ULANDU WOMUENYO
“Cilo Ndi Sole Upange Woku Kunda!”
NDA kulila volupale luo Balclutha Kocifuka Cokombuelo yo Nova Zelândia. Eci nda kala omõla nda kuata ukamba uwa la Yehova kuenda nda solele oku kala Ombangi ya Yehova. Nda solaile oku enda enda kolohongele kuenda nda tendaile ekongelo ndocitumãlo cimue ca koka haico cesanju. Ndaño okuti nda kuata osõi yalua, pole, nda solaile upange woku kunda. Sia kuatele usumba woku kundila vana tu tangela kumosi kosikola kuenda vakuavo. Nda sanjukilile calua oku kala Ombangi ya Yehova kuenje eci nda kuata 11 kanyamo, nda tumbika omuenyo wange ku Suku.
ESANJU LIANGE LIA TEPULUKA
Eci nda kuata akũi atatu kanyamo, ukamba nda kuatela Yehova wa fetika oku tepuluka. Vana tua tangela kumosi kosikola, va molẽhele ndu okuti va kuatele elianjo lialua kuenda nda yonguile oku kuatavo elianjo liaco. Nda liyeva ndu okuti olonumbi violonjali viange kuenda ovihandeleko via Yehova via kala ocilemo. Ndaño okuti nda kolelele Yehova, pole ukamba wange laye wa kala oku tepuluka.
Sia liwekelepo oku kunda, pole, ombili yange ya tepuluka. Eci ngenda kupange woku kunda sia endaile oku pongiya kuenje ca tĩlile oku fetika ombangulo, ale oku amisako lombangulo. Omo liaco, sia kuatele apasu, ale alilongiso Embimbiliya kuenje nda fetika oku suvuka upange woku kunda loku kuata owesi walua. Noke nda fetika oku lipula ndoco: ‘Omunu umue o tẽla ndati oku kunda olosemana viosi kuenda olosãi viosi?’
Eci nda tẽlisa 17 kanyamo nda fetika oku litumĩla ame muẽle. Kuenje nda longeka ovina viange, nda tunda konjo loku ilukila ko Australia. Eci nda tunda konjo olonjali viange via sumuile calua. Ovo va sakalalele calua pole, va simile okuti ndi kamamako oku vumba Yehova.
Ko Australia ndeya oku hongua calua konepa yespiritu. Nda enda oku pumba olohongele. Nda linga ukamba lamalẽhe vamue okuti ndeci ame, va endaile kolohongele, pole, noke va tunda oku ka nyua ovina vi koluisa kuenda oku enda kolonjo violomiluko. Oku sokolola konyima, ndi limbuka okuti, ndambatele olonjila vivali, sia kaile vocili kuenda sia kailevo voluali.
OCINA CIMUE CEYA OCIPIKIPIKI OKUTI CA NDI LONGISA CIMUE CI KUETE ESILIVILO
Noke yanyamo avali nda kũlĩha manji umue ukãi wa ndi kuatisa oku limbuka ndomo nda kala oku ambata omuenyo wange. Nda kala lavamanji akãi va soka vatãlo okuti ka va kuelele kuenje tua laleka manji ukuakunyula akongelo lukãi waye Tamara oco va kale konjo yetu vokuenda kuosemana. Osimbu ulume wa Manji Tamara a sokiya ovina viekongelo, manji Tamara o kala letu oku yola yola. Nda enda oku ci sola calua. Eye wa lianjele ciwa kuenda wa sungulukile. Nda komõha calua poku mola okuti omunu umue wa loñoloha kespiritu o sanda otembo yoku kala letu.
