Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Novema 2015

 MATAUPU I TE ‵KAVA | SE A TE KILOKILOGA A TE ATUA KI TAUA?

Te Kilokiloga a te Atua ki Taua i Aso Mua

Te Kilokiloga a te Atua ki Taua i Aso Mua

Ne fakasauagina a tino. Ne ‵talo atu faeloa latou ki te Atua mō se fesoasoani, kae e seai eiloa se tali—i te taimi eiloa tenā. A tino konā ko tino Isalaelu, ko tino o te Atua i aso mua. A tino fakasaua ko te fenua malosi o Aikupito. (Esoto 1:13, 14) Ne faka‵tali eiloa a te kau Isalaelu i te fia o tausaga ke fakagata atu ne te Atua a te pulega fakasaua a te kau Aikupito. Fakamuli loa, ne oko atu ei te taimi tonu o te Atua ke gasuesue. (Esoto 3:7-10) E lipoti mai te Tusi Tapu me ne taua atu eiloa a te Atua ki te kau Aikupito. Ne fakasala ne ia te kau Aikupito ki se fakasologa o mala fakama‵taku, kae fakaseai atu a te tupu o Aikupito mo tena kautau i te Tai Kula. (Salamo 136:15) Ne fai eiloa a Ieova te Atua mo fai “se sotia malosi” mō ana tino.—Esoto 15:3, 4.

A te manatu me ne taua atu te Atua ki te kau Aikupito e fakaasi mai i ei me e se ‵teke atu a ia ki taua katoa. I nisi taimi, ne talia ne ia ana tino Isalaelu ke taua atu. E pelā mo tena fakatonuga ki a latou ke taua atu ki te kau Kanana, kolā ko tu poloki eiloa te ma‵sei. (Teutelonome 9:5; 20:17, 18) Ne fakatonu atu ki te Tupu o Isalaelu ko Tavita, ke taua atu ki te kau Filisitia fakasaua. Ne tuku atu foki ne te Atua ki a Tavita a mea e ‵tau o fai i te taua telā ne fakamaoni atu ei tena manumalo.—2 Samuelu 5:17-25.

A tala konā i te Tusi Tapu e fakaasi mai me e isi ne vaegā amioga ma‵sei mo fakasauaga kolā ne fakamatakutaku atu ki te kau Isalaelu, telā ne tuku atu ne te Atua te taliaga ke fai te taua ke puipui ei ana tino kae fakatumau foki te tapuakiga tonu. Kae masaua a manatu tāua e tolu e uiga ki taua mai te Atua:

  1. KO IEOVA LOA NE FAKAIKU AKA NE IA A TINO E ‵KAU KI TAUA. I te taimi e tasi, ne fai atu te Atua ki te kau Isalaelu: “A koutou e se ‵tau o taua i te taua tenei.” Se a te pogai? Me ka taua atu eiloa a te Atua mō latou. (2 Nofoaiga Tupu 20:17; 32:7, 8) E uke a taimi ne fai ei a ia penā, e pelā mo te mea telā ne taku atu i te kamataga o te mataupu tenei. I nisi taimi, ne fakatonu atu te Atua ki ana tino i Isalaelu mua ke taua atu i taua kolā ne talia ne ia, kolā ne aofia i ei a te puipuiga mo te ‵puluga o te Fenua o te Folafolaga.—Teutelonome 7:1, 2; Iosua 10:40.

  2. KO TE ATUA FUA NE FAKAIKU AKA NE IA TE TAIMI E FAI EI A VAEGĀ TAUA PENĀ. Ne ‵tau o faka‵tali mo te kufaki a tavini a te Atua ki te taimi tonu o te Atua ke taua atu ki faifaiga fakasaua mo amioga ma‵sei i  olotou tafa. Ke oko atu ki te taimi tenā, ne seki ‵tau o olo atu eiloa latou i a latou o taua. Kafai ne fai latou penā, ne galo atu i a latou te taliaga a te Atua. A te ‵tonuga loa, e fakaasi mai i te Tusi Tapu me kafai e ‵kau atu eiloa te kau Isalaelu ki taua kolā e seki talia ne te Atua, e fakamataku eiloa te ikuga. *

