Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Novema 2015

E Iloa ne Koe?

E Iloa ne Koe?

Kaia ne ‵vele ei a Iosefa a koi tuai o fanatu ki te Falao?

Se Ata ‵Lomi Mua i te ‵Pui o Aikupito o se Tino ‵Vele Ulu i te Galuega

E ‵tusa mo te tala i te Kenese, ne fakatonu atu a te Falao ke avatu fakavave a te pagota Epelu ko Iosefa ki ana mua ke fakamatala atu ne ia ana moemiti fakama‵taku. I te taimi tenei, ko oti ne nofo atu a Iosefa i te falepuipui mō se fia o tausaga. Faitalia te manakoga fakavave o te Falao, ne gasuesue eiloa a Iosefa ke ‵vele faka‵lei a ia. (Kenese 39:20-23; 41:1, 14) A te taku mai ne te tino tusitala o se fakamatalaga telā ne foliga mai me se tamā mea fua, e fakaasi mai i ei me ne masani a ia mo tuu a te kau Aikupito.

A te faka‵loaga o te talafa o se tino, se faifaiga masani i fenua mua e uke, e aofia i ei te kau Epelu. E ‵kese mai i ei, “a te kau Aikupito mua ko te fenua e tasi i Asia ne ‵teke atu ki te faka‵loaga o talafa,” ko muna i te McClintock and Strong’s Cyclopedia of Biblical, Theological, and Ecclesiastical Literature.

E mata, ne ‵vele fua i ei a te talafa? E fai mai te mekesini ko te Biblical Archaeology Review me ne manakogina i nisi tuu masani a nisi tino Aikupito ke fakatoka faka‵lei se tagata māfai e fanatu ki mua o te Falao e pelā eiloa māfai e ulu atu ki se faletapu. Ona ko te mea tenā, ne ‵tau o ‵vele ne Iosefa a laulu katoa i tena ulu mo tena foitino.

E fai mai te tala i te Galuega me i te tamana o Timoteo se Eleni. E mata, e fakauiga i ei me i a ia se tino Eleni tonu?

Ikai. I ana tusitusiga tapu, ne faka‵kese sāle ne te apositolo ko Paulo a te kau Iutaia mo te kau Eleni, io me ko te kau Hellenes, mai te fakaaoga ne ia a Eleni ke sui mai ne ia a tino katoa kolā e se ne tino Iutaia. (Loma 1:16; 10:12) E mautinoa eiloa me i te pogai e tasi o te mea tenei ko te lasi o te fakaaoga o te ‵gana Eleni mo tuu a te kau Eleni i kogā koga kolā ne talai atu ei a Paulo.

Ko oi ne ‵kilo atu ki ei a tino mua e pelā me ko tino Eleni? I te fa o senitenali T.L.M., ne faipati atu mo te fakamatamata se tino apo i te faipati ko Isocrates mai i Atenai, ki te auala ne salalau malosi atu ei a tuu a te kau Eleni i te lalolagi. Ne lavea ne ia me ne iku atu i ei ki te fai o “latou kolā ne taku ki tino Eleni me ne maua ne latou a motou akoakoga, i lō te fai o latou mo tino Eleni ‵tonu.” Tela la, faitalia me e se mautinoa tonu, e mafai eiloa o fakasino atu a Paulo ki te tamana o Timoteo mo nisi tino kolā e se ne tino Iutaia e pelā me ne tino Eleni ona ko te iloa ne latou a tuu, kae e se ne tino ‵tonu o te fenua.Galuega 16:1.