Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tenuare 2014

Ta te Basileia i rave i na 100 matahiti faatereraa

Ta te Basileia i rave i na 100 matahiti faatereraa

‘E ohipa rahi e te faahiahia ta oe, e te Fatu ra e Iehova, te Arii.’—APO. 15:3.

1, 2. (a) Eaha ta te Basileia o te Atua e rave? (b) No te aha tatou e papu ai e e tae mai te Basileia?

I TE matahiti 31, i nia i te hoê mou‘a i pihaiiho ia Kaperenaumi, ua haapii Iesu Mesia i ta ’na mau pǐpǐ ia pure: “Ia tae to oe ra hau,” aore ra Basileia. (Mat. 6:10) Te mana‘o nei e rave rahi e eita paha te Basileia e tae mai. Ua papu râ ia tatou e e pahonohia iho â ta tatou mau pure haavare ore ia tae mai te Basileia o te Atua.

2 Te opuaraa a Iehova, o te faaohiparaa ïa i te Basileia no te tahoê i to ’na utuafare i nia i te ra‘i e i nia i te fenua. E tupu iho â te reira. (Isa. 55:10, 11) Ia au i te mau mea faahiahia tei tupu i na 100 matahiti i mairi, ua riro ê na o ’na ei Arii! Te rave nei te Atua i te mau ohipa rahi e te faahiahia no ta ’na mau mirioni tavini taiva ore. (Zek. 14:9; Apo. 15:3) Mea taa ê râ te riroraa mai Iehova ei Arii e te taeraa mai o te Basileia o te Atua ta Iesu i haapii mai ia pure. Eaha te taa-ê-raa? E ia aha tatou?

E OHIPA MAI TE ARII FAATOROAHIA E IEHOVA

3. (a) Afea Iesu i te ariiraa mai e ihea? (b) E nafea oe e haapapu ai e ua haamauhia te Basileia i 1914? (A hi‘o i te nota i raro i te api.)

3 I te pae hopea o te mau matahiti 1800, ua taa-maitai-hia ’tu â te parau tohu ta Daniela i papai a 2 500 matahiti a‘enei: “Ia tae i te anotau o taua mau arii ra, e faatupu ai te Atua o  te ra‘i ra i te hoê basileia, o te ore roa ïa e mou.” (Dan. 2:44) Tau ahuru matahiti te Feia haapii Bibilia i te faaiteraa e e riro 1914 ei matahiti faufaa. Ua parau te hoê taata papai e e riro tera matahiti ei matahiti e manuïa ’i te mau mea atoa. Tera atoa te mana‘o o te taata e rave rahi. I tera noa râ matahiti, ua haamata te Tama‘i rahi Matamua e ua tupu te parau tohu Bibilia. Ua haapapu te o‘e, te aueueraa fenua, te ma‘i rahi e te tahi atu mau parau tohu Bibilia tei tupu i muri iho e ua haamata Iesu Mesia i te faatere i nia i te ra‘i ei Arii o te Basileia o te Atua i 1914. * Ma te faatoroa i ta ’na Tamaiti ei Arii Mesia, ua riro atoa mai Iehova ei Arii i roto i te tahi atu tuhaa!

4. Eaha te ohipa matamua ta te Arii faatoroa-apî-hia i rave, e o vai ma ta ’na i haapao i muri iho?

4 Te ohipa matamua i ravehia e te Arii faatoroa-apî-hia e te Atua, o te aroraa ïa ia Satani, te enemi rahi o to ’na Metua. Huri maira Iesu e ta ’na mau melahi i te Diabolo e ta ’na mau demoni atoa i te fenua nei. Oaoa roa a‘era to te ra‘i, area to te fenua nei, ua ati ïa mai tei ore i itehia a‘enei. (A taio i te Apokalupo 12:7-9, 12.) I muri iho, haapao maira te Arii i ta ’na mau pǐpǐ i te fenua nei no te tamâ, te haapii e te faanaho ia ratou no te rave i te hinaaro o te Atua. Ua farii ratou i te reira, a vaiiho mai ai i te hi‘oraa maitai.

E TAMÂ TE ARII MESIA I TA ’NA MAU PǏPǏ TAIVA ORE

5. Teihea huru tamâraa tei tupu i rotopu 1914 e te omuaraa 1919?

5 I muri a‘e i to Iesu tamâraa i te ra‘i i te mana ino o Satani e ta ’na mau demoni, ua faaue Iehova ia Iesu ia hi‘opoa e ia tamâ i ta ’na mau pǐpǐ i te fenua nei i te pae varua. E tamâraa pae varua teie mai ta te peropheta Malaki i faataa. (Mal. 3:1-3) Ia au i te tuatapaparaa, ua tupu te reira i rotopu 1914 e te omuaraa 1919. * No te riro ei melo o te utuafare o Iehova, e titauhia ia mâ, aore ra ia mo‘a, tatou. (Pet. 1, 1:15, 16) Eiaha roa ta tatou haamoriraa ia viivii i te haapaoraa hape aore ra i te poritita a teie nei ao.

