Mau haapiiraa na roto i te aamu o te fanauraa o Iesu

E MAU mirioni taata teie e faahiahia nei i te mau ohipa i tupu i to Iesu fanauraahia. A hiˈo na ehia faahohoˈaraa o te Fanauraa e faaiteitehia e ehia hautiraa o te Fanauraa e rave-faahou-hia i te ao nei i te tau Noela. Noa ˈtu te au, aita te mau ohipa tei tupu i to Iesu fanauraahia i papaihia i roto i te Bibilia no te faaanaanatae i te taata. Ua faaurua maori râ te Atua i teie tuhaa o te Papai taatoa no te horoa mai i te haapiiraa e no te faatitiaifaro i te mau mea.—Timoteo 2, 3:16.

Ahiri te Atua i hinaaro na ia faatupu te mau Kerisetiano i te oroa fanauraa o Iesu, ua faaite mai ïa te Bibilia i te taio mahana tia. Oia anei? I muri aˈe i to ˈna parauraa e ua fanauhia Iesu i te hoê taime to rapaeau te mau tiai mamoe i te rui e haapao ra i ta ratou mau nǎnǎ, ua faaoti te aivanaa bibilia no te senekele 19 ra o Albert Barnes e: “Ia au i teie haamaramaramaraa, mea papu e ua fanauhia to tatou Faaora hou te 25 no Titema . . . Mea toetoe taua taime ra, i te mau tufaa fenua mouˈa e te teitei iho â râ i pihai ia Betelehema. Ua huna te Atua i te taime fanauraa [o Iesu]. . . . Aita atoa e faufaa ia ite i te taime; ahiri mea faufaa, ua paruru ïa te Atua i te reira.”

Area na taata papai Evanelia e maha, te faaite papu maira ïa i te mahana i pohe ai Iesu. Ua pohe oia i te mahana o te Pasa, i tupu i te 14 no Nisana, te avaˈe ati Iuda, i te tau uaaraa tiare. Hau atu â, ua faaue maitai Iesu i ta ˈna mau pǐpǐ e haamanaˈo i taua mahana ra ei manaˈoraa ia ˈna. (Luka 22:19) Aita te Bibilia e faaue ra e haamanaˈo i to  Iesu mahana fanauraa, aita atoa ïa to te tahi atu taata. Te mea peapea, e nehenehe te mau mârôraa no nia i te taio mahana o te fanauraa o Iesu e haapoiri i te tahi mau ohipa faufaa aˈe i tupu i taua area taime ra.

Na te Atua i maiti i na metua

I roto i na tau tausani utuafare i Iseraela, teihea huru metua ta te Atua i maiti no te aupuru i ta ˈna Tamaiti? Mea faufaa anei na ˈNa te tiaraa teitei e te taoˈa rahi? Eita. Ua haapao maori râ Iehova i te mau huru maitatai pae varua o na metua. A hiˈo na i te himene arueraa a Maria, i papaihia i roto i te Luka 1:46-55 (MN), ta ˈna i himene i muri aˈe i te faaiteraahia ˈtu ta ˈna fanaˈoraa taa ê, oia hoi te riroraa ei metua vahine no te Mesia. Ei hiˈoraa, ua parau oia e: ‘Ua faarahi tau [aau ia Iehova], tei ore i vahavaha i te haehaaraa o to ˈna tavini.’ I to ˈna manaˈo, e tavini ‘haehaa’ oia no Iehova. Te mea faufaa ˈtu â, te faaite ra te mau parau arueraa nehenehe o te himene a Maria e e vahine haapao oia i te mau ohipa pae varua, tei ite maitai i te mau Papai. Noa ˈtu e e huaai hara oia no Adamu, e maitiraa maitai roa oia no te riro mai ei metua vahine i te fenua nei no te Tamaiti a te Atua.

E te tane a Maria, o tei riro mai ei metua tane faaamu no Iesu? E taata ite roa Iosepha i te ohipa tamuta. No to ˈna ineine i te haa puai ma to ˈna rima, ua maraa ia ˈna i te faatamaa i te hoê utuafare e pae tamaiti e e piti aˈe tamahine. (Mataio 13:55, 56) E ere Iosepha i te taata taoˈa rahi. A afai ai Maria i ta ˈna tamaiti matahiapo i te hiero o te Atua, ua inoino paha Iosepha no te mea eita ta ˈna e nehenehe e horoa ˈtu i te hoê mamoe ei tusia. Ua horoa noa râ raua i tei faataahia na te feia rii. No nia i te metua vahine o te hoê tamaiti fanau apî, te na ô ra te ture a te Atua e: “Ia ore ia tia ia ˈna ia hopoi mai i te pinia mamoe, ei uupa ta ˈna e hopoi mai ia piti aˈe, e aore ra, ia piti aˈe uuairaˈo; ei tusia taauahi te hoê, ei tusia no te hara te hoê, e na te tahuˈa e hopoi i te taraehara na ˈna, e e mâ ïa oia.”—Levitiko 12:8; Luka 2:22-24.

