Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TENUARE 2014

Haamori ana‘e ia Iehova te Arii mure ore

Haamori ana‘e ia Iehova te Arii mure ore

‘Ei te Arii mure ore te tura e te hanahana e a muri noa ’tu.’—TIM. 1, 1:17.

1, 2. (a) O vai ‘te Arii mure ore,’ e no te aha e tano ai teie tiaraa i‘oa? (A hi‘o i te hoho‘a matamua.) (b) Mai te aha te huru faatereraa a te Atua e piri atu ai tatou ia ’na?

FATATA e 61 matahiti to te arii Sobhuza II faatereraa i Swaziland. Mea huru maoro ïa no te hoê arii i teie tau. Noa ’tu râ ehia matahiti to teie arii faatereraa, te vai ra te tahi atu arii aita te roaraa o ta ’na faatereraa i taotiahia mai ta te taata. I roto i te Bibilia, e parauhia oia ‘te Arii mure ore.’ (Tim. 1, 1:17) Te faahiti ra te hoê papai salamo i te i‘oa o teie Arii: “O Iehova te arii e a muri noa ’tu.”—Sal. 10:16.

2 Na te roaraa o ta te Atua faatereraa e faataa ê i ta ’na faatereraa i ta te taata. No ta ’na râ huru faatereraa e piri atu ai tatou ia ’na. I faatere na te hoê arii ia Iseraela i tahito ra e 40 matahiti e ua arue oia i te Atua mai teie: “E aroha e te hamani maitai to Iehova; e ore e riri vave, te rahi ra to ’na aroha. Ua haamau Iehova i to ’na ra terono i nia i te mau ra‘i, e ua auraro te mau mea atoa nei i to ’na ra basileia.” (Sal. 103:8, 19) O Iehova to tatou Arii, o ’na atoa râ to tatou Metua, oia hoi to tatou Metua î i te here i te ra‘i. Teie ïa e piti uiraa: Mea nafea Iehova i haa ’i mai te hoê Metua? Mea nafea to ’na faaohiparaa i to ’na mana arii mai te orureraa i Edene mai â? Ia ite tatou i te pahonoraa o teie na uiraa e piri roa ’tu  â ’i tatou ia Iehova, a haamori atu ai ia ’na ma to tatou aau atoa.

E POIETE TE ARII MURE ORE I TE HOÊ UTUAFARE

3. O vai te melo matamua o to Iehova utuafare o te ao taatoa, e o vai ma ’tu â tei poietehia ei “tamarii” na te Atua?

3 Papu maitai e ua oaoa roa Iehova i to ’na poieteraa i ta ’na Tamaiti matahiapo! Aita te Atua i hi‘o ia ’na mai te hoê melo haihai. Ua here râ ia ’na mai te hoê Tamaiti e ua ani atu ia apiti mai i te ohipa oaoa e poiete i te tahi atu mau melo tia roa. (Kol. 1:15-17) O te mau miria e miria ïa melahi, e “tavini” ra i te Atua ma te oaoa no te ‘rave i to ’na hinaaro.’ Parauhia ratou e te Atua ta ’na mau “tamarii.” E haamaitairaa teie. E melo ïa ratou no to Iehova utuafare o te ao taatoa.—Sal. 103:20-22; Ioba 38:7.

4. Mea nafea to te taata riroraa ei melo o te utuafare o te Atua?

4 I muri a‘e i to ’na poieteraa i te ra‘i e te fenua, ua rahi atu â to Iehova utuafare. Faaineine ihora oia i te fenua ei nohoraa nehenehe e te naho maitai. E poiete atura i te taata matamua ra o Adamu ma to ’Na huru. (Gen. 1:26-28) Mea tano iho â ia auraro Adamu ia Iehova, o ’na hoi te Atua Poiete. Horoa ’tura Iehova, mai te hoê Metua, i ta ’na mau aratairaa atoa ma te here e te hamani maitai. Aita roa ’tu te reira i taotia roa ino i te tiamâraa o te taata e maiti.—A taio i te Genese 2:15-17.

5. Eaha ta te Atua i rave ia î te fenua i ta ’na mau tamarii taata?

5 E ere Iehova mai e rave rahi arii taata. E hi‘o oia i ta ’na mau tavini mai te mau melo o to ’na utuafare. Mea tiaturi na ’na ia ratou, a oaoa ’tu ai oia i te horoa ’tu i te hopoia. Ei hi‘oraa, ua horoa oia na Adamu i te mana i nia i te mau animara e na ’na e horoa ’tu i to ratou i‘oa. Mea au teie ohipa e te anaanatae. (Gen. 1:26; 2:19, 20) Aita te Atua i poiete e mirioni taata tia roa ia î te fenua. Ua maiti oia i te poiete ia Eva, te hoê apiti tia roa no Adamu. (Gen. 2:21, 22) Nehenehe atura raua e faaî i te fenua i ta raua mau tamarii. No te mea e oraraa maitai roa, e nehenehe ïa ratou e faariro i te fenua taatoa ei paradaiso a mairi ai te tau. Ei utuafare, e haamori ïa te mau taata e te mau melahi atoa ia Iehova e a muri noa ’tu. E tiaturiraa faahiahia mau â teie, o te faaite ra i to Iehova here metua!