6. E nafea te maa varua e operehia ’i, e no te aha mea faufaa roa ’i te reira?

6 I muri iho, ua faaohipa Iesu i to ’na mana faatere no te faatoroa i te hoê “tavini haapao maitai e te paari.” E opere tamau teie tavini i te maa maitai i te pae varua na te feia atoa o te nǎnǎ hoê roa a Iesu. (Mat. 24:45-47; Ioa. 10:16) Mai 1919 mai, ua haapao maitai te hoê pǔpǔ iti taeae faatavaihia i te hopoia rahi e faatamaa i te “utuafare.” Te operehia nei ïa te maa varua na roto i teie pǔpǔ iti ia rahi mai to tatou faaroo. E ia faaoti atu â tatou ia vai mâ noa i te pae varua, i te pae morare, i te pae feruriraa e i te pae tino. E haapii e e faaineine atoa teie maa varua ia tatou ia rave hope i te ohipa faufaa roa ’‘e i te fenua nei. Te haafaufaa ra anei oe i teie mau faanahoraa?

E HAAPII TE ARII I TA ’NA MAU PǏPǏ IA PORO NA TE AO

7. (a) Eaha te ohipa faufaa ta Iesu i haamata i te rave i te fenua nei? (b) E tamau noa teie ohipa e tae roa ’tu i teihea taime?

7 I to Iesu haamataraa i ta ’na taviniraa i te fenua nei, ua na ô oia: “E parau haere â vau i te parau maitai o te basileia o te Atua i te mau oire ê atu â e tia ’i, i tonohia mai ai hoi au.” (Luka 4:43) E toru matahiti e te afa teie taviniraa i te riroraa ei ohipa faufaa roa o to ’na oraraa. Ua  faaue oia i ta ’na mau pǐpǐ ia poro haere e ua fatata mai te Basileia o te ra‘i. (Mat. 10:7) I muri a‘e i to ’na tia-faahou-raa, ua tohu Iesu e e haaparare ta ’na mau pǐpǐ i teie poroi “e tae noa ’tu i te hopea o te fenua.” (Ohi. 1:8) Ua fafau oia ia ratou e e turu roa ’tu oia i teie ohipa faufaa mau e tae roa mai i teie mahana.—Mat. 28:19, 20.

8. Mea nafea to te Arii faaitoitoraa i ta ’na mau pǐpǐ i te fenua ia poro?

8 I 1919 te faataaraahia eaha ’tu â te parau apî oaoa o te Basileia. (Mat. 24:14) Te faatere ra te Arii i nia i te ra‘i e i haaputu na oia i te hoê pǔpǔ iti pǐpǐ tamâhia i te fenua nei. Ua farii ratou ma te aau tae i ta Iesu faaueraa e poro i te parau apî oaoa o te Basileia o te Atua e ati a‘e te fenua! (Ohi. 10:42) Ei hi‘oraa, i Tetepa 1922, fatata e 20 000 taata no te fenua rau tei tairuru i Cedar Point, i Marite. Mea turu ratou i te Basileia. Eaha râ paha ratou i te oaoa i to taeae Rutherford horoaraa i te oreroraa parau “Te Basileia” e to ’na parauraa: “Inaha, te faatere ra te Arii! E vea outou na ’na. No reira, a poro, a poro, a poro i te Arii e to ’na basileia!” E piti tausani o ratou tei apiti atu i te hoê “Mahana pororaa” taa ê, ma te haere e poro e 72 kilometera i te atea i te vahi tairururaa. Ua parau te hoê taeae e e ore roa e moe ia ’na te poroi e poro i te Basileia e te itoito rahi o te feia i tairuru mai. E ere o ’na ana‘e tei parau mai tera.

9, 10. (a) Eaha tei faanahohia no te faaineine i te feia poro i te Basileia? (b) Eaha te maitai ta outou taitahi i huti mai i teie faaineineraa?

