Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TIURAI 2015

 MEA POIETEHIA ANEI?

Te mero faaama mori o teie fee no Vaihi

Te mero faaama mori o teie fee no Vaihi

TEIE te tahi fee no Vaihi e imi i ta ’na maa i te po. Na ’na iho e faaama i to ’na mori, tera râ e na reira oia ia ore o ’na ia itehia noa ’tu te maramarama o te ava‘e e to te mau fetia. Maoti te aha e tia ’i ia ’na ia na reira? Te vai ra te tahi bateria i roto ia ’na o te nehenehe e faaama i te mori. E nehenehe atoa paha tatou e faufaahia i tera bateria no te haamaitai i to tatou ea.

A hi‘o na: E ora teie hoho‘a fee i te pae tahatai o te mau motu Vaihi. No te maramarama ia hiti te ava‘e e te mau fetia, e nehenehe te tahi animara e ite maitai i ta ’na e haru e e amu. Auaa râ no teie fee no Vaihi, i raro a‘e ia ’na, e nehenehe ta ’na e faaama i te tahi mori o tei au i te maramarama o te po. Eaha te tupu? Eita o ’na e to ’na ata e itehia. I roto i to ’na mero faaama mori, te vai ra te mau bateria o te horoa i te maramarama tano maitai ia ore teie fee ia itehia.

Na tera atoa paha bateria e faatano i te taime taotoraa e araraa o teie hoho‘a fee. Ua anaanatae roa te feia maimi, eita hoi tera faanahoraa e itehia i roto noa i te tino o teie fee no Vaihi. No te animara atoa e horoa i te û e no te taata, e nehenehe te bateria o te tauturu ia faatopa i te maa e haa i nia i te tupu i roto i te tino i te roaraa o te mahana. Ia faahuru-ê-hia te reira, e nehenehe te taata e hepohepo, e roohia i te ma‘i omaha tihota e e fifihia i te taoto. E nehenehe te mau maimiraa no nia i te bateria e vai ra i roto i teie fee no Vaihi e faaite mai nafea ia haamaitai i te ea o te taata.

Eaha to oe mana‘o? Mea tupu noa anei te mero faaama mori o teie fee no Vaihi aore ra mea poietehia?