1, 2. Tu vetiyiwa ndati lovituwa viepata lietu, kuenda viofeka tu kasi?

 VOSI yetu tua siata oku kuama ovituwa viepata lietu, kuenda viofeka tu kasi. Eli olio esunga lieci tu solele ovikulia viofeka yaco, uwalo, kuenda ovituwa vimue. Momo lie? Momo, tua siata oku kuama ovituwa viomanu va kasi vofeka yaco.

² Pole, kuli ovina vikuavo via velapo okuti, ka vi sokisiwa lokulia tu sole, kuenda uwalo. Osimbu tu kula, tua longisiwa okuti, kuli ovina vimue viwa, kuenda ovina vĩvi. Pole, omanu va kuete ovisimĩlo via litepa viatiamẽla kueci ciwa leci cĩvi. Utima wetu u pondola oku tu kuatisa oku nõla ovina tu yongola oku linga. Embimbiliya li popia hati: ‘Vakualofeka, ka va kuete ovihandeleko, pole, nda va pokola kovihandeleko ndocituwa cavo, va likapela ovo muẽle ovihandeleko, ndaño ka va kuete ovihandeleko.’ (Va Rom. 2:14) Nda ka kuli ocihandeleko ci tunda ku Suku, anga hẽ tu sukila oku kuama olonumbi viepata lietu, ale tu kuama vio vimbo tu kasi?

3. Ovina vipi vivali vi lekisa esunga lieci Akristão vocili ka va tavela oku linga ovina vimue violuali?

³ Kuli ovina vivali vi lekisa esunga lieci Akristão vocili ka va tavela oku linga ovina vimue violuali. Catete, Embimbiliya li tu sapuila hati: ‘Kuli onjila yimue yi molẽha komunu okuti ya sunguluka, pole, esulilo liaco olofa.’ (Olosap. 16:25) Omo okuti ka tualipuile, ka tu pondola oku li songuila etu muẽle. (Olosap. 28:26; Yer. 10:23) Cavali, Embimbiliya li popia hati, Satana “osuku yoluali lulo,” eye wa siata oku eca olonumbi vi vetiya omanu oku li nõlela eci va yongola oku linga, ndaño ciwa, ale cĩvi. (2 Va Kor. 4:4; 1 Yoa. 5:19) Omo liaco, nda tu yongola oku tambula asumũlũho a Yehova, kuenda oku taviwa laye, tu sukila oku pokola kelungulo li sangiwa kelivulu lia Va Roma 12:2.—Tanga.

4. Nye tu konomuisa vocipama cilo?

 ⁴ Elivulu lia Va Roma 12:2, li lombolola atosi atatu tu sukila oku kapako. (1) Momo lie tu sukilila ‘oku ­pongoluiwa’? (2) Nye ca kongela voku pongoluiwa? (3) Tu pondola ndati oku pongoluiwa? Tu konomuisi apulilo a lingiwa ndeti.

5. Olondaka Paulu a soneha kelivulu lia Va Roma 12:2, wa vi tumisa komanu vapi?

⁵ Olondaka upostolo Paulu a soneha vukanda waye, ka vi tumile komanu vo ko Roma. Pole, wa vi tumisa Kakristão olombuavekua va kala vofeka yaco. (Va Rom. 1:7) Eye wa va vetiya oco va ‘yuvule oku li setahãisa loluali lulo.’ Catiamẽla Kakristão va kala ko Roma kunyamo wa 56 K.K., voku ‘li setahãisa kuaco loluali’ mua kongelele ovisimĩlo via va Roma viatiamẽlele kueci ciwa leci cĩvi, ovituwa viavo, kuenda oku wala kuavo. Olondaka Paulu a tukula hati, ‘oku li setahãisa loluali,’ vi lomboloka okuti, kua kala vamanji vamue va enda oku vetiyiwa lovituwa via va Roma, kuenda ovisimĩlo viavo. Akristão vamue va yapuisiwa ndati lovituwa viaco?

6, 7. Koloneke via Paulu, ovitangi vipi Akristão vocili vo ko Roma va liyaka lavio?

⁶ Koloneke vilo, eci vakuakunyula olofeka va enda ko Roma, va siata oku sanga ovimulungu violonembele, ayambo, kuenda olonjo vimue via kuka via tungiwa kosimbu. Vimue pokati kovimulungu viaco, via tungiwa kocita catete. Ovimulungu viaco, vi tu kuatisa oku kũlĩha ndomo va Roma va kala kosimbu, kuenda ndomo va enda oku fendela. Tu pondolavo oku tanga ovolandu valivulu a lombolola ndomo va Roma va enda oku linga olomapalo lovinyama via tema, olomapalo vioku lekisa ovinyama vi koka olokalosa, kuenda ovisikilo vi vetiya ukahonga. Omo okuti olupale luo Roma lua kuata ovokuasi alua, ca lelukile omanu oku linga olomĩlu.—Va Rom. 6:21; 1 Pet. 4:3, 4.

