YESU yakiraga kwegesaaho okusaba. Omu busumi bwe, Abebembezi b’amadiini Abayudaaya basabiraga “omu matangatangano gamakute.” Habwaki? “Abantu babarole.” Nikyeyolekera kimu ngu baagonzaaga babegombe ngu habwokuba banyadiini. Baingi baasabaga esaara eziraihire, n’endaanda obu nibateekereza ngu esaara zaabo kusobora kuhulirwa baali baine kukozesa ‘ebigambo byabo ebingi.’ (Matayo 6:5-8) Yesu akabazaaho ebikorwa ebi nk’ebitahikire, nahabweki akakonyera abantu kumanya ebintu ebibasemeriire kwetantara obubarukuba nibasaba. Baitu atagarukire ha kubeegesa nk’oku basemeriire kusaba.

Yesu akeegesa ngu esaara zaitu zisemeriire kwoleka ngu nitugonza ibara lya Ruhanga lyezebwe, Obukama bwe bwije n’ekigendererwa kye kihikiirre. Ekindi, Yesu akeegesa ngu kihikire kusaba Ruhanga atukonyere omu byetaago byaitu ebya buli kiro. (Matayo 6:9-13; Luka 11:2-4) Kurabira omu kukozesa ebyokurorraho, Yesu akakyoleka ngu nitwetaaga kulemeraho, kuba n’okwikiriza n’obwebundaazi obuturaaba nitugonza esaara zaitu zihulirwe. (Luka 11:5-13; 18:1-14) Kandi yagumyaga ebiyayegesaaga kurabira omu kyokurorraho kye.​—Matayo 14:23; Marako 1:35.

Hataroho kugurukyagurukya obuhabuzi bunu bukakonyera abegeswa be kusemezaamu esaara zaabo. Baitu, Yesu akalindira kimu kuhika ha kiro kye ky’okumalirra omu nsi kwegesa abegeswa be isomo erikuru muno erirukukwata ha kusaba.

Ha kiro ky’okumalirra Yesu atakafiire, obwire bw’ekiro oburukukira obwingi akabumara nagarramu amaani abakwenda be abesigwa. Kakaba kali kasumi akasemeriire akokubooleka ekintu ekihyaka. Yesu akagamba ati: “Ninyowe muhanda namananu nobwomezi; Busaho aija hali Isenyowe rundi araba omuli nyowe.” Hanyuma akabaha okunihira okurukuhuumuza: “Ekimurasabaga kyona omu ibara lyange ndikikora, Isenyowe anyumizibwe omu Mwana. Obumurasabaga ekigambo omu ibara lyange, eki ndikikora.” Obw’akaba ali haihi kumaliiriza orubazo rwe akagamba ati: “Okuhika hati timukasabaga kigambo omu ibara lyange: musabe, mulihebwa. Okusemererwa kwanyu kuhikirre.”​—Yohana 14:6, 13, 14; 16:24.

Ebigambo binu byali bikuru muno. Katondogorozi emu ey’erukukwata ha Baibuli ebibazaaho “nk’isomo erikuru muno omu byafaayo by’okusaba.” Yesu atamanyise ngu tusemeriire kusaba uwe omu kiikaro kya Ruhanga. Oihireho, akaba n’akinguraho omuhanda omuhyaka ogurukuhika hali Yahwe Ruhanga.

Ky’amananu ngu Ruhanga aikaire n’ahurra esaara z’abaheereza be abesigwa. (1 Samuiri 1:9-19; Zabuli 65:2) Baitu, kurugira kimu omu kasumi Isaleri yafookere bantu ba Ruhanga ab’ekiragaano, abo abaagonzaaga esaara zaabo kuhulirwa baali baine kumanyirra Isaleri nk’ihanga Ruhanga ery’akaba akomeremu. Kandi hanyuma, kuruga omu kasumi ka Sulemani, baali baine kumanyira yekaru nk’ekiikaro Ruhanga eky’akaba akomeremu kuhayo ebihongwa. (Ekyebiragiro 9:29; 2 Ekyebyomubusinge 6:32, 33) Baitu nabwo okuramya kwa mulingo gunu kwali kw’akacu kake. Nk’oku omukwenda Paulo yahandiikire, Ekiragiro ekyali kihairwe abaisaleri n’ebihongwa ebyahebwayoga ha yekaru byali biri “ekiituru ekyebirungi ebikaba nibigenda okuija, kunu tikiri kisisani mali mali kyebigambo.” (Abaheburaniya 10:1, 2) Ekiituuru kyali kiine kurugiza ebintu byonyini. (Abakolosai 2:17) Kuruga omu 33 C.E., enkoragana y’omuntu na Yahwe ekaba etekyasigikirra ha kuhondera Ebiragiro bya Musa. Oihireho, n’esigikirra ha kworobera ogu Ebiragiro oubyakiikirraga​—Kristo Yesu.​—Yohana 15:14-16; Abagaratiya 3:24, 25.

