Ebbaruha ya Yuda 1:1-25
1 Nyowe Yuda, omwiru wa Yesu Kristo, baitu mugenzi wa Yakobbo, nimpandiikira abaayeserwe, abarukugonzebwa Ruhanga Isiitwe kandi abalinzirwe habwa Yesu Kristo:
2 Leka embabazi, obusinge, hamu n’okugonza bibongerweho.
3 Abagonzebwa, noobu kiraaba ngu mbaire nintamu amaani maingi kubahandiikira ebirukukwata ha kujunwa kwaitu itwena, nkakirora ngu nikyetaagisa kubahandiikira kubateererra kurwanirra muno okwikiriza kwanyu okwahairwe abarukwera omurundi gumu kyahwa.
4 Ensonga habwaki nimbahandiikira, eri ngu, abantu abamu abaarangirwe ira omu byahandiikirwe ngu balicwerwa omusango, bataahire omuli inywe mutakimanyire; abantu abo tibarukutiina Ruhanga kandi bafoire embabazi za Ruhanga enyingi muno,* eky’okwekwasizaaho kukora engeso ezijunzire* kandi tibali beesigwa hali ogu ayatuguzire, Mukama waitu Yesu Kristo.
5 Noobu kiraaba ngu binu byona mubimanyire kurungi, ningonza kubaijukya ngu Yahwe* noobu araaba yajunire abantu kuruga omu ihanga lya Misiri, hanyuma, akahwerekereza abo abatarayolekere okwikiriza.
6 Kandi bamalaika abaalekereho obujunaanizibwa bwabo n’ebiikaro byabo ebi basemeriire kubamu, akababohera omu mwirima kasira* ebiro n’ebiro, obu balindiriire omusango ogwa ha kiro ekikuru.
7 Omu mulingo nugwo gumu, abantu ab’omu Sodomu na Gomora n’embuga ezikaba ziherraineho bakeejumbira omu busiihani* ekihinguraine, baakora ebikorwa ebitali by’obuhangwa eby’okwegomba okw’omubiri; bakahwerekerezebwa omu murro ogutahwaho kuba ekyokurorraho hali itwe.
8 Noobu kiraaba ngu binu byona bikabaho, abantu banu baikara nibateekereza ebintu ebibi,* basiisa omubiri, bagaya ab’obusobozi, kandi babazaaho kubi ab’ekitiinisa.
9 Baitu Mikairi malaika omukuru* obu yatungire obutaikirraniza na Sitaani,* ha birukukwata ha mubiri gwa Musa, atalengeho kumucwera omusango naakozesa ebigambo ebirukujuma, baitu akagamba ati: “Leka Yahwe* akuhane.”
10 Baitu abantu abo nibabazaaho kubi ebintu byona ebi batarukwetegereza naakake. Bali nk’ebisoro ebitaine magezi, kandi beetwaza nk’ebisoro omu bintu byona ebi bakora kandi ekirugamu, beesiisa bonka.
11 Zibaboine, habwokuba bahondiire omuhanda gwa Kaini, kandi banguhire kukwata omuhanda ogutahikire ogwa Bbaramu habw’okugonza kutunga empeera, kandi bahwerekeriire omu bigambo bya Kora eby’obujeemu.
12 Abantu banu baba na inywe ha biihuro ebiteekaniziibwe kwolekangana okugonza, baitu bali nk’amabaale agaserekerwe hansi y’amaizi. Abaliisa abeeriisa bonka batarukutiina; ebicu ebitarumu maizi ebirukutwarwa omuyaga hanu na hali, emiti etarukwana ebijuma akasumi akookwana obu kahika, eyafiire kabiri* kandi eyaihirwe n’emihama;
13 ebigonzi eby’amaani ebya ha nyanja, ebirukusikuka bikakora ifuro ery’ensoni zaabo; enyunyuuzi ezitali omu muhanda gwazo, ezaahuliirwe omwirima kasira* ogw’ebiro n’ebiro.
14 Mali Enoka owa musanju kuruga hali Adamu, na uwe akababazaaho omu bunabbi, obu yagambire ati: “Dora! Yahwe* akaija n’abarukwera be emitwaro n’emitwaro
15 kucwera omusango boona, n’okugusingisa boona abatarukumutiina habw’ebikorwa byabo byona eby’okutatiina Ruhanga ebi baakozere omu mulingo ogw’okutatiina Ruhanga, na habw’ebintu byona ebibi, abasiisi abatarukutiina Ruhanga ebi baamubalizeeho.
16 Abantu banu batontorromi, bahyema habw’okutamarwa ebi baine omu bwomeezi, bahondera okwegomba kwabo bonka, kandi eminwa yabo ebaza ebigambo eby’amaani eby’okwehaisaniza, kandi bahaisaniza abandi habw’okugonza kugira eki baayetungira.
17 Baitu inywe abagonzebwa, mwijuke ebigambo ebyabagambiirwe kara* abakwenda ba Mukama waitu Yesu Kristo,
18 nkooku baabagambiraga bati: “Omu kasumi aka ha mpero halibaho abasekeerezi, nibakora ebintu eby’okutatiina Ruhanga habw’okuhondera okwegomba kwabo.”
19 Banu nubo baleetaho okwebaganizaamu, bali nk’ebisoro,* kandi batali b’eby’omwoyo.*
20 Baitu inywe abagonzebwa, mweyombeke ha kwikiriza kwanyu okurukukirayo okurukwera kandi musabe mwine omwoyo ogurukwera,
21 nukwo musobole kwikara omu kugonza kwa Ruhanga, obu mulindiriire embabazi za Mukama waitu Yesu Kristo eziraabasobozesa kutunga obwomeezi obutahwaho.
22 Ekindi, mweyongere kwoleka embabazi hali abamu abarukugurukyagurukya;
23 mubajune obu nimubasika kuruga omu murro. Baitu mugumizeemu kwoleka embabazi abantu abandi, nimukikora omu kutiina, obu nimunoba n’ekijwaro omubiri eki gutaireho ebitoonyezi.
24 Ruhanga ow’asobora kubalinda kutatabaijuka kandi mukeemerra omu maiso g’ekitiinisa kye mutaine kamogo, kandi musemeriirwe muno,
25 Ruhanga omu wenka Omujuni waitu kuraba omu Yesu Kristo Mukama waitu, aheebwe ekitiinisa, obukuru, amaani, n’obusobozi kuruga ira na ira, na hati, kandi n’ebiro n’ebiro. Amiina.
Obugambo Obuli Hansi
^ Rora, Kusoborra Ebigambo; “Embabazi enyingi muno.”
^ Rundi, “ebikorwa ebirukuswaza.” Omu Ruyonaani a·selʹgei·a. Rora, Kusoborra Ebigambo; “Engeso ezijunzire.”
^ Rora, Ebyong. A5.
^ Rundi, “mwingi muno.”
^ Rora Kusoborra Ebigambo; “Obusiihani.”
^ Nkooku kiri, “baroosi b’ebirooto.”
^ Rora, Kusoborra Ebigambo.
^ Nkooku kiri, “Diabolo,” ekirukumanyisa “omuhangirizi.” Rora, Kusoborra Ebigambo; “Diabolo.”
^ Rora, Ebyong. A5.
^ Rundi, “eyafeeriire kimu.”
^ Rundi, “omwingi muno.”
^ Rora, Ebyong. A5.
^ Rundi, “ebintu ebyarangirwe.”
^ Rundi, “bantu b’omubiri.”
^ Nkooku kiri, “b’omwoyo.”