⁷ Ndaño okuti va Roma va kuatele olonembele vialua kuenda va enda oku fendela olosuku viesanda, pole, omanu va lua ka va kuatele ukamba lolosuku viaco. Etavo lia va Roma, lia enda oku kisika omanu oco va pange onepa kovihilahila viatiamẽla keteke lioku citiwa kuomunu, kolohuela, ale koku kenda omunu wa fa. Ka ca lelukile ku vamanji ko Roma oku tamalãla kovihilahila viaco. Momo, valua pokati kavo va citiwila vapata ana atiamẽla kefendelo liolosuku viesanda, kuenje, va sukilile oku linga apongoloko oco va linge Akristão vocili, loku amamako oku linga apongoloko noke yepapatiso.

8. Koloneke vilo, momo lie ka ca lelukile Kakristão vocili oku kala voluali lulo?

⁸ Koloneke vilo, vamanji valua va siatavo oku liyaka lovitangi ndevi Akristão vo ko Roma va liyaka lavio. Momo lie? Momo ovituwa vĩvi violuali via livokiya calua. (Tanga Va Efeso 2:2, 3; 1 Yoano 2:16.) Omanu vakualuali va siata oku tu vetiya oco tu tave kolonjongole viavo, kovituwa, kuenda kovisimĩlo viavo. Nda ka tua lavuluile, tu yapuisiwa lovituwa viaco.  Eli olio esunga lieci tu vetiyiwila oku pokola kelungulo lioku ‘yuvula oku li setahãisa loluali lulo’ pole, tu sukila oku ‘pongoluiwa.’ Nye tu sukila oku linga?

9. Apongoloko api omanu valua va siata oku linga oco va papatisiwe?

⁹ Osimbu omunu a lilongisa Embimbiliya loku kapako ovina a lilongisa, o fetika oku kuata ukamba la Yehova. Ovina a lilongisa, ovio viu kuatisa oku linga apongoloko vokuenda kuotembo. Eye o siapo alongiso esanda lovilinga viosi vietavo liaco, kuenje, o lekisa ovituwa Viakristão vocili. (Va Efe. 4:22-24) Tu kuete esanju poku mola ndomo omanu valua va siata oku linga apongoloko komuenyo wavo unyamo lunyamo, kuenje, va litumbika ku Yehova Suku loku papatisiwa. Apongoloko aco, a sanjuisa utima wa Yehova. (Olosap. 27:11) Pole, tu sukila oku lipula ndoco: Anga hẽ omunu o sukila muẽle oku linga apongoloko aco?

10. Momo lie voku pongoluiwa mua kongelela ovina vialua okuti, oku linga lika apongoloko amue ci sule?

¹⁰ Voku pongoluiwa mua kongela ovina vialua okuti, oku linga lika apongoloko amue ci sule. Ondisionaliu yimue Yembimbiliya yi lekisa okuti, vondaka oku “pongoluiwa” ya tukuiwa kelivulu lia Va Roma 12:2, mua kongela oku linga apongoloko kovisimĩlo vietu lekuatiso liespiritu sandu. Ukristão ka pongoloka lika poku siapo ovituwa viaye vĩvi, upopi ka wa sungulukile, ale ovina vikuavo ka via sungulukile. Omanu vana ka va kũlĩhĩle eci Embimbiliya li popia, va siata oku seteka oku yuvula ovina viaco vĩvi. Omo liaco, nye etu Tuakristão tu sukila oku linga oco tu pongolole ovisimĩlo vietu kuenda ovilinga vietu?

11. Apongoloko api Paulu a tukula okuti ovo Ukristão a sukila oku linga?

¹¹ Paulu wa popia hati: Omuenyo wene u pongoluiwe, oco u kuati ovitima viokaliye.’ Ondaka ‘ovitima viokaliye,’ yi tiamisiwila kovisimĩlo vietu. Pole, ndomo ya tukuiwa Vembimbiliya, mua kongela ovina tu sole oku sokolola, ovituwa vietu, kuenda uloño wetu woku sokolola ovina. Paulu kefetikilo liukanda waye a sonehela va Roma, wa popia eci catiamẽla komanu ‘vana va kuatele utima wuveke.’ Momo va tiamisilile utima wavo ‘kevĩho, kocipululu, konya, koku livela ovina vĩvi, kumondi, kovama, kuhembi,’ kuenda kovina vikuavo ka via sungulukile. (Va Rom. 1:28-31) Eli olio esunga lieci Paulu a lunguila Akristão vocili oco ‘va linge apongoloko okuti va kuata ovitima viokaliye, kuenda oku siapo ovisimĩlo ka via sungulukile.’

