Te Tusi a Mataio 22:1-46

  • Tala fakatusa ki te ‵kaiga o te avaga (1-14)

  • Te Atua mo Kaisala (15-22)

  • Fesili e uiga ki te toetuga (23-33)

  • Toe fakatonuga sili e lua (34-40)

  • E mata, a te Keliso ko te tama a Tavita? (41-46)

22  Ne toe faipati atu a Iesu ki a latou i tala fakatusa, ana muna:  “A te Malo o te lagi e mafai o fakatusa ki se tupu telā ne fakatoka ne ia se ‵kaiga o te avaga+ a tena tama tagata.  Kae ne uga atu ne ia ana pologa ke ka‵laga atu ki tino kolā ne ‵kami ki te ‵kaiga o te avaga, kae ko latou ne seki fia olo ki ei.+  Ne toe uga atu ne ia a nisi pologa, ana muna, ‘Fai atu ki tino ‵kami: “Kiloke! ko oti ne fakatoka ne au taku ‵kaiga, ko oti ne ‵ta aku pulumakau mo manu puta‵puta, kae ko toka a mea katoa. O‵mai ki te ‵kaiga o te avaga.”’  Kae ne olo atu latou kea‵tea e aunoa mo te fia ‵saga atu ki ei, ne fano eiloa te tino e tokotasi ki tena fatoaga, kae ko te suā tino ki tena pisinisi;+  kae ne puke ne te ‵toega o tino ana pologa, ‵ta fakamasei kae tamate latou.  “Ne kaitaua te tupu, uga atu ei tena kautau o tamate a tino tatino konā kae ‵sunu te lotou fakai.+  Tenā ne fai atu ei a ia ki ana pologa, ‘Ko toka te ‵kaiga o te avaga, kae ko se ‵tau o ‵mai a tino kolā ne ‵kami.+  Tela la, olo atu koutou ki auala katoa o te fakai, kae ‵kami mai so se tino e maua ne koutou ki te ‵kaiga o te avaga.’+ 10  Tenā ne olo atu ei a pologa konā ki auala katoa kae fakamaopoopo mai a tino katoa kolā ne maua ne latou i konā, tino ma‵sei mo tino ‵lei; kae ne ‵fonu eiloa te koga telā e fai i ei te avaga i tino kolā ne o‵mai o ‵kai.* 11  “I te vauga a te tupu o onoono ki tino ‵kami ne lavea ne ia se tagata e se pei ki gatu e ‵tau mō te avaga. 12  Ne fai atu a ia ki ei, ‘Toku tagata, ne ulu mai pefea koe ki loto nei e aunoa mo gatu e ‵tau o pei ki te avaga?’ E seai eiloa sena pati ne fai. 13  Tenā ne fai atu ei te tupu ki ana tavini, ‘Saisai ana lima mo ana vae kae ‵pei atu ki tua i te pouliga. Tenā eiloa te koga ka tagi mautuutu kae ū ana nifo i ei.’ 14  “Me e tokouke a tino e ‵kami, kae ne nai tino fua e filifiligina.” 15  Tenā ne olo ei a Falesaio o fono ki se auala ke malei ei ne latou a ia i ana pati.+ 16  Ne uga atu ne latou olotou soko ki a ia, fakatasi mo tino o te potukau a Helota,+ kae fai atu: “Te Faiakoga, e iloa ne matou i a koe e faipati ki te mea tonu kae e akoako ne koe a auala o te Atua i te munatonu, kae e se sona taumafai koe ke fakafiafia atu ki nisi tino, me i a koe e se kilo ki foliga i tua o te tino. 17  Fai mai aka ki a matou, ‘Se a tau faka‵tau? E mata, e saoloto i te tulafono* ke ‵togi atu a lafoga foitino ki a Kaisala io me ikai?” 18  Kae ko leva ne iloa ne Iesu olotou mafaufauga ma‵sei, fai atu ei a ia: “Kaia e tofotofo ei ne koutou au, koutou tino ‵loi? 19  Fakaasi mai ki a au te tupe o te lafoga foitino.” Ne aumai ne latou se tenali* ki a ia. 20  Ne fai atu a ia ki a latou: “I o oi te ata mo te igoa tenei?” 