Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Tiurai 2015

“Te tauturu mai ra te Atua ia faaitoito”

“Te tauturu mai ra te Atua ia faaitoito”

UA HORO Natalya e ta ’na tamaiti iva matahiti Aslan i pihai iho ia Zarina e ta ’na tamahine ahuru ma piti matahiti Anzhelika. Hau atu 1 000 tamarii e feia paari tei tapeahia e te tahi pǔpǔ taata iino e ta ratou pupuhi.

I te Mahana toru 1 no Tetepa 2004, tei rapae te mau tamarii e metua no te oroa haamataraa haapiiraa i Beslan, te tahi oire iti Alania i Rusia. Horo taue atura i rotopu ia ratou te tahi mau taata e pupuhi ta ratou e te tahi atu e ahu atoa mai to te feia totoa no te topita. Ua pupuhi ratou i nia e ua tutuô. Hau atu 30 feia iino tei haamǎta‘u e tei haavî i teie nahoa taata ia haere i te fare tuaro rahi o te haapiiraa e ua taamu i te mau ofai paaina ati a‘e i tera vahi.

Ua tupu te aroraa e ua huehue roa

E toru mahana te maoro, ua tamata te mau tia paruru a te faatereraa i te faatupu i te tahi faaauraa e te feia iino. E piahi haapii Bibilia e te mau Ite no Iehova Natalya e te na ô ra oia: “Aita vau i pure a‘enei mai tera.”

Ua tupu te reira i te tau veavea e ua âhu roa i roto i te fare tuaro. I te poipoi o te piti o te mahana, aitâ te feia iino i horoa i te maa e te pape. I te toru o te mahana, te Mahana pae, ua inu vetahi i te omaha e ua amu i te mau tiare ta te mau tamarii i afai atu i to ratou mau orometua. Te na ô ra Natalya: “Ua tuu mai te tahi tamaiti i parahi i pihai iho ia ’u hoê rauere i roto i to ’u apu rima. Ua horoa vau i te afaraa o te reira na Anzhelika e te tahi atu na Aslan.”

Ua huehue roa i te toru o te mahana. Ua faatia Natalya: “Ua pee roa vau a paaina ’i te mau topita. Ua î roa te vahi i te auauahi e ua haamata te taata i te pupuhi.” A tupu ai te aroraa i rotopu i te mau faehau e te feia totoa, ua nee Natalya e Aslan na raro no te  haere i rapae. Ua tauturu te tahi taata no ǒ, o Alan te i‘oa, ia raua ia haere i te tahi vahi papu. E rave rahi tei ore i tia ia na reira.

Te faahopearaa

Ua pohe Anzhelika a tupu ai te aroraa

Tau hanere tamarii e taata paari tei pohe, na reira atoa Anzhelika. Ua faaroohia te mau taata ia ta‘i e ia oto i Beslan i te mau hebedoma i muri iho. Noa ’tu e ere te fare haapiiraa tahito i te mea atea i te fare o Natalya e ua hamanihia hoê piri atu i to ratou nohoraa, aita i tia ia Aslan ia haere i te haapiiraa e ia hauti i rapae. Te na ô ra Natalya: “Ua pure noa matou ia Iehova ia tauturu ia ’na ia ore ia mǎta‘u faahou.” I muri a‘e, ua noaa ia ’na te itoito no te haere i te haapiiraa.

I muri a‘e i tera ati, mea fifi no Natalya ia haere i te mau putuputuraa Kerisetiano i te Piha a te Basileia. Te faatia ra oia: “Ia haere au i roto i te hoê piha mea rahi te taata, e riaria noa vau ia haruhia tera vahi e te feia iino e e pure noa vau eiaha te reira ia tupu. Tau mahana i muri a‘e, ua faaea vau i te haere i te mau putuputuraa. Mea fifi roa atoa no ’u ia farii ua pohe e rave rahi, area matou, ua ora mai.”

Ua itoito faahou

Te na ô ra Natalya: “Te haamauruuru nei au i te mau melo o te amuiraa i tauturu noa ia ’u. Pauroa te toru mahana, aita Tatyana te tahi Ite i faaea i te haere mai e hi‘o ia ’u. I muri a‘e, ua haere mai oia e te tahi atu hoa Kerisetiano maitai, mǎrû e te tamahanahana o Ulyana te i‘oa e mea ite atoa i te faaohipa i te Bibilia. Ua haapopou mai oia no ta ’u mau tutavaraa e ua faaroo mau a faaite ai au i to ’u mau mana‘o.”

“I teie nei, e nehenehe ta ’u e faatia i tei tupu ma te ore e inoino e e taiâ”

Te na ô faahou ra Natalya: “Ua taio mai Ulyana i te mau parau a te aposetolo Paulo tei papaihia i roto i te Korinetia 2, 1:9. I muri a‘e i te tahi ati i tupu i Asia, ua parau Paulo: ‘E mana‘o pohe to matou i roto ia matou iho.’ Ua taio atoa oia i te Isaia 40:31 o te na ô ra: ‘O te feia râ e tiaturi ia Iehova, e noaa ïa te etaeta apî; e pee ratou i nia mai tei nia i te pererau o te aeto.’ Maoti tera na irava e te turu tamau a Ulyana e te tahi atu, ua itoitohia vau i te haere faahou i te putuputuraa na muri i ta ’u mau tamarii. E huru ê noa râ vau ia faaea i roto hoê piha.”

Ua riro Zarina ei Ite no Iehova e te tiai ra i te taime no te farerei faahou ia Anzhelika ia faatiahia mai oia i nia hoê fenua nehenehe e te hau o te faaterehia e te Basileia o te Atua. (Luka 11:2; Ohipa 24:15) Ua bapetizohia Natalya e ta ’na mau tamarii i 2009. Te ora noa ra ratou i pihai iho i te fare tuaro tahito, ua vaiiho râ te ati riaria mau i tupu i muri. Te na ô ra Natalya: “I teie nei, e nehenehe ta ’u e faatia i tei tupu ma te ore e inoino e e taiâ. Te tauturu mai ra te Atua ia faaitoito.”