Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tenuare 2014

Ta ’u i faaoti i to ’u tamariiraa!

Ta ’u i faaoti i to ’u tamariiraa!

I to ’u tamariiraa

I 1985, hoê ahuru to ’u matahiti a haere mai ai te tahi mau tamarii no Cambodge i ta ’u fare haapiiraa i Columbus, Ohio, Marite. Ma te tahi noa parau na roto i te reo Beretane e hoho‘a ta ’na i papai, ua faatia mai te tahi tamaroa i te mau hamani-ino-raa, haapoheraa taata e horo-ê-raa riaria mau i to ratou fenua. I te po, e ta‘i au i te mana‘o-noa-raa i tera mau tamarii. Ua tamata vau i te faataa i te tiaturiraa o te paradaiso e te tia-faahou-raa, aita râ ratou i taa i ta ’u i parau atu. Noa ’tu e tamarii noâ vau, ua faaoti au e haapii i te reo Cambodgien ia ite to ’u mau hoa haapiiraa o vai Iehova. Aita vau i mana‘o noa ’‘e e e taui roa to ’u oraraa i tera faaotiraa!

E ere i te mea ohie ia haapii i te reo Cambodgien! E piti taime, ua mana‘o vau e taora i te tauera, ua tauturu mai râ Iehova na roto i to ’u na metua. I muri a‘e, ua faaitoito mai to ’u mau hoa e orometua i te tapi i te toroa aufau-maitai-hia. I hinaaro na râ vau e riro ei pionie, ua maiti ïa vau i te haapii i te tahi toroa ia noaa ta ’u ohipa afa mahana. I muri a‘e i te tau haapiiraa, ua poro vau e te tahi mau pionie e ua haapii atoa ia vetahi ê i te reo Beretane. Ma te na reiraraa, ua faufaa-roa-hia vau i muri a‘e!

I te 16raa o to ’u matahiti, ua faarooroo vau e te vai ra te hoê pǔpǔ na roto i te reo Cambodgien i te tahi amuiraa i Long Beach, Kalifonia, Marite. Ua turu vau i tera pǔpǔ e mea na reira to ’u iteraa i te taio i te papai Cambodgien. I muri iti a‘e i te noaaraa mai ta ’u parau tuite, ua riro vau ei pionie e ua tamau i te poro i te feia tapiri mai i to ’u fare e paraparau ra i te Cambodgien. I te 18raa o to ’u matahiti, ua mana‘o vau e reva i Cambodge. Noa ’tu e e fenua atâta tera, ua taa ia ’u e e mea tia ia ite na ahuru mirioni taata o tera fenua i te parau apî oaoa o te Basileia. I tera tau, hoê noa amuiraa e e 13 taata poro i reira. I te 19raa o to ’u matahiti, ua reva vau i Cambodge e e piti matahiti i muri a‘e, ua faaoti e noho roa i reira. Ia nehenehe noa vau e poro, ua noaa mai ta ’u ohipa afa mahana, te huriraa ïa na roto i te reo Beretane e te haapiiraa ia vetahi ê i tera reo! I muri a‘e, ua itea ia ’u i te tahi hoa faaipoipo e tapi atoa ra i te hoê â fa mai ia ’u. Ua oaoa mâua i te tauturu e rave rahi taata i Cambodge ia riro ei Ite no Iehova.

Ua horoa mai Iehova i ‘ta to ’u aau e hinaaro ra.’ (Sal. 37:4) O te pororaa te toroa faahiahia e oaoa roa ’‘e! E 16 matahiti i teie nei to ’u oraraa i Cambodge. Na mua ’‘e, e 13 noa taata poro, i teie nei râ, e 12 ïa amuiraa e e 4 pǔpǔ taata poro ta Iehova!—Faatiaraa a Jason Blackwell.