Manji Tamara wa sanjukile calua. Ocisola a kuatela ocili kuenda upange woku kunda ca enda oku vetiya. Eye wa enda oku yeva esanju koku linga upange wa Yehova lutima wosi, osimbu okuti ame nda sumuile omo ndaenda oku linga citito. Ovituwa viaye viwa kuenda esanju liaye, via ndi vetiya calua. Ongangu yaye yiwa ya ndi sokoluisa Ocisonehua cimue cavelapo cokuti: Yehova o yongola okuti vosi yetu tu vumba “lesanju” kuenda ‘oku imba ovisungo.’—Osa. 100:2.
NDA FETIKA OKU SOLA VALI UPANGE WOKU KUNDA
Nda yonguile oku kuata esanju ndeli lia manji Tamara, pole, oco ndi li kuate, nda sukilile oku linga apongoloko alua. Cambata otembo pole kamue kamue nda fetika oku linga apongoloko. Nda fetika oku pongaya ovipama viupange woku kunda kuenda olonjanja vimue nda talavaya ndukundi wa sokamo. Eci ca ñuatisa oku yula usumba kuenje nda fetika oku kuata utõi. Nda enda oku talavaya calua Lembimbiliya kupange woku kunda kuenda nda fetika oku kuata esanju lialua. Noke olosãi viosi nda fetika oku talavaya ndukundi wa sokamo.
Nda fetika oku nõla akamba vakuavitunga viosi okuti va pama kespiritu kuenda va solele upange wa Yehova. Ongangu yavo yiwa ya ndi kuatisa oku nõla ovina via velapo nda sukilile oku linga kuenda oku fetika oku tanga Embimbiliya eteke leteke. Nda fetika oku sola calua upange woku kunda kuenje ka pa pitile otembo yalua nda litumbika kupange wakundi votembo yosi. Onjanja yatete noke lianyamo alua oku fetika oku kuata esanju loku lianja vekongelo.
NDA SANGA EKAMBA OKUTI UKUNDI WOTEMBO YOSI
Noke liunyamo umosi, nda kũlĩha Alex manji umue womboka haye uwa wa solele Yehova kuenda upange woku kunda. Eye oñuatisi yekongelo kuenda wa kala kupange wakundi votembo yosi anyamo epandu. Manji Alex wa talavayavo otembo yimue kocikanjo kuli esukila liakundi ko Malawi. Pocitumãlo caco, wa kuatele ukamba lolomisionaliu okuti va kala vakuangangu yiwa kokuaye kuenda vo vetiya oku pitisa kovaso upange Wusoma.
Kunyamo 2003, nda kuela la Alex kuenda tua amamako kupange wakundi votembo yosi. Tua siata oku lilongisa ovina vialua viwa kuenda Yehova wa siata oku tu sumũlũisa volonjila vialua.
YEHOVA WA NDI SUMŨLŨISA CALUA
Kupange woku kunda kolupale luo Gleno, ko Timor-Leste
Kunyamo 2009 tua tumiwa ndolomisionaliu ko Timor-Leste olupale lumue lutito ko Arquipélago Indonésio. Tua komõha calua, tua kuata esanju kuenda usumba vonjanja yimuamue. Noke lilosãi vitãlo tua linga ungende woku enda volupale lio Dili.
Oku iluka kua pongolola ekalo liomuenyo wetu. Tua sukilile oku ikisa ocituwa cokaliye, elimi, okulia kuenda ekalo liomuenyo. Kupange woku kunda olonjanja vialua tua sanga omamu valua olohukũi, ka va tangele calua kuenda va kala oku liyaka lovitangi. Omanu valua va kala oku tala ohali ketimba kuenda kovisimĩlo, omo liuyaki kuenda ungangala. *
Upange woku kunda wa kala oku enda ciwa! Ndeci onjanja yimue nda sanga kafeko umue o kuete 13 kanyamo o tukuiwa Maria, * okuti wa sumuile calua. Ka pa pitile otembo yalua tunde eci ina yaye a fa kuenda eye ka moli isiaye olonjanja vialua. Ndeci omãla valua, Maria ka kũlĩhĩle eci a linga komuenyo. Ndivaluka onjanja yimue eci eye a kala oku lila poku lombolola ndomo eye a liyevite. Pole, sia kuatele elomboloko lieci a kala oku lombolola omo sia tẽlele oku vangula ciwa elimi liaye. Nda likutilila ku Yehova oco a ñuatise oku u lembeleka kuenje nda fetika oku u tangela ovisonehua vielembeleko. Vanyamo akuamamo nda limbuka okuti ocili ca fetika oku pongolola ovituwa via Maria, kuenda ekalo liomuenyo waye wosi. Eye wa papatisiwa kuenda cilo wa siata oku songola alilongiso Embimbiliya. Cilo Maria, wa tiamẽla vepata linene liafendeli va Yehova kuenda o liyeva okuti o soliwe.
