OSAPI YO KOÑOÑO | ANGA HẼ SUKU WA KU KAPAKO?
Suku O Pondola Oku Kuata Ukamba Love
“Lomue o tẽla oku iya kokuange, te Isia wa numa u koka.”
ESUNGA LIECI VAMUE VA KUETELE ATATAHÃI: Omanu valua ndaño va tava ku Suku, va sima okuti va kasi ocipãla laye. Ukãi umue wo ko Irlanda o tukuiwa hati, Christina okuti wa siata oku enda konembele olosemana viosi, wa popia hati: “ Nda kũlĩha okuti Suku eye wa lulika ovina viosi. Pole, sio kũlĩhile. Lalimue eteke nda liyevele okuti o kasi ocipepi lame.”
CECI ONDAKA YA SUKU YI LONGISA: Eci tu liyeva ndu okuti tua nyelela, Yehova ka tu yanduluka. Yesu poku lekisa ndomo Suku a tu kapako wa popia ndoco: “Nda umue o kasi locita colomeme, kuenje yimue ya nyelela, ka si he olomeme ekui ecea lecea kolomunda ha endi oku sanda eyi ya nyelela?” Nye tu lilongisako? “Oco hacipango ca Isieneko o kasi kilu okuti kamue kamosi kava vatito ka taka.”
Vosi pokati “kava vatito” va kuete esilivilo ku Suku. Suku o sanda ndati omeme “ya nyelela”? Ndomo ca lekisiwa vocisonehua ca tukuiwa kefetikilo, Yehova o kokela omanu kokuaye.
Koloneke vilo velie va siata oku enda kolonjo viomanu kuenda kovitumãlo vikuavo oco va kunde esapulo Liembimbiliya liatiamẽla ku Suku?
Kũlĩhĩsa ndomo Suku a sanda onjila yoku kokela kokuaye vakuavitima via sunguluka. Kocita catete K.K., Suku wa tuma Ukristão Filipu ondonge oco a lisange la kalei wo ko Etiopia kuenda oku sapela laye catiamẽla kelomboloko liocitumasuku Cembimbiliya a kala oku tanga. (Ovilinga 8:26-39) Noke Suku wa imba onumbi upostolo Petulu oco a ende konjo ya Korneliu kesongo kolohoka via va Roma, una wa enda oku likutilila loku likolisilako oku fendela Suku. (Ovilinga 10:1-48) Suku wa songuilavo upostolo Paulu kuenda akamba vaye kolui lumue oco va tunde volupale luo ko Filipoi. Ovo va lisanga “lufendeli umue wa Suku” o tukuiwa hati Ludia, kuenje “Utima waye [Yehova] wo situluila oku yeva.”
Ovolandu a tukuiwa ndeti a lekisa okuti, Yehova wa sanda onjila yoku kuatisa vana va kala oku u sandiliya oco vo kũlĩhe. Koloneke vilo, velie va siata oku enda kolonjo viomanu kuenda kovitumãlo vikuavo oco va kunde esapulo Liembimbiliya liatiamẽla ku Suku? Valua va tambulula hati, ‘Olombangi Via Yehova.’ Lipula ove muẽle ndoco, ‘Anga hẽ Suku wa va tuma oco va kuate ukamba laye’? Tu ku vetiya oku likutilila ku Suku oco a sumũlũise alikolisilo ove oku kuata ukamba laye. *
^ tini. 8 Oco o kuate alomboluilo akuavo, tala ovideo losapi hati, Momo lie ndi lilongisila Embimbiliya? vonumbi yetu yo www.jw.org.
Ove o ka ci Sola
KOKUETU
Momo lie ndi Lilongisila Embimbiliya?
Embimbiliya li kasi oku kuatisa owiñi wakahandagalala voluali luosi oku sanga atambululo kapulilo a velapo komuenyo. O yongola hẽ oku kala pokati kowiñi waco?
