Kenese 7:1-24

  • Ko ulu atu ki loto i te vaka (1-10)

  • Te Lolo i te lalolagi kātoa (11-24)

7  Fakamuli ifo, ne fai atu a Ieova ki a Noa: “Ulu ki loto i te vaka, ko koe mo tou kāiga katoa, me ko koe te tino amiotonu ne maua ne au i te kautama tenei.+  E ‵tau mo koe o puke e taki fitu*+ i vaegā manu kolā e ‵ma, ko te manu tagata mo tena soa; kae ko manu kolā e se ‵ma ke puke ne koe e taki lua, ko te manu tagata mo tena soa;  e penā foki mo manu eva o te lagi, e taki fitu,* se manu tagata mo te manu fafine, ke mafai o ‵sao olotou tama ke ola i te lalolagi kātoa.+  Me e toe fitu fua aso kae ka faka‵to ifo ne au te vaiua+ ki luga i te lalolagi i ao e 40 mo po e 40,+ kae ka ‵fulu faka‵ma ne au mai luga i te laukele a mea ola katoa kolā ne faite ne au.”+  Tenā ne fai ei ne Noa a mea katoa ne fakatonu atu ne Ieova ki a ia.  Ko 600 tausaga o Noa i te taimi ne oko mai ei te lolo ki te lalolagi.+  Ne ulu atu a Noa fakatasi mo ana tama tāgata, tena avaga, mo avaga a ana tama ki loto i te vaka kae koi tuai o poko te lolo.+  A manu katoa kolā e ‵ma mo manu katoa kolā e se ‵ma mo manu eva katoa mo mea katoa kolā e gasue‵sue i luga i te laukele,+  ne ulu atu ki loto i te vaka mo olotou soa ki a Noa, ko te manu tagata mo te manu fafine, e pelā eiloa mo te fakatonuga a te Atua ki a Noa. 10  Kae e fitu aso mai tua ifo kae oko mai te lolo ki te lalolagi. 11  I te 600 tausaga o te olaga o Noa, i te lua o masina, i te 17 o aso o te masina, i te aso tenā ne ma‵tala a vaipuna mai vai ‵poko kae ne ma‵tala a ‵pui o vai o te lagi.+ 12  Kae ne ‵to ‵lotu te vaiua ki luga i te lalolagi i ao e 40 mo po e 40. 13  Ko te aso eiloa tenā ne ulu ei a Noa fakatasi mo ana tama tāgata ko Semu, Hamo mo Iafeta+ ki loto i te vaka, fakatasi mo tena avaga mo avaga e tokotolu a ana tama.+ 14  Ne ulu atu latou ki loto fakatasi mo vaegā manu vae fa katoa o te vao e ‵tusa mo olotou itukāiga, mo manu ‵lata katoa e ‵tusa mo olotou itukāiga, mo manu ‵tolo katoa e ‵tusa mo olotou itukāiga, mo manu ‵lele katoa e ‵tusa mo olotou itukāiga, ko manu eva katoa mo manu katoa kolā e isi ne kapakau. 15  Ne ulu atu faeloa a manu taki lua ki loto i te vaka i a Noa, ko manu katoa kolā e isi se mānava ola* i ei. 16  Ne ulu atu a manu ki loto, ko te manu tagata mo te manu fafine i vaega katoa, e pelā eiloa mo te fakatonuga a te Atua ki a ia. Mai tua i konā, ‵pono ei ne Ieova a te mataloa i ana tua. 17  Ne tumau eiloa te lofiaga i aso e 40 i luga i te lalolagi, kae ne fanaka faeloa te vai ki luga, kamata ei o laga a te vaka kae tapeapea i luga i te lalolagi. 18  Ne ‵fonu maligiligi a te lalolagi i te vai kae fanaka faeloa ki luga, kae ne tapeapea a te vaka i luga i te vai. 19  Ne ‵fonu maligiligi te lalolagi i te vai, telā ne ‵galo katoa ei a mauga ma‵luga mai lalo o te lagi.+ 20  Ne fanaka eiloa te vai ki te maluga e ‵tusa mo te 15 kupita* mai luga o mauga. 21  Tenā ne ‵mate i ei a mea ola katoa i te lalolagi+​—ko manu eva, manu ‵lata, manu o te vao, manu kolā e oloolo fakatasi, mo tino katoa.+ 22  A mea katoa i luga i te laukele kolā e isi se mānava ola* i ei, ne ‵mate atu katoa.+ 23  Ne ‵fulu faka‵ma ne Ia a mea ola katoa mai i luga i te lalolagi, e aofia i ei a tino, manu, manu ‵tolo mo manu eva katoa o te lagi. Ne ‵fulu faka‵ma a latou katoa mai te lalolagi;+ ko Noa fua fakatasi mo latou kolā ne ‵nofo mo ia i loto i te vaka ne ‵sao.+ 24  Kae ne ‵fonu maligiligi faeloa te lalolagi i te vai i aso e 150.+

Fakamatalaga mai lalo

Io me kāti, “e taki fitu a ‵pea o vaegā manu kolā e ‵ma.”
Io me kāti, “e taki fitu a ‵pea o vaegā manu eva o te lagi.”
Io me “malosi o te ola.”
A te kupita e ‵pau mo te 44.5 sm (17.5 ini.). Onoono ki te MF E14.
Io me “mānava o te malosi o te ola.”