E ORURE HAU TE TAHI MAU TAMARII I TE ATUA TO RATOU ARII

6. (a) Mea nafea te tupuraa te orureraa hau i roto i te utuafare o te Atua? (b) Eaha te faaite maira e o Iehova noa iho â te Faatere?

6 Tera noa râ, aita Adamu raua Eva i farii e o Iehova to raua Arii. Ua maiti raua i te pee ia Satani, te hoê tamaiti varua o tei patoi i te Atua. (Gen. 3:1-6) Roohia ’tura raua e to raua huaai i te oto, te mauiui e te pohe. (Gen. 3:16-19; Roma 5:12) Aita ’tura ïa ta te Atua e tavini auraro i te fenua nei. Te auraa anei râ e aita oia e faatere faahou ra i te fenua e te mau taata i nia iho? E ere roa ’tu! Ua faaohipa oia i to ’na mana faatere ma te tiavaru ia Adamu raua Eva i rapae i te ô i Edene, a tuu atu ai i te kerubi ei tiai i te uputa. (Gen. 3:23, 24) I taua atoa taime ra, ua faaite te Atua i to ’na here metua. Ua haapapu oia e e tupu iho â ta ’na opuaraa e haamau i te hoê utuafare melahi e taata taiva ore. Ua fafau atoa oia e na te hoê “huaai” e haamou ia Satani e e faaore i te ino i tupu no te hara a Adamu.—A taio i te Genese 3:15.

7, 8. (a) Mai te aha te oraraa i te tau o Noa? (b) Eaha ta Iehova i rave no te tamâ i te fenua e no te paruru i te huitaata?

 7 I te roaraa o na hanere matahiti i muri mai, ua maiti te tahi mau taata, mai ia Abela raua Enoha, e tapea i to ratou taiva ore ia Iehova. Area te rahiraa, aita ïa i hinaaro ia Iehova ei Metua e ei Arii no ratou. I te tau o Noa, “ua î te fenua i te parau-tia ore,” aore ra haavîraa u‘ana. (Gen. 6:11) Te auraa anei ïa e aita Iehova e haapao faahou ra i te taata? Eaha ta te Bibilia e parau ra?

8 A hi‘o na i te aamu o Noa. Ua horoa ’tu Iehova i te mau aratairaa papu maitai e nafea ia hamani i te hoê araka rahi, e ora ’i Noa e to ’na utuafare. Ua faaite atoa oia i to ’na here rahi no te huitaata taatoa i to ’na tonoraa ia Noa e poro i te parau-tia. (Pet. 2, 2:5) Ua faaara Noa i te taata e ua fatata te haamouraa, ia tatarahapa ïa ratou. Aita râ hoê i faaroo. E rave rahi matahiti to Noa e to ’na utuafare oraraa i roto i te hoê ao haavî u‘ana e te faufau roa. Ua paruru e ua haamaitai Iehova, mai te hoê Metua î i te here, i teie na toovau taata. I to ’na faataeraa mai i te diluvi, ua faaite Iehova i te mau taata orure hau e i te mau melahi ino e o ’na te Faatere.—Gen. 7:17-24.

Ua faaite noa iho â Iehova e o ’na te Faatere (A hi‘o i na paratarafa 6, 8, 10, 12, 17)

TA IEHOVA FAATERERAA I MURI A‘E I TE DILUVI

9. Eaha ta te huitaata i nehenehe e rave i muri a‘e i te diluvi?

9 I to Noa e to ’na utuafare haereraa mai i rapae i te araka, papu maitai e ua mauruuru roa ratou ia Iehova no to ’na haapaoraa e parururaa ia ratou. Hamani oioi ihora Noa i te hoê fata e pûpû atura i te tusia no te haamori ia Iehova. Haamaitai ihora te Atua ia Noa e to ’na utuafare e parau atura ia ratou ia ‘fanau i te tamarii, ia rahi ratou e ia î te fenua.’ (Gen. 8:20–9:1) Nehenehe atura ïa te huitaata e hoê faahou i roto i te haamoriraa ia Iehova e e faaî i te fenua.

10. (a) I muri a‘e i te diluvi, ihea e mea nafea to te taata orure-hau-raa ia Iehova? (b) Ua aha Iehova ia tupu iho â to ’na hinaaro?