9 I 1922, hau atu i te 17 000 taata e poro ra i te Basileia i e 58 fenua i te ao nei. Ua hinaarohia râ te tahi faaineineraa. I te senekele matamua, ua horoa te Arii maitihia i te tahi mau aratairaa papu maitai i ta ’na mau pǐpǐ: eaha te poro, ihea e e nafea. (Mat. 10:5-7; Luka 9:1-6; 10:1-11) I teie mahana atoa, te haapao nei Iesu e ia fana‘o te feia poro atoa i te Basileia i te mau aratairaa e ravea ia aravihi ratou i roto i te pororaa. (Tim. 2, 3:17) No te faaineine i ta ’na mau pǐpǐ no te taviniraa, te faaohipa nei Iesu i te amuiraa Kerisetiano. Te hoê ravea, o te Haapiiraa no te taviniraa Kerisetiano ïa i roto hau atu i te 111 000 amuiraa i te ao nei. Maoti teie haapiiraa e aravihi ai hau atu i te hitu mirioni taata no te poro e te haapii i te “taata atoa” ma te aau tae.—A taio i te Korinetia 1, 9:20-23.

10 Te vai ra te tahi atu â mau haapiiraa no te faaineine i te mau matahiapo o te amuiraa, te mau pionie, te mau taeae taa  noa, te mau taeae faaipoipo e ta ratou vahine, te mau melo o te Tomite amaa e ta ratou vahine, te mau tiaau ratere e ta ratou vahine e te mau mitionare. * Teie ta te mau piahi o te hoê piha Haapiiraa Bibilia no te mau taeae faaipoipo e ta ratou vahine i parau ma te mauruuru: “Maoti teie faaineineraa taa ê, ua rahi atu â to matou here no Iehova e ua ineine maitai a‘e matou i te tauturu ia vetahi ê.”

11. Noa ’tu te mau patoiraa, mea nafea te mau Kerisetiano i te tamau-noa-raa i te poro?

11 Te ite ra te enemi ra o Satani i te mau tutavaraa rahi e ravehia ra no te poro e te haapii i te parau apî o te Basileia ia vetahi ê. No te tapea i te reira, te patoi tia ’tu nei oia aore ra ma te haavarevare i te poroi o te Basileia e i te feia poro. Eita râ te enemi e manuïa. Ua haaparahi Iehova i ta ’na Tamaiti “i nia ê roa i te mau arii, e te feia mana, e te puai, e te rahi.” (Eph. 1:20-22) Ei Arii, e faaohipa Iesu i to ’na mana no te paruru e no te aratai i ta ’na mau pǐpǐ. E papu ïa ia ’na e te ravehia ra te hinaaro o to ’na Metua. * Te porohia ra te evanelia e e mirioni taata aau tae o tei haapiihia e nafea ia haamori ia Iehova. E fana‘oraa taa ê mau â te apitiraa i tera ohipa rahi!

E FAANAHO TE ARII I TA ’NA MAU PǏPǏ IA PORO ATU Â

12. A faataa na i te tahi mau faatanoraa i ravehia mai te haamauraahia te Basileia.

12 Mai te haamauraahia te Basileia i 1914, ua rave te Arii i te mau faatanoraa no nia i te huru faanahoraa a te mau tavini a te Atua no te rave i te hinaaro o to ’na Metua. (A taio i te Isaia 60:17.) I 1919, ua faatoroahia i roto i te amuiraa taitahi te hoê taeae no te haapao i te pororaa. I 1927, ua faanahohia te pororaa i tera i tera fare i te mau Tapati atoa. I 1931, ua amo te mau tavini a te Atua i te i‘oa Bibilia Ite no Iehova a itoitohia ’tu ai i te poro atu â i te Basileia. (Isa. 43:10-12) I 1938, e riro mai te hoê taeae ei tiaau ia faaî o ’na i te mau titauraa Bibilia, aita e maitiraa faahou. I 1972, e ere faahou na te hoê noa tiaau e aratai i te amuiraa, na te hoê tino matahiapo râ. Ua faaitoitohia te mau taeae atoa o te faaî ra i te mau titauraa ia ‘faaamu i te nǎnǎ a te Atua i roto ia ratou.’ (Pet. 1, 5:2) I 1976, ua faanahohia te Tino aratai ei ono  tomite o te tiaau i te ohipa a te Basileia na te ao. Oia mau, ua faanahonaho mǎrû noa te Arii ta Iehova i maiti i ta ’na mau pǐpǐ ia haa ia au i to te Atua hinaaro.

13. A 100 matahiti i teie nei te Basileia i te faatereraa, eaha ïa ta oe i faaoti i te rave?

13 A feruri na i ta te Arii Mesia i rave i na 100 matahiti matamua o ta ’na faatereraa. Ua tamâ o ’na i te hoê nunaa no to Iehova i‘oa. Ua aratai o ’na i te pororaa i te parau apî maitai o te Basileia i roto e 239 fenua. Ua haapii o ’na e mirioni taata e nafea ia haamori ia Iehova. Ua tahoê o ’na hau atu e hitu mirioni pǐpǐ taiva ore o te horoa nei ia ratou iho no te rave i te hinaaro o to ’na Metua. (Sal. 110:3) E ohipa rahi iho â e te faahiahia ta Iehova e rave ra na roto i te Basileia Mesia. E tupuraa faahiahia ’tu â râ te tiai ra ia tatou!