21  Ne fai atu latou: “I o Kaisala.” Tenā fai atu ei a ia ki a latou: “Tela la, toe ‵togi atu a mea a Kaisala ki a Kaisala, kae ko mea a te Atua ki te Atua.”+ 22  I te lagonaga ne latou a te mea tenā, ne ofo masei latou, tiaki ei ne latou a ia kae olo kea‵tea. 23  I te aso tenā, ne olo atu ki a ia a te kau Satukaio, kolā e fai mai me e seai se toetu,+ kae fesili atu ki a ia:+ 24  “Te Faiakoga, ne fai mai a Mose, ‘Kafai e mate se tagata kae seai ne ana tama‵liki, e ‵tau o avaga tena taina mo tena avaga ko te mea ke maua ne tama‵liki ma tena taina.’+ 25  E isi ne tautaina e tokofitu e ‵nofo matou. Ne avaga te toekimua kae mate kae seai sena tamaliki, tuku atu ei tena avaga ki tena taina. 26  Ne penā foki te mea ne tupu ki te tokolua mo te tokotolu ke oko eiloa ki te tokofitu. 27  Fakamuli ifo, mate ei te fafine. 28  Tela la, i te taimi e toe‵tu aka ei a te tokofitu konei, ko oi ka fai mo fai te avaga a tou fafine? Me ne a‵vaga katoa a latou mo ia.” 29  Ne tali atu a Iesu ki a latou: “A koutou e ‵se, me e se iloa ne koutou a Tusitusiga Tapu io me ko te ‵mana o te Atua;+ 30  me i te taimi o te toetu ka se a‵vaga a tāgata e pelā foki mo fāfine, kae ka fai latou e pelā mo agelu i te lagi.+ 31  E uiga ki te toetuga o tino ‵mate, e a, e seki fai‵tau koutou ki muna ne fai atu ne te Atua ki a koutou, telā ne fai mai: 32  ‘Au ko te Atua o Apelaamo, ko te Atua o Isaako, ko te Atua foki o Iakopo’?+ A ia e se ko te Atua o tino ‵mate, kae ko te Atua o tino ola.”+ 33  I te lagonaga ne te vaitino a pati konā, ne ofo malosi latou i ana akoakoga.+ 34  Mai tua o te ‵logoga a Falesaio me ne fakafilemu aka ne ia a gutu o te kau Satukaio, olo fakatasi atu ei latou ki a ia. 35  Kae ne fesili tofotofo atu se tokotasi o latou telā e poto i te Tulafono ki a ia: 36  “Te Faiakoga, se a te ‵toe fakatonuga sili i te Tulafono?”+ 37  Ne fai atu a Iesu ki tou tagata: “‘E ‵tau mo koe o alofa ki a Ieova* tou Atua mo tou loto kātoa mo tou ola kātoa mo tou mafaufau kātoa.’+ 38  Tenei te ‵toe fakatonuga sili kae tu muamua. 39  E penā foki te lua o fakatonuga: ‘E ‵tau mo koe o alofa ki tou tuakoi e pelā mo koe ki a koe eiloa.’+ 40  A fakatonuga e lua konei e fakavae ki ei a te Tulafono kātoa mo pati a te kau Pelofeta.”+ 41  Kae koi maopoopo a Falesaio i konā ne fesili atu a Iesu ki a latou:+ 42  “Se a te otou faka‵tau e uiga ki te Keliso? I a ai te tama?” Ne fai atu latou ki a ia: “I a Tavita.”+ 43  Ne fesili atu a ia ki a latou: “Kaia la ne fakaosofia+ ei a Tavita ke taku ne ia te Keliso ki te Aliki, i ana muna, 44  ‘Ne fai atu a Ieova* ki toku Aliki: “Sagasaga i toku feitu fakaatamai ke oko ki te taimi e tuku ei ne au ou fili mai lalo i ou vae”’?+ 45  Kafai ne taku ne Tavita a te Keliso ki te Aliki, i te auala fea e fai ei a ia mo fai tena tama?”+ 46  E seai eiloa se tino ne mafai o tali atu ki a ia, kae mai te aso tenā o fano ki mua, ne seki ai eiloa se tino ne loto toa o toe fesili atu ki a ia.

Fakamatalaga mai lalo

Io me “faka‵pale i te taipola.”
Io me “‵lei.”
Onoono ki te MF E14.
Onoono ki te MF A5.
Onoono ki te MF A5.