Yehova o kasi oku sumũlũisa upange ko Timor-Leste. Vanyamo ekũi a sulako, akundi valua va siata oku papatisiwa, valua akundi votembo yosi, oloñuatisi viekongelo kuenda akulu vekongelo. Vakuavo va talavaya voseketa yoku pongolola kuenda va kuatisa oku pongolola alivulu atiamẽla Kembiliya kelimi liopocitumãlo. Ci ndi sanjuisa calua oku va mola ndomo ovo va imba kolohongele, oku mola esanju liavo kuenda oku mola ndomo va kula konepa yespiritu.
Ame la Alex tu kasi oku enda kocikanjo cimue kuli esukila liakundi oku eca ovikanda vioku laleka omanu oku enda Kocipito Conjivaluko
SIA LA SIMA OKUTI NDI KA KUATA ESANJU NDELI KOMUENYO
Ekalo liomuenyo wetu ko Timor-Leste wa litepele calua lowu wo ko Australia, pole, sia simile okuti ndi ka kuata esanju lialua. Olonjanja vimue tua enda oku londa vokalela kamue katito mue yuka omanu vambata ombisi yakukuta, lolonjeke viamela oku landisa pocitanda. Oloneke vimue tua enda oku songola alilongiso Embimbiliya volonjo mu linga owuya walua, muli elemba, osi yaco ka ya sementaliwile kuenda olosanji vi ñuala ñuala. Ndaño lovina evi, nda enda oku popia ndoco, ‘Eci ci komõhisa!’
Vonjila yoku enda kocikanjo cetu
Eci ndi sokolola konyima, ndi pandula olonjali viange via likolisilako oku ndongisa olonjila via Yehova kuenda oku ndi kuatisa eci ukamba wange la Yehova wa honguele. Elivulu Liolosapo 22:6, lia tẽlisiwa vokuange. Isiange la Inange, va sanjuka poku mola ame la Alex oku vumba Yehova. Tunde kunyamo 2016 tu kasi kupange woku nyula akongelo ko Australia.
Oku lekisa ovideo ya Kalembe la Sofiya komãla vamue va sanjuka ko Timor-Leste
Ca tĩla oku tava okuti onjanja yimue esanju liange kupange woku kunda lia tepulukile. Cilo ndi sole upange woku kunda! Ndaño tu pita lovitangi vialua vomuenyo wetu, esanju liocili li tunda koku vumba Suku lutima wosi. Anyamo 18 tu kasi vupange wa Yehova la Alex, anyamo esanju lialua vomuenyo wange. Cilo ndi kuete elomboloko liolondaka ukualosamo Daviti a sapuila Yehova hati: “Vosi puãi, vakuakuwunda kokuove, va yolele. Va kaluke hũ lonjolela. . . . Ava va sole onduko yove va ku yolela.”—Osa. 5:11.
Kuli esanju lialua oku longisa Embimbiliya komanu vana okuti ambombe!
^ Ovinimbu 21 Oku upisa unyamo 1975 ko Timor-Leste kua pita uyaki vokuenda kuanyamo akũi avali, omo omanu va yonguile eyovo.
^ Ovinimbu 22 Onduko ya pongoluiwa.
