelela.
9 Eci ca kala, oco ci ka kala,Kuenda eci ca lingiwa, ci ka lingiwa vali;Ka kuli lacimue cokaliye vemẽhi liekumbi.+
10 Anga hẽ kuli cimue ci popiwa hati: “Tala, eci cokaliye”?
Cosi ci kasiko ale, tunde kosimbu;Cosi ci kasiko ale, osimbu ka tua kaile komuenyo.
11 Lomue ivaluka omanu vo kosimbu;Lomue o ka ivaluka vana veya noke;Ndaño muẽle ovo, ka va ka ivalukiwa la vana va keya noke liavo.+
12 Ame ndukundi, nda kala osoma yo Isareli vo Yerusalãi.+
13 Nda likolisilako calua oku lilongisa loku konomuisa lolondunge,+ ovina viosi vi lingiwa vemẽhi liovailu,+ upange u lingisa ohenda una Suku a eca komãla vomanu okuti, owo ovo va linga.
14 Nda mola ovopange osi a lingiwa vemẽhi liekumbi,Kuenje tala! Nda limbuka okuti, ovina viosi viaño, oku lupukila konyima yofela.+
15 Eci ca penga ka citava oku ci pengulula,Kuenda eci ca kamba, ka citava oku ci tenda.
16 Kuenje nda popia vutima wange siti: “Tala! Ndi kuete olondunge vialua okuti, omunu umue wa kala ale komuenyo osimbu sia kaleko vo Yerusalãi,+ ci sule kuenda utima wange u kuete olondunge vialua lukũlĩhĩso.”+
17 Nda litumbika koku kũlĩha olondunge, oku kũlĩha uyui* loku kũlĩha uveke+ kuenje ovina evi oku lupukilavo konyima yofela.
18 Momo oku kuata olondunge vialua ku nena asakalalo alua,Omo liaco, wosi o vokiya ukũlĩhĩso o vokiya evalo.+
Atosi Pombuelo
^ Ale “via una ukuakuongolola; ukuakukovonga.”
^ Ale “viaño.”
^ Lit., “yi tãi.”
^ Ale “li nina.”
^ Ale “uveke walua.”
