Embimbiliya li popia okuti, Suku o yongola okuti omanu va “yuvula evĩho liukahonga.” (1 Va Tesalonike 4:3) Ndomo ca tukuiwa Vembimbiliya vondaka “evĩho liukahonga” mua kongela ukahokolo, oku lipekela kuomanu vakuavimatamata vimuamue kuenda oku lipekela kulume lukãi okuti ka va kuelele.

•  Momo lie Suku a kapelako nda olohueli via tokekisa olohuela viavo ale sio?

•  Nye ci popiwa kulume lukãi va kasi pamosi osimbu ka va kuelele oco va seteke nda va kuete ovisimĩlo vimuamue ale sio?

•  Olohueli vi pondola oku kuata ndati olohuela via pama?

•   Suku eye usovoli wolohuela. Eye wa sovola olohuela viatete eci a tokekisa pamisi ulume watete kuenda ukãi watete. (Efetikilo 2:22-24) Eye ka yongola okuti ulumue lukãi va kala pamosi osimbu ka va kuelele.

•   Suku wa kũlĩha eci ciwa komanu. Eye wa sokiya olohuela viulume lukãi oco vi kale vomunga otembo ka yi pui, locimaho coku likuatisa kuenda oku teyuila vosi vepata. Kũlĩhĩsa ocindekaise eci. Ndeci ukuakupanga ocikuata cimue a eca olonumbi vi lekisa ndomo ocikuata caco ci talavaya, olonumbi via Suku vi tu longisa oku tunga epata limue li kuete esanju. Olonumbi via Suku vi kuatisa vosi vana va vi kuama.—Isaya 48:17, 18.

•   Oku lipekela osimbu okuti omanu ka va kuelele ci koka ovitangi vialua. Ndeci, ci koka oku minisiwa lonjila yimue okuti omunu ka kapeleleko, ci koka ovovei a sambuka kuenda ovitangi vowoño. a

•   Suku wa eca uloño kulume kuenda kukãi woku cita omãla poku lipekela. Omuenyo u kola ku Suku kuenda uloño woku cita, ombanjaile yimue yi kuete esilivilo. Suku o yongola okuti, tu tata ombanjaile yaco lesumbilo ndomo ci likuata lolohuela.—Va Heveru 13:4.

 Osapi yoku kuata esanju volohuela “hakukuatako otembo yoku seteka” oco olohueli vi litepe okuti ka pa kala ohuminyo layimue. Handi vali, oco pokati kolohueli pa kale ukamba wesanju, ulume lukãi va sukila oku pamisa ukamba wavo kuenda oku talavayela kumosi oco va tẽle oku tetulula ovitangi. b Olohuela vi pamisa ohuminyo.—Mateo 19:6.

 Ka kuli olohueli via li pua. Pole, olohueli vi pondola oku kuata olohuela viesanju poku kuama olonumbi Viembimbiliya. Kũlĩhĩsa ovolandu amue:

•   Pitisa kovaso olojongole viohueli yove.—1 Va Korindo 7:3-5; Va Filipoi 2:3, 4.

•   Oku lekisa ocisola kuenda esumbilo komunu lukuavo.—Va Efeso 5:25, 33.

•   Kũlĩhĩsa ovina ovangula.—Olosapo 12:18.

•   Kala ukuepandi kuenda kala ukuajanga koku ecela.—Va Kolosa 3:13, 14.