12. Ovisimĩlo vipi omanu valua va siata oku kuata? Momo lie Ukristão a sukilila oku yuvula ovisimĩlo viaco?

¹² Koloneke vilo, tua ñualiwa lomanu valua va kuete ovisimĩlo ndevi Paulu a tukula.  Ovo va sima okuti, ka tu sukila vali oku pokola kolonumbi via Suku, kuenda lomue o kisika ukuavo oku pokola kolonumbi viaco. Alongisi valua kolosikola, kuenda olonjali, va ecelela okuti, omãla “va linga eci va yongola.” Kuenje, va ­siata oku longisa okuti, omunu lomunu o kuete omoko yoku li nõlela eci a yongola oku linga, cikale eci ciwa, ale ceci cĩvi. Omanu valua va litukula vati vakuetavo, va popia hati, va kuete elianjo lioku linga ovina va sima okuti ovio via sunguluka. Momo va sima okuti, ka va sukila oku pokola ku Suku, kuenda kovihandeleko viaye. (Osa. 14:1) Ocituwa caco ci pondola oku kokela ovitangi Akristão vocili. Nda ka tua lavuluile, tu liwekapo oku tambula olonumbi vi tunda vocisoko ca Yehova, kuenje, tu fetika oku lisiõsiõla omo liovina vimue tu sima okuti, ka via sungulukile. Citava okuti ka tu pokola kalungulo Embimbiliya tua siata oku tambula, atiamẽla kovitalukilo, ko Internet, kuenda kelilongiso kosikola yavelapo.

13. Momo lie tu sukilila oku konomuisa lutate ekalo liutima wetu?

¹³ Nda ka tu yongola oku yapuisiwa loluali lulo loku kuama ovituwa viaco, tu sukila oku konomuisa ekalo liomuenyo wetu, kuenda ovimaho vietu. Omo okuti omanu ka va pondola oku kũlĩha ovina vi kasi vutima wetu, pamue va tu pandiya loku tu sapuila vati, tu kasi oku linga ciwa ovina. Pole, tu pondola lika oku tava kepandiyo liaco, nda tu ecelela okuti, ovina tua lilongisa Vembimbiliya via amamako oku pongolola omuenyo wetu.—Tanga Tiago 1:23-25.

14. Nye ci tu kuatisa oku limbuka apongoloko tu sukila oku linga?

¹⁴ Voku pongoluiwa, mua kongela okupa vutima wetu ovisimĩlo viosi ka via sungulukile. Omo liaco, tu sukila ocina cimue ci tu kuatisa okupa vutima wetu ovina viaco. Nye ci pondola oku tu kuatisa oku ci linga? Eci tu lilongisa Embimbiliya, tu limbuka ovituwa Yehova a yongola okuti, ovio tu lekisa komuenyo wetu. Oku kapako ovina tua lilongisa Vembimbiliya, ci tu kuatisa oku limbuka ovisimĩlo viutima wetu. Nda tua ci linga, ci tu kuatisa oku linga apongoloko tu sukila, oco tu kũlĩhe ‘ocipango ca Suku ca li pua.’—Va Rom. 12:2; Va Hev. 4:12.

15. Apongoloko api tu pondola oku linga, nda tua ecelela oku penguluiwa la Yehova?

¹⁵ Tanga Isaya 64:8. Ocindekaise uprofeto Isaya a tukula vocinimbu eci Cembimbiliya, ci tu longisa ovina vialua. Omo okuti Yehova o kasi Ndutungi wolombia, o tu pengulula ndati ndotuma? Eye ka pongolola etimba lietu, ale eposo lietimba lietu. Pole, o tu pindisa lolonumbi vi tu kuatisa oku pongolola ovisimĩlo vietu. Nda tua ecelela oku penguluiwa la Yehova, ci tu kuatisa oku yuvula ovina viosi vi pondola oku tu yapuisa voluali lulo. Yehova o tu pengulula ndati?

16, 17. (a) Lombolola ovina utungi wolombia a sukila oku linga oco a tunge ombia yimue ya posoka. (b) Ondaka ya Suku yi tu kuatisa ndati oku pongoluiwa oco tu kuate esilivilo kovaso a Yehova?

¹⁶ Oco utungi wolombia a tunge ombia yimue ya posoka, o sandiliya otuma yiwa. Pole, o linga ovina vivali oco otuma yi kale ciwa. Catate, o sukila oku yelisa ciwa otuma yaco. Noke, o yi tenga lovava a sukiliwa, oco a tunge ombia yimue ya posoka.

