Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Tiurai 2015

 IA AU I TE BIBILIA

Te haavîraa u‘ana

Te haavîraa u‘ana

Ua ite-noa-hia te haavîraa u‘ana i roto i te oraraa o te huitaata. Mai tera noa iho â ïa?

Eaha to te Atua mana‘o i te haavîraa u‘ana?

TA TE TAATA E PARAU RA

No te taata e rave rahi, tae noa ’tu te feia haapaoraa ta ratou, ua riro te haavîraa u‘ana ei ravea tano no te patoi i tei faatupu i te peapea. E mirioni tei farii e faaanaanataeraa au mau te mau porotarama e hoho‘a teata o te faaite i te haavîraa u‘ana.

TA TE BIBILIA E PARAU RA

I pihaiiho i te oire no Mossoul, i te pae apatoerau o Irakia, te tia noa ra te mau hu‘ahu‘a o te oire rahi tahito Nineve, te oire pu ruperupe o te Hau emepera Asura. I tera ra tau, ua tohu te Bibilia e faariro te Atua “ia Nineve ei oire pau.” (Zephania 2:13) Ua parau te Atua: “E faariro [vau] ia oe ei hi‘oraa.” No te aha? E oire Nineve tei “viivii i te toto.” (Nahuma 1:1; 3:1, 6) Ia au i te Salamo 5:6, mea au ore roa na te Atua i te haavîraa u‘ana mai ‘te taparahiraa taata.’ Te faaite ra te mau hu‘ahu‘a o Nineve ua faatupu te Atua i ta ’na i parau.

Na te enemi rahi o te Atua e o te taata i faatupu i te haavîraa u‘ana i te haamataraa, oia hoi Satani te Diabolo, ta Iesu Mesia i pii te “taparahi taata.” (Ioane 8:44) I te mea “te vai noa nei to te ao atoa i raro a‘e i taua varua ino ra,” te itehia ra to ’na huru i nia i te haerea o te rahiraa o te taata i mua i te haavîraa u‘ana. No reira te ao e au roa ’i i te mau porotarama e hoho‘a teata o te faaite i te haavîraa u‘ana. (Ioane 1, 5:19) No te faaoaoa i te Atua, e mea tia ia haapii i te au ore i te reira e te hinaaro i ta te Atua e au ra. * E nehenehe anei?

“Te rave parau ino ra, ua riri roa [to Iehova] aau ia ’na.”Salamo 11:5.

E nehenehe anei te taata e au i te haavîraa u‘ana e taui?

TA TE TAATA E PARAU RA

Mai tera iho â te huru o te taata, eita te reira e taui.

TA TE BIBILIA E PARAU RA

E haapae i “te riri, te tairoiro, te feii, te faaino, e te parau tiaâ.” Te parau atoa ra: “Haapae hoi outou i te taata tahito e ta ’na atoa ra mau parau; e ua faa-taata-apî.” (Kolosa 3:8-10) Mea fifi roa anei ia rave i ta te Atua e ani mai ra? E ere. E nehenehe te taata e taui. * E nafea?

E tia na mua ia haapii o vai mau te Atua. (Kolosa 3:10) Ia ite hoê taata aau tae i te  mau huru maitatai o to tatou Atua poiete e ta ’na mau aratairaa, e here o ’na i te Atua a hinaaro atu ai e faaoaoa ia ’na.—Ioane 1, 5:3.

Te piti, e maiti maitai i ta tatou mau amuimuiraa. “Eiaha e faataua ’tu i te taata iria; e eiaha e faaau atoa ’tu i te haerea o te taata riri noa ra; o te haapii atoa ’tu hoi oe i ta ’na parau, e fifi ihora to aau i te marei.”—Maseli 22:24, 25.

Te toru, e tia ia feruri na mua ’‘e a haa ’tu ai. E faatupu te taata i te haavîraa u‘ana no to ’na paruparu i te haavî ia ’na. Area te taata hau, mea puai ïa, e noaa hoi ia ’na te faaoromai. Te na ô ra te Maseli 16:32: “Tei ore e ru i te riri ra e maitai rahi to ’na i to te feia puai.”

“E tapi i te hau i te taata atoa nei.”Hebera 12:14.

E ore anei te haavîraa u‘ana?

TA TE TAATA E PARAU RA

Mai te tau e te tau mai â te haavîraa u‘ana e eita e taui.

TA TE BIBILIA E PARAU RA

“No parahirahi a‘e te paieti ore, e aita ra . . . Area te feia mǎrû ra, e parahi ïa i te fenua, e oaoa ratou i te rahi o te hau.” (Salamo 37:10, 11) No te faaora i te feia mǎrû e te hau, e haamou te Atua i te feia mea au na ratou te haavîraa u‘ana, mai ia Nineve i tahito. Ia oti, eita roa ’tu te haavîraa u‘ana e haafifi faahou i te hau o te fenua.—Salamo 72:7.

“E riro hoi [i te feia mǎrû] te fenua.”—Mataio 5:5

E imi ana‘e ïa i teie nei â i te farii maitai a te Atua ma te faatupu i te hau. Te na ô ra te Petero 2, 3:9: “E faaoromai rahi râ to [Iehova] ia tatou, aita roa i hinaaro e ia pohe atu te hoê, ia noaa paatoa râ te tatarahapa.”

“E tiapai ratou i ta ratou ‘o‘e ei auri arote, e ta ratou mau mahae ei tipi tope raau.”Isaia 2:4.

^ par. 7 Ua vaiiho te Atua ia Iseraela i tahito ia haere i te tama‘i ia ore to ratou fenua ia haruhia. (Paraleipomeno 2, 20:15, 17) Ua taui râ a faaore ai te Atua i te faufaa ta ’na i faaau ia Iseraela e a haamau ai i te amuiraa Kerisetiano. Aita hoi te reira i taotiahia i te hoê noa fenua.

^ par. 11 E itehia te tahi mau hi‘oraa i roto i te tumu parau “Ua taui te Bibilia i to ’u oraraa” piahia i roto i te vea Te Pare Tiairaa.