Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TIURAI 2015

Te uhu: E i‘a hamani one?

Te uhu: E i‘a hamani one?

NOHEA mai te one? E rave rahi ravea hamaniraa one. E maere râ paha outou i te hi‘opoahia i roto i teie tumu parau. E faariro te uhu i te to‘a ta ’na e amu ei one.

E ora te uhu i te mau vahi veavea na te ao. Ia amu oia i te to‘a, e tapea noa te uhu i te hu‘a maa e vai ra i nia e te toea, e faariro ïa ei one a faarue atu ai te reira. Maoti to ’na utu e to ’na mau niho i muri e nehenehe ai oia e rave i tera ohipa. E nehenehe vetahi hoho‘a uhu e ora 20 matahiti te maoro ma te ore te mau niho e fati.

I te tahi mau vahi, e hamani atu â te uhu i te one i te tahi atu mau ravea hamaniraa one i roto i te natura ma te amu i te mau to‘a pohepohe. Ia au vetahi feia maimi, e au ra e nehenehe hoê uhu e hamani 100 kilo one i te matahiti.

Pahoro

E ohipa faufaa ê atoa ta te uhu e rave. Ma te amu rahi i te mau mea pohepohe i roto i te miti mai te mau rimu, te tamâ ra oia i te mau to‘a. Te ohipa taa ê râ a te uhu, o te atuaturaa ïa i te a‘au. I te mau vahi aita e uhu e te tahi atu e amu i te hoê â maa e o ’na, e î oioi te a‘au i te rimu. Ia au i te faataaraa a te tahi buka, “te mana‘o ra vetahi, eita te mau a‘au e riro mai ta tatou e ite ra i teie nei ahiri aita te mau animara amu rimu.”—Reef Life.

E titauhia ia taoto maitai i te po no te rave i te ohipa i te ao, e ere anei? I roto atoa i tera tuhaa, mea faahiahia te uhu. Mea atâta roa te hiti a‘au i te po, e rave rahi hoi animara amu i‘a te haere na reira. E pinepine te uhu i te taoto i raro a‘e i te to‘a, e nehenehe noa râ te ma‘o e haru atu.

E hamani ïa vetahi uhu i te tahi vehî no te paruru atoa ia ratou i te po. E faariro te uhu i te tahi vare ta ’na e hamani ei vehî ite-ore-hia no ’na. Te mana‘o ra te mau aivanaa no te miti, ua riro tera vehî ei ravea no te paruru ia ’na. E faatupu hoi te reira i te tahi hau‘a ino o te faaatea ê i te mau animara e hinaaro e amu atu.

O te uhu te i‘a ite-roa ’‘e-hia e te nehenehe i te pae a‘au. E pinepine, e rave rau û te itehia i nia i te otane e te ovahine e e taui noa te reira a rahi roa mai ai te i‘a. Hau roa ’tu â, e rata roa te uhu i te mau vahi e ere i te mea tai‘a-roa-hia. Tei roto ïa oia i te mau i‘a mea ohie ia mataitai.

Ma te tapiri atu i te uhu, ma te mataitai e ma te faaroo ia ’na ia faahu‘ahu‘a i te to‘a, tera te tahi mea eita e moehia i te feia hi‘opoa i te a‘au. A faaiteite noa ’i te uhu i to ’na nehenehe, e haa atoa oia no to ’na maitai, no te tahi atu e ora ra piri i te a‘au e no te au o te taata.