HAAMAITAIRAA NO A MURI A‘E A TE BASILEIA MESIA

14. (a) Eaha ta tatou e ani nei i te Atua a pure ai ia tae mai to ’na Basileia? (b) Eaha ta tatou irava matahiti 2014, e no te aha ua tano maitai ai te reira?

14 Ua faariro Iehova i ta ’na Tamaiti o Iesu ei Arii Mesia i 1914. E ere râ te reira i te pahonoraa taatoa o ta tatou pure ia tae mai to ’na Basileia. (Mat. 6:10) Ua tohu te Bibilia e e ‘arii mai Iesu i rotopu i to ’na mau enemi.’ (Sal. 110:2) Te patoi noa ra te mau faatereraa taata i raro a‘e i te mana o Satani i te Basileia. A pure ai ia tae mai to te Atua Basileia, te ani nei tatou i te Atua ia haamou te Arii Mesia e to ’na mau arii apiti i te mau faatereraa taata e i te feia patoi i te Basileia. I reira ïa e tupu ai te Daniela 2:44. Oia hoi, ‘e hope roa taua mau basileia ra i te parari e i te pau’ i te Basileia o te Atua. E haamou-roa-hia ïa te mau faatereraa e patoi ra i te Basileia. (Apo. 6:1, 2; 13:1-18; 19:11-21) Fatata roa te reira i te tupu. Tano maitai iho â ïa te Mataio 6:10 ei irava matahiti 2014: Ia tae mai te Basileia o te Atua. A 100 ïa matahiti te Basileia o te Atua i te haamauraahia i nia i te ra‘i!

Ta tatou irava matahiti 2014: Ia tae mai te Basileia o te Atua.—Mataio 6:10

15, 16. (a) Eaha te mau tupuraa faahiahia e itehia i te roaraa o te Faatereraa tausani matahiti? (b) Eaha te ohipa hopea ta Iesu e rave ei Arii Mesia, e eaha te auraa no te opuaraa a Iehova?

15 E haamou na mua te Arii Mesia i to te Atua mau enemi. Ia oti, e huri o ’na ia Satani e ta ’na mau demoni i roto i te abuso hoê tausani matahiti. (Apo. 20:1-3) I te mea e aita faahou tera mana ino, e faaohipa oioi te Basileia i te mau maitai o te tusia taraehara o Iesu e e tatara roa i te mau faahopearaa o te hara a Adamu. E faaho‘i mai te Arii i te ora e mirioni taata o te taoto nei i roto i te pohe e e faanaho ia haapiihia ratou no nia ia Iehova. (Apo. 20:12, 13) E riro te fenua taatoa ei paradaiso, mai i te ǒ i Edene, e e naea i te taata taiva ore atoa te tia-roa-raa.

16 A hope ai te Faatereraa tausani matahiti a te Mesia, ua raea te fa a te Basileia Mesia. E faaho‘i ïa Iesu i te Basileia i to ’na Metua. (A taio i te Korinetia 1, 15:24-28.) Aita ïa e faufaa faahou te hoê arai i rotopu ia Iehova e ta ’na mau tamarii i nia i te fenua. E tahoê ta te Atua mau tamaiti i te ra‘i e ta ’na mau tamarii i te fenua nei i to ratou Metua i te ra‘i ei melo o te hoê â utuafare.

17. Eaha ta oe i faaoti papu i te rave no te Basileia?

17 Eaha ta te mau tupuraa faahiahia i na 100 matahiti faatereraa o te Basileia e haapapu maira? Te faatere ra Iehova e e tupu iho â ta ’na opuaraa no te fenua. E tamau ana‘e i te tavini ia ’na ma te taiva ore e i te poro i te Arii e to ’na Basileia. Ua papu ia tatou e fatata Iehova i te pahono i ta tatou pure haavare ore: Ia tae mai te Basileia o te Atua!

^ par. 10 A hi‘o i Ta tatou taviniraa i te Basileia no Atopa 2011, api 4-6, “Te tahi mau haapiiraa i roto i te faanahonahoraa a Iehova.”

^ par. 11 A hi‘o i Te Pare Tiairaa o te 1 no Titema 1998, api 19-22, no nia i te mau upootiaraa i mua i te ture i te fenua rau.