  3. Faitalia eiloa me ne taua atu a te Atua ki te kau Kanana, ne faka‵sao ne ia a nisi tino, e pelā mo Lahapa mo tena kāiga

    E SE FIAFIA A IEOVA MĀFAI E ‵MATE A TINO, E AOFIA I EI A TINO MA‵SEI. A Ieova te Atua ko te Pogai o te ola mo te Mafuaga o tino. (Salamo 36:9) Tela la, e se manako a ia ke ‵mate a tino. Kae se mea fakafanoanoa, me e isi ne tino kolā ne fai ne latou a aofaga ma‵sei ke fakasaua kae tamate foki a nisi tino. (Salamo 37:12, 14) Ke fakagata a faifaiga matagā, ne talia ne te Atua i nisi taimi a taua ke fakagata atu a amioga ma‵sei. Kae i tausaga katoa kolā ne fai ne ia te kau Isalaelu ke ‵kau atu ki vaegā taua penā, koi “alofa ‵nau” eiloa a ia kae ‘tuai o ita’ ki fili o te kau Isalaelu. (Salamo 86:15) E pelā mo tena fakatonuga me mai mua o taua atu a te kau Isalaelu ki se fa‵kai, ke ‘muamua o fesili atu me ko talia ne latou te lotou takavale me ikai,’ ke tuku atu ki tino i ei a te avanoaga ke ‵fuli olotou auala kae ke seai se taua. (Teutelonome 20:10-13) I te auala tenei, ne fakaasi atu ei ne te Atua me ‘e se fiafia ke lavea ne ia se tino agasala ke mate. E sili atu tena fiafia ke lavea ne ia me ko se toe agasala kae ke ola.’—Esekielu 33:11, 14-16. *

Mai i mea ne lavea ne tatou i aso mua, ne kilo atu te Atua ki taua e pelā me se auala ‵lei ke fakagata aka ei a vaega kese‵kese o fakasauaga mo amioga ma‵sei. Kae ko te Atua eiloa—e se ko tino—telā ne ‵tau eiloa o fakaiku aka ne ia a te taimi e ‵tau ei o fai a vaegā taua penā mo tino foki e ‵kau atu ki ei. Kae kai fai aka eiloa ne te Atua se taua, i se auala telā ne manako malosi a ia o tamate a tino? Ikai loa. E takalialia eiloa a ia ki amioga fakasaua. (Salamo 11:5) E mata, ne ‵fuli te kilokiloga a te Atua ki taua i te taimi ne kamata ei te galuega a tena Tama, ko Iesu Keliso, i te senitenali muamua?

^ pala. 7 E pelā mo te taimi ne takavale masei ei a te kau Isalaelu i te lotou taua atu ki te kau Amaleka, mo te kau Kanana mai tua o te fakatonuga a te Atua ke se olo atu. (Numela 14:41-45) I te fia o tausaga mai tua ifo, ne kau atu a te Tupu ko Iosia ki se taua e aunoa mo te taliaga a te Atua, kae ne mate atu ei a ia.—2 Nofoaiga Tupu 35:20-24.

^ pala. 8 Ne seki fakatoka muamua ne te kau Isalaelu a te filemu a koi tuai o taua atu a ia ki te kau Kanana. Kaia? Ona ko te mea ko oti ne tuku atu ki te kau Kanana se 400 tausaga ke faka‵tonu olotou auala ma‵sei. I te taimi ne olo atu ei te kau Isalaelu o taua atu ki a latou, te kau Kanana, e pelā me se potukau, ko tu poloki eiloa te lotou ma‵sei. (Kenese 15:13-16) Tela la, ne ‵tau o fakaseai katoatoa latou. Kae ne faka‵sao eiloa a tino Kanana kolā ne ‵fuli olotou amioga.—Iosua 6:25; 9:3-27.