¹⁷ Tua limbuka okuti, utungi wolombia o tama otuma lovava loku yi yelisa, oco a tunge ombia yimue ya posoka. Ndomo ca lekisiwa vocindekaise cotuma, tu tẽla hẽ oku limbuka ndomo Ondaka ya Suku yi pondola oku tu kuatisa oku linga apongoloko komuenyo? Eci tu fetika oku lilongisa catiamẽla ku Suku, Embimbiliya li tu kuatisa oku siapo ovisimĩlo violuali, kuenje, tu fetika oku kuata ovisimĩlo ndevi via Suku, oco tu kuate esilivilo kokuaye. (Va Efe. 5:26) Sokolola ndomo tua siata oku vetiyiwa oku tanga Embimbiliya oloneke viosi, loku endaenda kolohongele  kuna tu lilongisa Ondaka ya Suku. Momo lie tu vetiyiwila oku linga ovina viaco? Momo poku ci linga, tu lekisa okuti, tu tava oku penguluiwa la Yehova.—Osa. 1:2; Ovil. 17:11; Va Hev. 10:24, 25.

18. (a) Momo lie oku sokolola ovina tua lilongisa ci kuetele esilivilo, nda tu yongola okuti ondaka ya Suku yi tu pongolola? (b) Apulilo api a tu kuatisa oku ci linga?

¹⁸ Oco ondaka ya Suku yi tu kuatise oku linga apongoloko, tu sukila oku tanga Embimbiliya oloneke viosi. Kuli omanu valua va siata oku tanga Embimbiliya olonjanja vimue, kuenje, va kuete elomboloko liovina va tanga. Citava okuti wa sangele ale omanu vaco kupange woku kunda. Vamue pokati kavo va pondola oku tukula ovinimbu vimue Viembimbiliya va patekela. a Pole, ukũlĩhĩso waco ka u pongolola ovisimĩlo viavo, kuenda ekalo liomuenyo wavo. Momo lie? Momo Ondaka ya Suku yi kuatisa lika omunu nda wa ecelela okuti, ‘yi veta kutima’ waye, oco a linge apongoloko. (Va Gal. 6:6) Omo liaco, tu sukila oku pita otembo loku sokolola ovina tu kasi oku lilongisa. Tu sukilavo oku li pula ndoco: ‘Ndi tava hẽ okuti, ovina ndi kasi oku lilongisa vi tunda ku Yehova, kuenda vi kasi ndu okuti o vangula lame? Sia limbukile hẽ okuti, ovina ndi lilongisa viocili? Nda kapako hẽ ovina nda lilongisa kuenda si vi tendi okuti omanu vakuavo ovo lika va sukila oku vi lilongisa? Ndi sima hẽ okuti Yehova o kasi oku vangula lame?’ Nda tua sokolola lutate kapulilo a lingiwa ndeti, ci tu kuatisa oku kuata ukamba la Yehova. Nda tua ci linga, ocisola tu kuetele Yehova ci livokiya. Eci ovina tua lilongisa vi veta kutima wetu, ci tu vetiya oku linga apongoloko komuenyo wetu.—Olosap. 4:23; Luka 6:45.

19, 20. Elungulo lipi Liembimbiliya tu sukila oku kapako oco tu tambule asumũlũho?

¹⁹ Oku tanga Embimbiliya oloneke viosi, loku sokolola ovina tua tanga, ci tu kuatisa oku amamako oku kapako ovina tua lilongisa kosimbu. Embimbiliya li tu vetiya hati: “Luli omunu wale lovilinga viaye vĩvi, kuenje wali omunu wokaliye. Omunu waco wokaliye o kasi loku tumbuluiwa.” (Va Kol. 3:9, 10) Nda tu amamako oku kuata elomboloko liovina tua lilongisa Vembimbiliya, ci tu kuatisa oku kuata ukũlĩhĩso wa Yehova Suku. Nda tua ci linga, tu wala omunu wokaliye, kuenda ci tu teyuila kayonjo a Satana.

²⁰ Omo okuti ‘tumãla va pokola, kuenda tu yuvula oloñeyi vĩvi tua kuatele kosimbu,’ upostolo Petulu o tu vetiya oku ‘kala omanu va kola kovilinga vietu viosi.’ (1 Pet. 1:14, 15) Nda tua siapo ovituwa vĩvi tua kuata kosimbu, kuenda tu tava oku pongoluiwa, tu ka tambula asumũlũho ka apui, ndomo tu ka ci konomuisa vocipama ci kuãimo.