Te parau ra te Bibilia e “e taata parau-tia” o Iosepha. (Mataio 1:19) Ei hiˈoraa, aita oia i taoto i ta ˈna vahine paretenia tae noa ˈtu i muri aˈe i to Iesu fanauraahia. Ua arai te reira i te tahi manaˈo hape no nia i te Metua mau o Iesu. E ere i te mea ohie no te tahi nau apiti faaipoipo apî e haapae i te taatiraa pae tino a faaea ˈi i roto i te hoê â fare, teie râ, ua faaite mai te reira e ua poihere raua e piti atoa i te fanaˈoraa taa ê, to raua maitiraahia no te aupuru i te Tamaiti a te Atua.—Mataio 1:24, 25.

Mai ia Maria, e taata haapao o Iosepha i te mau ohipa pae varua. Ua vaiiho oia i ta ˈna ohipa i te mau matahiti atoa no te afai i to ˈna utuafare i roto i te hoê tere e toru mahana mai Nazareta i Ierusalema no te apiti i roto i te oroa matahiti o te Pasa. (Luka 2:41) I te mau hebedoma atoa, ua haamatau atoa paha Iosepha i te taurearea ra o Iesu i te apiti i roto i te haamoriraa i te sunago, i reira te Parau a te Atua e taiohia ˈi e e tatarahia ˈi. (Luka 2:51; 4:16) No reira, aita e feaaraa e ua maiti te Atua i te metua vahine e te metua tane e tano maitai i te fenua nei no te faaamu i ta ˈna Tamaiti.

Te hoê haamaitairaa faahiahia na te mau tiai mamoe riirii

Noa ˈtu e mea fifi no ta ˈna vahine, e iva avaˈe hapûraa i teie nei, ua reva o Iosepha i te oire o to ˈna mau tupuna no te tapaoraa iˈoa, ia au i te faaueraa mana a Kaisara. I to raua taeraa ˈtu i Betelehema, aita i itea mai ia raua te tahi nohoraa  i roto i te oire î i te taata. No te mau tupuraa, ua noho raua i roto i te hoê fare vairaa animara, i reira to Iesu fanauraahia e tuuraahia i roto i te hoê phatene. No te haapuai i te faaroo o na metua rii, ua horoa ˈtu Iehova i te haapapuraa e na ˈNa i hinaaro i teie fanauraa. Ua tono anei oia i te hoê pǔpǔ taata paari tiaraa teitei no Betelehema e tamǎrû ia raua? Aita. Ua faaite maori râ te Atua ra o Iehova i te parau apî i te tahi mau tiai mamoe hahaa, e tiai ra i ta ratou nǎnǎ i rapaeau i te rui.

Ua fa mai te melahi a te Atua ia ratou e parau atura e haere i Betelehema, i reira ratou e ite ai i te Mesia i fanau-apî-hia “i roto i ta te puaa vairaa maa.” Ua turori aore ra ua huru ê anei teie mau taata riirii i to ratou faarooraa e tei roto te Mesia i fanau-apî-hia i te hoê fare vairaa animara? Aita roa ˈtu! Ma te haamarirau ore, ua vaiiho ratou i ta ratou nǎnǎ e ua reva ˈtura i Betelehema. I to ratou iteraa ˈtu ia Iesu, ua faatia ratou ia Iosepha e ia Maria i ta te melahi a te Atua i parau mai. Aita e feaaraa, ua haapuai teie tupuraa i to raua faaroo e te tupu ra te mau mea atoa mai ta te Atua i opua. “Hoˈi maira taua mau tiai mamoe ra ma te haamaitai e te arue i te Atua i te mau mea atoa ta ratou i faaroo e ta ratou i ite.” (Luka 2:8-20) Oia, i to ˈna faaiteraa i te parau apî i te mau tiai mamoe e mǎtaˈu ra i te Atua, ua rave Iehova i te maitiraa maitai.

Ua ite mai nei tatou teihea huru taata ia riro tatou no te fanaˈo i ta Iehova farii maitai e tia ˈi. Aita e faufaa ia imi i te tiaraa teitei aore ra te taoˈa rahi. Teie râ, mai ia Iosepha, ia Maria, e te mau tiai mamoe, mea hinaarohia ia auraro tatou i te Atua e ia haapapu i to tatou here ia ˈna na roto i te raveraa i te mau ohipa pae varua na mua ˈˈe i te mau ohipa materia. Oia mau, te vai ra te mau parau maitatai e haapii mai na roto i te feruriruriraa i te faatiaraa o te mau ohipa i tupu i te area taime o te fanauraa o Iesu.

[Hohoˈa i te api 7]

Eaha ta te ô a Maria e piti uuairaˈo e faaite ra?

[Hohoˈa i te api 7]

Ua maiti te Atua i te faaite i te fanauraa o Iesu i te tahi nau tiai mamoe riirii