Kenese 3:1-24

  • Te māfuaga o te agasala a te tagata (1-13)

    • Te loi muamua (4, 5)

  • Te fakamasinoga a Ieova ki tino ‵teke (14-24)

    • Te folafolaga ki te fanau a te fafine (15)

    • Ko ‵tuli ki tua mo Etena (23, 24)

3  Mai manu katoa o te vao ne faite ne Ieova te Atua, a te manu ko te gata+ ko ia loa ko fakaeteete.* Kae ne fai atu ki te fafine: “E tonu eiloa i te Atua ne fai atu ke mo a ma ‵kai koulua ki so se lakau i te fatoaga?”+  Ne fai atu te fafine ki te gata: “E mafai ne māua o ‵kai ki fuaga o so se lakau i te fatoaga.+  Kae ne fai mai te Atua e uiga ki te fuaga o te lakau telā e tu i te kogaloto o te fatoaga:+ ‘E se ‵tau mo koulua o ‵kai ki ei, ikai, e se ‵tau mo koulua o pa‵tele ki ei; i a koulua ma ‵mate.’”  Kae ne fai atu te gata ki te fafine: “A koulua ka se ‵mate eiloa.+  E iloa ne te Atua, me i te aso eiloa telā e ‵kai ei koulua ki ei, ka ‵pula oulua mata kae ka ‵pau koulua mo te Atua, ka iloa foki ei ne koulua te mea ‵lei mo te mea masei.”+  Fakamuli ifo, ne lavea ne te fafine me e ‵lei a fuaga o te lakau i te kai kae gali foki i te kilo, ao, ko ‵gali aka eiloa ana fuaga. Ne kamata o puke ne ia se fuaga kae kai ki ei.+ Mai tua ifo i ei, ne avatu foki ne ia ne mu mea ki tena avaga i te taimi ne ‵nofo tasi ei lāua, kae ne kamata o kai a ia ki ei.+  Tenā ne ‵pula ei a lā mata, kae ne iloa aka ne lāua i a lāua e ‵nofo fuafua. Tenā ne ‵sui tasi ei ne lāua a lau o te mati kae ‵sai ki lā tega.+  Fakamuli ifo, ne lagona ne lāua te leo o Ieova te Atua i te taimi ne sasale ei a ia i te fatoaga kae agiagi mo te matagi, telā ne ‵muni ei te tagata mo tena avaga mai i a Ieova te Atua i loto i lakau o te fatoaga.  Kae ne kalaga atu faeloa a Ieova te Atua ki te tagata: “Tefea koe?” 10  Fakamuli loa, fai atu ei a te tagata: “Ne lagona ne au tou leo i te fatoaga, kae ko au ne mataku i a au e nofo fuafua, tenā ne ‵muni ei au.” 11  Ne fai atu te Atua: “Ko oi ne fai atu i a koe e nofo fuafua?+ E a, ko oti koe ne kai ki te lakau ne fakatonu atu au ke se kai koe ki ei?”+ 12  Muna a te tagata: “Ko te fafine tenei ne tuku mai ne koe ki a au, ne aumai ne ia te fuaga mai te lakau, tenā ne kai ei au.” 13  Tenā ne fai atu ei a Ieova te Atua ki te fafine: “Se a te mea tenei ko fai ne koe?” Ne tali atu te fafine: “Ko te gata ne fakaloiloi ne ia au, tenā ne kai ei au.”+ 14  Tenā ne fai atu ei a Ieova te Atua ki te gata:+ “Ona ko te mea tenei ko oti ne fai ne koe, ka sili atu tou malaia i manu ‵lata katoa e pelā foki mo manu katoa o te vao. Ka ‵solo koe i tou tinae kae ka kai koe ki ‵pefu i aso katoa o tou olaga. 15  Kae ka fakatupu ne au te fai fili+ i te va o koe+ mo te fafine+ mo te va o tau tama*+ mo tena tama.*+ Ka tuki pala ne ia tou ulu+ kae ka fakapakia ne koe a ia i te mulivae.”+ 16  Ne fai atu a ia ki te fafine: “Ka fai ne au ke silia atu tou logo‵mae i te taimi e faitama ei koe; ka logo‵mae koe i te taimi e fa‵nau ei au tamaliki, kae ka manako faeloa koe ki tau avaga, kae ka pule a ia ki a koe.” 17  Kae ne fai atu a ia ki a Atamu:* “Ona ko koe ne fakalogo ki te leo o tau avaga kae kai ki te lakau telā ne fakatonu atu+ ne au ki a koe penei, ‘E se ‵tau mo koe o kai ki ei,’ ke malaia te laukele ona ko koe.+ Ka galue fi‵ta* koe i tou olaga kātoa ke maua ne mu meakai mo ou kai.+ 18  Ka ola aka i ei a lakau tala‵tala mo lakau makai‵kai mō koe, kae e ‵tau mo koe o kai ki lakau kaina o te vao. 19  Ka ‵sali a tauta i ou mata ke maua ne au mu meakai* mo ou kai, ke oko eiloa ki te taimi e toe foki ei koe ki te laukele, telā ne faite mai ei koe.+ Me i a koe se ‵pefu kae ka toe foki eiloa koe ki te ‵pefu.”+ 20  Mai tua ifo i ei, ne fakaigoa ne Atamu tena avaga ki a Eva,* me ka fai a ia mo fai te mātua o tino ola katoa.+ 21  Kae ne faite ne Ieova te Atua a gatu ‵loa mai pa‵kili o manu mō Atamu mo tena avaga, ke ‵pei lāua ki ei.+ 22  Tenā ne fai aka ei a Ieova te Atua: “Nei la, a te tagata ko ‵pau mo se tokotasi i a tāua,* me ko iloa ne ia te mea ‵lei mo te mea masei.+ Nei la, ko te mea ke se mafai o tuku atu tena lima o tau foki se fuaga mai te lakau o te ola+ kae kai ki ei kae ola ki te se-gata-mai, ​—” 23  Ona ko te mea tenā, ne ‵tuli kea‵tea a ia ne Ieova te Atua mai te fatoaga o Etena+ ke galue te laukele telā ne faite mai ei a ia.+ 24  Ne ‵tuli ne ia a te tagata ki tua, kae faka‵tu ne ia a kelupi+ i te feitu ki saegala o te fatoaga o Etena mo te pelu afi telā e takapilipili faeloa ke leoleo ei a te auala ki te lakau o te ola.

Fakamatalaga mai lalo

Io me “‵toe manu poto; ‵toe manu faitogafiti.”
Epelu, “fanau.”
Epelu, “fanau.”
Tena uiga “Tagata o te Lalolagi; Tino.”
Epelu, “logo‵mae.”
Io me “falaoa.”
Tena uiga “Tino Ola.”
I te ‵gana Epelu e mafai o fakasino atu a te pati telā ne ‵fuli i konei ki se “tokolua” io me ne “tino e tokouke.”