Yesu akanjura akintu ekirukukirayo obukuru ekitusemeriire kusigikirraho kuhikirra Yahwe obuyayebalizeeho nk’omunywani ow’amaani ow’asobora kukingurraho esaara zaitu zikasobora kuhulirwa Ruhanga n’okuzigarukamu. Kiki ekisobozesa Yesu kutukiikirra omu mulingo ogu?

Nk’oku itwena twazaliirwe omu kibi, busaho bintu ebitwali nitusobora kukora rundi ebihongwa ebitwali nitusobora kuhayo bikatwogyaho ekitonyezi kinu rundi kututungisa obugabe obw’okuba n’enkoragana enungi na Ruhanga waitu ow’ahikiriire Yahwe. (Abarumi 3:20, 24; Abaheburaniya 1:3, 4) Baitu, Yesu akahayo obwomeezi bwe obuhikiriire kandi yasasura ebibi by’abantu abaali nibetaaga kucungurwa. (Abarumi 5:12, 18, 19) Hati, abo boona abarukwetaaga kucungurwa baine omugisa ogw’okutunga enkoragana enungi na Yahwe n’okwegondeza omu ‘bumanzi obw’okubaza’ na Ruhanga​—baitu eki nikisoboka kakuba baikiririza omu kihongwa kya Yesu kandi bakasaba omu ibara lye.​—Abefeso 3:11, 12.

Obutusaba omu ibara lya Yesu, tuba nitwoleka ngu nitwikiririza hakire omu miringo esatu ey’omulimo gwe omu kuhikiriza ekigendererwa kya Ruhanga: (1) Nuwe “Omwana gwentama ogwa Ruhanga,” ekihongwa kye kituha omugisa ogw’okuganyirwa ebibi. (2) Akahumbuurwa Yahwe kandi hati n’akora nka “nyakatagara omukuru” kutuhikyaho ebirungi by’ekicunguro. (3) Nuwe wenka anyakuli “muhanda” ogutuhikya hali Yahwe obutusaba.​—Yohana 1:29; 14:6; Abaheburaniya 4:14, 15.

Kusaba omu ibara lya Yesu kimuhaisa ekitiinisa. Ekitiinisa nk’eki kimusemeriire habwokuba ekigendererwa kya Yahwe kiri ngu “omu ibara lya Yesu amaju gona gatezebwe . . . , kandi nendimi zona zatule ngu Yesu Kristo nuwe Mukama, hali okukugizibwa kwa Ruhanga Isitwe.” (Abafiripi 2:10, 11) Baitu, ekirukukira obukuru kiri ngu Kusaba omu ibara lya Yesu kihaisa Yahwe ekitiinisa, ayahaireyo Omwana we nukwo tugasirwe.​—Yohana 3:16.

Kutukonyera kwetegereza obukuru bw’ekiikaro kya Yesu, Baibuli ekozesa ebitiinisa bingi n’amabara maingi obw’eba n’emubazaaho. Binu bitukonyera kumanya ebirungi bingi ebitutunga kusigikirra hali Yesu ebyatukoliire, ebyaliyo n’atukorra n’ebyaratukorra omu kasumi katali ka hara. (Rora akasanduuko “ Omulimo gwa Yesu Omukuru”.) Mali Yesu ahairwe “ibara erirukukira amabara gona.” * Obusobozi bwona omu iguru n’omu nsi bumuhairwe.​—Abafiripi 2:9; Matayo 28:18.

Ego, esaara zaitu tusemeriire kuzirabya omu ibara lya Yesu obuturaaba nitugonza Yahwe azihurre. (Yohana 14:13, 14) Baitu titurukugonza kugifoora ngeso kwikara nitubaza ebigambo “omu ibara lya Yesu.” Habwaki?

Tekerezaaho ekyokurorraho kinu. Kakuba otunga ebbaruha kuruga hali omusuubuzi, n’esobora kumalirra n’ebigambo binu “Kuruga ha mutima gwange.” Oyehurra ngu ebigambo binu biba nibyoleka enyehurra y’omusuubuzi ogu rundi aikaire n’ahondera omulingo bahandiikamu ebbaruha kwonka? Mali tusemeriire kukozesa ibara lya Yesu omu saara zaitu omu mulingo ogw’amakuru hatali kusisana nk’abarukumalirra kuhandiika ebbaruha ey’eby’obusuubuzi. N’obukiraaba ngu tusemeriire ‘kusabaga butoosa,’ tusemeriire kukikora ‘n’omutima gwaitu gwona,’ hatali kuhikiriza omukoro kwonka.​—1 Abasesalonika 5:17; Zabuli 119:145.

N’osobora ota kwetantara kukozesa ebigambo “omu ibara lya Yesu” kuhikiriza omukoro kwonka? Habwaki otecumiitirizaaho emiringo ya Yesu ey’erukuhuumuza? Tekerezaaho eby’akozere hamu n’ebyatekaniize kukukorra. Obworaaba n’osaba, siima Yahwe kandi omukugize habw’omulingo ogurukuhuniiriza ogw’akozesezeemu Omwana we. Obw’orakikora, noija kweyongera kwesiga omurago gwa Yesu ogurukugamba: “Obumulisaba Isenyowe ekigambo kyona, alikibaha omu ibara lyange.”​—Yohana 16:23.