Se a tau faka‵tau? E mata, e talia ne te Atua a te faiga o taua? Kafai e penā loa, e kau atu a ia ki te feitu fea i taua i aso nei? A te mauaga o tali ki fesili konei e mafai o pokotia i ei tau kilokiloga ki taua. E pelā mo te iloa ne koe me e talia ne te Atua a te faiga o taua kae ne ‵lago atu a ia ki tau kau i se taua e tasi, kāti ka fiafia koe ki tou tulaga i te mataupu tenei, mo te loto talitonu me ka manumalo eiloa tau kau. I te suā feitu, ka pefea ou lagonaga māfai ne iloa ne koe me ne ‵lago atu te Atua ki suā kau i se taua? Kāti ka toe mafaufau koe ki tou tulaga i te mataupu tenei.

E isi se mea telā e sili atu i te tāua. A te iloaga o te kilokiloga a te Atua ki taua e mafai o pokotia foki i ei a tau kilokiloga ki te Atua. Kafai e aofia koe i te fia miliona o tino kolā ne logo‵mae malosi i taua a tāgata, e mautinoa eiloa me e ‵tau o iloa ne koe te tali ki te fesili, E mata, a te Atua, e pelā mo te mea e tali‵tonu ki ei a nisi tino, se tino fakasaua telā e talia io me e fakamalosi aka ne ia a logo‵maega kolā e māfua mai i taua, io me e manatu māmā kae e se fia mafaufau ki te ‵lei o tino kolā e fakasauagina?

Kāti e ofo koe ke iloa aka me e ‵kese te tali a te Tusi Tapu mai i kilokiloga takitasi konā. E se gata i ei, mai i aso ko ‵teka ke oko mai ki aso nei, e tumau eiloa te kilokiloga a te Atua ki taua. Ke mafau‵fau tatou ki pati i te Tusi Tapu e uiga ki te kilokiloga a te Atua ki taua i aso mua mo te senitenali muamua, i te taimi ne nofo ei a Iesu i te lalolagi. Ka fesoasoani mai ke iloa ne tatou te kilokiloga a te Atua ki taua io me ka fai a taua mo fai se vaega o te olaga o tino i aso mai mua io me ikai.