Mafaufau ki pati e uiga ki takitaki lotu lauiloa mo te taua i Ukraine:

•   “A te pule fakamatuatua o te Lotu Orthodox i Lusia, ko Patriarch Kirill, e seai eiloa ne ana pati ne fai o ‵teke atu ki te amio fakasaua o te kau Lusia. . . . Ne fakasalalau atu faeloa ne tena Lotu a tala ‵loi e uiga ki Ukraine, telā ko fakaaoga ne Putin ke ‵lago atu ki tena taua.”—EUobserver, Mati 7, 2022.

•   “Ne fakaasi atu ne Patriarch Kirill . . . a tena ‵lago malosi atu ki te taua a te lotou fenua ki Ukraine—kae fai atu me i te taua tenei se vaega o te taua atu ki te agasala.”—AP News, Mati 8, 2022.

•   “I te Aso Gafua, ne fakamanuia atu a te takitaki o te Lotu Orthodox i Kyiv, Ukraine, ko Metropolitan Epiphanius I ki ana tino ke ‘taua atu ki te kautau Lusia’ . . . Ne fai atu foki [a ia] me i te tamatega o sotia Lusia e sē se agasala.”—Jerusalem Post, Mati 16, 2022.

•   “E ‵lago atu matou [te Kaunisela o Lotu mo Fakapotopotoga Fakaotu i Ukraine (UCCRO)] ki te Kautau a Ukraine mo tino katoa kolā e taua mō tatou, e fakamanuia atu matou ki a latou i te lotou taua atu o ‵pulu a Ukraine mai te fili fakasaua, kae e ‵talo matou mō latou.”—Fakamatalaga mai te UCCRO a, Fepuali 24, 2022.

 Se a tau faka‵tau? E mata, e ‵tau mo lotu kolā e fai mai me e tau‵tali atu latou ki a Iesu Keliso o fakamalosi olotou tino ke ‵kau atu ki taua? Ne a pati i te Tusi Tapu?

Tala fakasolopito o lotu i taua

 E fakaasi mai i tala fakasolopito me ne masani o fakasaoloto, talia, io me fakamalosi aka ne lotu a taua i te taimi e fakaloiloi atu ei me e taumafai latou ki te filemu. Kae ko oti ne fakaasi faka‵sau atu ne Molimau a Ieova i te fia sefulu o tausaga, a vaegā amioga ‵pelo penā a lotu. Mafaufau ki nisi fakaakoakoga penā i ‵tou tusi.

•   “Taua fakalotu—Se ‘Mea Fakafanoanoa’” e fakaasi mai me ne māfua mai i te Lotu Katolika Loma a te tamatega o tino i te igoa o te Atua mo Keliso.

•   “A te Lotu Katolika i Afelika” e fakamatala mai e pelā me se fakaakoakoga o te fakata‵mala o lotu o taofi a taua i va o matakāiga, ke oko ki te tamatega o tino.

•   A te mataupu “Is Religion to Blame?,” “Te Tulaga o Lotu i Taua a Tino,” mo te “Religion Takes Sides” e fakamatala mai i ei a te auala ne ‵lago atu ei a faifeau o te Lotu Katolika, Orthodox, mo te Lotu Poletesano ki feitu e lua o taua e uke.

E mata, e ‵tau o ‵lago atu a lotu Kelisiano ki taua?

 Mea ne akoako mai ne Iesu: “E ‵tau mo koe o alofa ki tou tuakoi e pelā mo koe ki a koe eiloa.” (Mataio 22:39) “Tumau i te a‵lofa ki otou fili.”—Mataio 5:44-47.

 Pati a Iesu: “A toku Malo e sē se vaega o te lalolagi tenei. Moi fai a toku Malo se vaega o te lalolagi tenei, penei ko taua atu oku tino ke mo a eiloa e tuku atu au ki tino Iutaia.” (Ioa. 18:36) “So se tino e fakaaoga ne ia te pelu ka mate foki i te pelu.”—Mataio 26:47-52.

 Mafaufau la: Kafai ne seki taua atu a Kelisiano ke puipui ei a Iesu, e mata, e ‵tau o taua atu latou mō so se isi pogai? Faitau ki te mataupu “Is War Compatible With Christianity?” ke lavea atu a te auala ne tau‵tali atu ei a Kelisiano mua mo te fakamaoni ki te fakaakoakoga mo akoakoga a Iesu.

Ne a mea ka ‵tupu ki lotu kolā e ‵lago atu ki taua?

 E akoako mai te Tusi Tapu me e ‵teke atu a te Atua ki lotu kolā e fai atu me e sui ne latou a Iesu kae e se tau‵tali atu ki ana akoakoga.—Mataio 7:21-23; Tito 1:16.

•   E fakaasi mai ne te tusi o Fakaasiga me e ‵losi atu ne te Atua ki lotu penā a te ‵mate o “latou katoa kolā ne tamate i te lalolagi.” (Fakaasiga 18:21, 24) Ke iloa atu a te pogai, faitau ki te mataupu “Ko oi ‘Papelonia te Sili’?”

•   Ne fakaasi mai ne Iesu me ka fakaseai atu a lotu katoa kolā e ‵teke ki ei te Atua ona ko olotou galuega ma‵sei, e pelā eiloa mo te lakau masei e fua mai i ei a fuataga ma‵sei, e “‵kati ki lalo kae ‵pei ki te afi.” (Mataio 7:15-20) Faitau ki te mataupu “Ko Pili Mai te Gataga o Lotu ‵Se!” ke iloa atu a te auala ka fakataunu ei te mea tenei.

Photo credits, feitu fakamaui ki te feitu fakaatamai: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images