Fanatu ki te fakasologa

Fanatu ki te fakasologa o mataupu

Te ‵Tekeatuga i te Koga o Agaga

Te ‵Tekeatuga i te Koga o Agaga

I te taimi ne fakaaogā ei ne Satani a te gata ke faipati atu ki a Eva, ne kau atu a ia ki tena ‵tekeatuga ki te Atua

A tino faka-te-agaga katoa kolā ne faite ne Ieova ne fai mo fai ne tino ‵lei. Kae ne ‵fuli te agelu e tokotasi ke masei. A ia ko Satani te Tiapolo. Ne manako a Satani ke tapuaki atu a tino o te lalolagi ki a ia—i lō Ieova. Konei la a mea ne ‵tupu:

E uke a lakau ‵gali ne maua i te fatoaga i Etena. Ne fai atu a Ieova ki a Atamu mo tena avaga, ko Eva, me e mafai ne laua o ‵kai ki lakau konā. Kae e tasi fua te lakau ne fai atu te Atua me e se ‵tau o ‵kai laua ki ei. Ana muna me kafai ko ‵kai laua ki ei, ka ‵mate eiloa laua.—Kenese 2:9, 16, 17.

E tasi te aso ne nofo tokotasi ei a Eva kae ne faipati atu se gata ki a ia. E tonu, e se ko te gata telā ne faipati ‵tonu atu; ko Satani te Tiapolo ne fai ne ia ke foliga mai pelā me e faipati atu te gata. Ne fai atu a Satani ki a Eva me kafai ko kai a ia ki te fuaga telā ne fakatapu, ka poto a ia e pelā mo te Atua. Ne fai atu foki a ia me ka se mate a ia. A te avā pati konā ne pati ‵loi. Kae ne talitonu eiloa a Eva ki a Satani kae ne kai ki te fuaga. Fakamuli ifo, ne tuku atu foki ne ia a nisi mea ki a Atamu kae ne kai foki a ia ki ei.—Kenese 3: 1-6.

Mai i te tala tonu tenā, ko iloa ei ne tatou me i a Satani se tino ‵teke kae se tino loi foki. Ne fai atu a ia ki a Eva me kafai e se fakalogo a ia ki te Atua, ka se mate a ia. Ne loi fua a ia. Ne mate eiloa tou fafine, penā foki loa mo Atamu. Ne seki mate a Satani i konā, kae fakamuli loa ka mate atu ei a ia me ne agasala a ia. A koi tuai o fai penā, koi ola a ia kae  koi fakaloiloi mai foki ne ia a tino. Koi fai eiloa a ia pelā me se tino loi, kae e taumafai a ia o fai a tino ke solitulafono ki te Atua.—Ioane 8:44.

Ne ‵Teke Atu a Nisi Agelu

Fakamuli ifo, ne ‵fuli a nisi agelu ke ma‵sei. Ne ‵kilo atu a agelu konā ki tamāfine tauleka‵leka i te lalolagi kae ne ma‵nako ke ‵moe fakatasi mo latou. Tela la, ne o‵mai latou ki te lalolagi kae ne ‵fuli ki foitino faka-te-tagata. I konā foki loa ne puke ne latou a fāfine konā. Ne ‵teke atu i ei ki te fuafuaga a te Atua.—Kenese 6:1, 2; Iuta 6.

Ne o‵mai a agelu ma‵sei ki te lalolagi ke fai amioga sē ‵tau mo fāfine

Ne mafua mai i ei te fia o fakalavelave ki tino. Ne fai ne avaga o agelu konā olotou tama‵liki, ako tama‵liki konā e se ne tama‵liki e pelā mo te masani. Ne ‵tupu aka latou ke amio fakasauā kae ne fai mo fai ne tino ma‵losi kae sē a‵lofa. Fakamuli ifo ne ‵fonu eiloa te lalolagi i amioga fakasauā kae ne fakaiku aka ne Ieova ke ‵ta fakapalele ne ia a tino ma‵sei i se lolo lasi. A tino fua kolā ne ‵sao i te Lolo ko te tagata amiotonu ko Noa mo tena kāiga.—Kenese 6:4, 11; 7:23.

Ne toe ‵foki atu a agelu ma‵sei konā ki te koga o agaga; kae ne seki ‵mate latou. Kae ne fakasala latou. Ne seki toe talia latou ke ulu atu ki loto i te kāiga o te Atua, ko agelu amio‵tonu. Kae ne seki toe talia foki ne Ieova ke liu tino latou. Fakamuli ifo ka ‵mate latou i te fakamasinoga lasi.—2 Petelu 2:4; Iuta 6.

 Ne ‵Pei Ifo a Satani Mai i te Lagi

Ne ‵pei ifo a Satani mo ana agelu ma‵sei mai i te lagi

I te kamataga o te ‵tou senetenali tenei, ne fai se taua i te lagi. Ne fakamatala mai ne te tusi i te Tusi Tapu ko Fakaasiga a mea kolā ne ‵tupu i ei: ‘Ne fai te taua i te lagi. Ko Mikaele [ko te tino ne toetu aka ko Iesu Keliso] mo ana agelu [‵lei] ne taua mo te talako [ko Satani] mo ana agelu [ma‵sei]. Kae ne takavale te talako, kae ne se toe talia a ia mo ana agelu ke toe ‵nofo i te lagi. Ne tuli keatea te talako lasi! Ko ia ko te gata taumua eiloa telā e igoa ki te Tiapolo io me ko Satani, telā ne fakaloiloi ne ia te lalolagi kātoa. Ne ‵pei ifo a ia fakatasi mo ana agelu [ma‵sei] ki te lalolagi.’

Ne a mea ne iku mai i ei? Ne toe fai mai te tala penei: “Tela la, ke fiafia te lagi, pela foki mo tino katoa e ‵nofo i ei.” Ne mafai o fia‵fia a agelu ‵lei me e se toe ‵nofo a Satani mo ana agelu ma‵sei i te lagi. Kae e a a tino i te lalolagi nei? E fai mai te Tusi Tapu penei: “Kae kalofa eiloa i te lalolagi mo te tai! I te Tiapolo ko oti ne fanaifo ki a koulua, kae ko oko eiloa i te kaitaua, me e iloa ne ia ko se leva ona aso i te lalolagi.”—Fakaasiga 12:7-9, 12.

E tonu, e fakaloiloi ne Satani mo ana taugasoa ma‵sei a tino kae fakatoka foki ne latou se matugā malaia lasi mō tino i te lalolagi. A agelu ma‵sei konā ko temoni. A latou ko fili o te Atua. Kae e ma‵sei a latou katoa.