10 Aita râ te diluvi i faaore i te huru tia ore e te vai noa ra te taata i raro a‘e i te mana itea ore o Satani e o te mau melahi orure hau. Aita i maoro, ua patoi faahou te tahi mau taata i ta Iehova faatereraa î i te here, mai ia Nimeroda te hina a Noa. E ‘haharu rahi oia i mua i te aro o Iehova.’ Ua patu atoa oia i te mau oire rahi, mai ia Babela, e ua faariro ia ’na ei arii “i te fenua ra o Sinara.” (Gen. 10:8-12) Ua tutava oia i te patoi i te opuaraa a te Atua ia “î te fenua.” Ua aha te Arii mure ore i teie arii orure hau? Ua faahuru ê oia i te reo o te taata. Purara ’tura to Nimeroda mau taata tei inoino “i nia i te fenua atoa.” Afai atoa ’tura ratou i ta ratou haapaoraa hape e huru faatereraa.—Gen. 11:1-9.

11. Mea nafea to Iehova faaiteraa i to ’na haapao maitai i to ’na hoa ia Aberahama?

11 I muri a‘e i te diluvi, mea rahi tei haamori i te mau atua hape. Area te tahi mau taata haapao maitai, ua haamori noa ïa ia Iehova, mai ia Aberahama. Ma te auraro ia Iehova, ua faarue oia i to ’na oraraa fana‘o i Ura no te parahi i roto i te fare ie e rave rahi matahiti. (Gen. 11:31; Heb. 11:8, 9) Aita oia i tiaturi i te parururaa a te hoê arii taata aore ra a te mau patu o te hoê oire. Na Iehova ei Metua i paruru ia Aberahama e to ’na utuafare. Teie hoi ta te papai salamo i parau: “Aore [te Atua] i horoa noa ’tu ia ratou ia hamani-ino-hia e te taata ra; e e hui arii hoi tei a‘ohia mai e ana [no] ratou.” (Sal. 105:13,  14) No to ’na haapao maitai i to ’na hoa ia Aberahama, ua fafau Iehova e e hui arii te na roto mai ia ’na.—Gen. 17:6; Iak. 2:23.

12. Mea nafea to Iehova faaiteraa i to ’na mana arii i nia ia Aiphiti, e eaha te faahopearaa i nia i to ’na nunaa?

12 Ua fafau te Atua ia Isaaka, te tamaiti a Aberahama, e ia Iakoba ta ’na mootua e e haamaitai oia ia ratou e e riro mai to ratou huaai ei arii. (Gen. 26:3-5; 35:11) Hou râ a riro mai ai to Iakoba huaai ei arii, i faatîtîhia na ratou i Aiphiti. Te auraa anei ïa e aita Iehova i tapea i ta ’na parau aore ra e ere o ’na faahou te faatere o te fenua? E ere roa ’tu! I te taime ta ’na i faataa, ua faaite Iehova i to ’na puai e mana arii i nia ia Pharao etaeta. No te mau Iseraela tei faatîtîhia, ua tiaturi ratou ia Iehova o tei faaora ia ratou ma te maere rahi i te miti Uteute. Papu maitai ïa e o Iehova noa iho â te Arii o te ao taatoa. Ei Metua î i te here, ua faaohipa oia i to ’na puai rahi no te paruru i to ’na nunaa.—A taio i te Exodo 14:13, 14.

E RIRO IEHOVA EI ARII NO ISERAELA

13, 14. (a) Eaha ta te mau Iseraela i faaite no nia i te faatereraa a Iehova na roto i te hoê himene? (b) Eaha ta Iehova i fafau ia Davida?

13 I muri iti a‘e i to ratou faaora-semeio-raahia mai Aiphiti mai, ua arue Iseraela ia Iehova na roto i te hoê himene upootiaraa. I roto i te Exodo 15:18, te na ô atoa ra tera himene: “Ei ia Iehova te hau e a muri noa ’tu.” Ua riro mau â Iehova ei Arii i nia i te nunaa apî. (Deut. 33:5, Traduction du monde nouveau) No teie râ nunaa, eita e navai e o Iehova to ratou Faatere itea ore. Fatata e 400 matahiti i muri a‘e i to ratou faarueraa ia Aiphiti, ua ani ratou i te Atua ia faaarii i te hoê taata, mai ta te mau nunaa etene tapiri. (Sam. 1, 8:5) Noa ’tu te reira, o Iehova noa iho â te Arii. Ua ite-maitai-hia te reira a faatere ai Davida ia Iseraela.

14 Ua afai Davida i te afata faufaa mo‘a i Ierusalema. I taua mahana oaoa ra, ua arue te mau ati Levi ia Iehova ma te himene e ma te na ô: “Ia parau hia i roto i te mau nunaa e, ua riro te hau i te Fatu,”  aore ra ua riro Iehova ei Arii. (Par. 1, 16:31, Te Bibilia Mo’a V.C.J.S., 1976) I roto i teihea auraa i riro ai oia ei Arii, inaha o ’na te Arii mure ore? I roto ïa i te auraa e e faaohipa oia i to ’na mana arii aore ra e faatoroa oia i te hoê taata ei tia no ’na no te hoê area taime faataahia aore ra no te hoê tupuraa taa maitai. Mea faufaa roa ia taa i te reira. Hou Davida a pohe ai, ua fafau Iehova ia ’na e e vai noa ta ’na faatereraa e a muri noa ’tu. Ua na ô oia: “E faatia [vau] i to oe ra huaai i muri a‘e ia oe ra, no to oe iho na opu, e na ’u e haamau i to ’na ra hau.” (Sam. 2, 7:12, 13) Ua fa mai ïa te “huaai” o Davida e 1 000 tiahapa matahiti i muri a‘e. O vai ïa e afea oia i riro ai ei Arii?

E FAATOROA IEHOVA I TE HOÊ ARII APÎ

15, 16. (a) I teihea taime to Iesu faatavairaahia ei Arii no a muri a‘e? (b) Eaha ta Iesu i rave i te fenua nei no ta ’na faatereraa?

15 I te matahiti 29 o to tatou nei tau to Ioane Bapetizo haamataraa i te poro e ua fatata mai te Basileia o te ra‘i. (Mat. 3:2) I to Iesu bapetizoraahia e Ioane, ua faatavai Iehova ia Iesu ei Mesia fafauhia e ei Arii a muri a‘e o te Basileia o te Atua. Ua faaite roa Iehova i to ’na here metua no Iesu, a na ô ai oia: “Tau Tamaiti here teie, ua mauruuru roa vau ia ’na.”—Mat. 3:17.

16 Ua haamaitai Iesu i to ’na Metua i te roaraa o ta ’na taviniraa. (Ioa. 17:4) Ua poro hoi oia i te Basileia o te Atua. (Luka 4:43) Ua haapii atoa oia i ta ’na mau pǐpǐ ia pure ia tae mai taua Basileia ra. (Mat. 6:10) Ua tia ia ’na, ei Arii no a muri a‘e, ia parau i te feia patoi: “Tei rotopu te Basileia o te Atua ia outou.” (Luka 17:21, Te Faufaa Api) I muri a‘e, i te po hou to ’na poheraa, ua faaau Iesu i te hoê faufaa no te hoê basileia e ta ’na mau pǐpǐ. Te auraa ïa e e riro vetahi o ta ’na mau pǐpǐ taiva ore ei arii e o ’na i roto i te Basileia o te Atua.—Luka 22:28-30.

17. Mea nafea to Iesu haamataraa i te faatere i te matahiti 33? Ua tiai â râ oia i te aha?

17 Afea Iesu e haamata ’i i te faatere ei Arii o te Basileia o te Atua? Eita e tia ia ’na ia haamata oioi. I te taperaa mahana i muri iho, ua haapohehia Iesu e ua purara ta ’na mau pǐpǐ. (Ioa. 16:32) Mai i tahito ra râ, o Iehova noa iho â te Faatere. I te toru o te mahana, ua faatia mai oia i ta ’na Tamaiti mai te pohe mai. E i te Penetekose 33, haamata ’tura Iesu i te faatere i nia i te amuiraa Kerisetiano a to ’na mau taeae faatavaihia. (Kol. 1:13) Ua tiai â râ Iesu ei “huaai” fafauhia i te faatere mai i te fenua. Ua na ô Iehova i ta ’na Tamaiti: “E parahi oe i tau rima atau nei; e ia faarirohia e au to mau enemi ei taahiraa avae no oe.”—Sal. 110:1.

HAAMORI ANA‘E I TE ARII MURE ORE

18, 19. (a) Eaha ta tatou e hinaaro e rave? (b) Eaha ta to muri iho tumu parau e faaite mai?

18 E rave rahi tausani matahiti to te melahi e te taata patoiraa i ta Iehova faatereraa. Aita roa ’tu Iehova i vaiiho i to ’na mana arii. O ’na noa iho â te Faatere. Ua paruru e ua aupuru oia, ei Metua î i te here, i ta ’na mau tavini taiva ore, mai ia Noa, Aberahama e Davida. E hinaaro iho â ïa tatou e auraro i to tatou Arii e e piri atu â ia ’na.

19 E uiui râ paha tatou: E nafea Iehova e riro ai ei Arii i teie mahana? E nafea ia faaite e te turu nei tatou ma te taiva ore i to Iehova Basileia, a riro atu ai ei tamarii tia roa o to ’na utuafare o te ao taatoa? Ia pure tatou e ia tae mai te Basileia o te Atua, eaha ïa te auraa? Na to muri iho tumu parau e pahono mai.