Nghena endzeni

Bibele Yi Ri Yini Hi Ku Hetisa Munhu La Vabyelaka Ku Fa?

Bibele Yi Ri Yini Hi Ku Hetisa Munhu La Vabyelaka Ku Fa?

Nhlamulo ya le Bibeleni

Bibele a yi vulavuli hi ku kongoma hi mhaka leyi. * Hambiswiritano, ku na leswi Bibele yi swi vulaka hi vutomi ni rifu. Ku hetisa munhu swi hoxile kambe a ku na xivangelo xo tirhisa muchini wihi na wihi loko munhu a lava ku fa ku endlela leswaku a hefemula, ku ri hi leswaku a nge he hanyi.

Bibele yi vula leswaku Xikwembu i Muvumbi wa hina ni “xihlovo xa vutomi.” (Pisalema 36:9; Mintirho 17:28) Vutomi bya kwetsima ematihlweni ya Xikwembu. Hikwalaho ka sweswo, Xikwembu xi venga ku tidlaya ni ku dlaya munhu un’wana. (Eksoda 20:13; 1 Yohane 3:15) Ku engetela kwalaho, Bibele yi vula leswaku hi fanele hi endla leswi hi nga swi kotaka leswaku hi sirhelela vutomi bya hina ni bya van’wana. (Deteronoma 22:8) Swi le rivaleni, leswaku Xikwembu xi lava leswaku hi teka nyiko leyi yi ri ya nkoka.

Ku vuriwa yini loko munhu a vabyela ku fa?

Bibele a yi swi seketeli ku hetisa munhu, hambiloko a vabyela ku fa. Xikombiso xa Hosi Sawulo wa le Israyele xi seketela mhaka leyi. Loko a vavisekile swinene enyimpini, u kombele nandza wakwe leswaku a n’wi hetisa. (1 Samuwele 31:3, 4) Kambe nandza wakwe u arile. Hambiswiritano, hi ku famba ka nkarhi wanuna un’wana u lave ku endla leswi Sawulo a a swi lava. Davhida u vule leswaku wanuna yoloye u na nandzu wa ngati, Davhida a anakanyisise hi ndlela leyi Xikwembu xi tekaka mhaka yoleyo ha yona.—2 Samuwele 1:6-16.

Xana swi fanerile ku va munhu a vekiwa eka michini leyi nga ta n’wi pfuna ku hefemula hambiloko a nga ha ta hanya?

Loko swi ri erivaleni leswaku munhu u ta fa, Bibele a yi vuli leswaku ku tirhisiwa michini yo karhi leyi nga endlaka leswaku a tama a hefemula. Ku ri na sweswo ku na leswi Bibele yi swi vulaka. Rifu i nala lonkulu naswona vuyelo bya xidyoho i rifu. (Varhoma 5:12; 1 Vakorinto 15:26) Nakambe, hambileswi hi nga swi laviki ku fa, a hi fanelanga hi chava rifu hikuva Xikwembu xi hi tshembisa leswaku xi ta pfuxa vafi. (Yohane 6:39, 40) Munhu la xiximaka vutomi u ta endla leswi a nga swi kotaka leswaku a kuma vutshunguri lebyi nga kona. Kambe, a swi vuli swona leswaku munhu a vekiwa emichinini leyi nga ta endla leswaku a tama a ha hefemula hambiloko a nga ha ta hanya.

Xana Xikwembu xa n’wi rivalela munhu la tisungaka?

E-e, Bibele a yi vuli leswaku munhu la tisungaka a nge rivaleriwi. Hambileswi ku tisunga ku nga xidyoho lexikulu, * Xikwembu xa swi twisisa loko munhu a endla tano hileswi a vabyaka emiehleketweni kumbe a tshikilelekile swinene. (Pisalema 103:13, 14) Yehovha wa hi chavelela hi ku tirhisa Bibele, loko hi tshikilelekile. Ku engetela kwalaho, Bibele yi vula leswaku “ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Leswi swi kombisa leswaku hi ni ntshembo wa leswaku hambi ku ri vanhu lava endleke swihoxo leswikulu, swo fana ni ku tisunga va ta pfuxiwa.

^ par. 3 Ku hetisa munhu loyi a vabyelaka ku fa, swi hlamuseriwa tanihi ku “dlaya munhu loyi a vabyaka swinene kumbe la vavisekeke swinene leswaku a nga twi ku vava kumbe ku xaniseka.” (Merriam-Webster Learner’s Dictionary) Loko dokodela a pfuna muvabyi ku endla tano swi vitaniwa ku tisunga hi ku pfuniwa hi dokodela.

^ par. 10 Swiendlakalo swi nga ri swingani leswi boxiweke eBibeleni swa vanhu lava tisungeke, i swa vanhu lava nga endlangiki swilo hi ndlela ya Xikwembu.—2 Samuwele 17:23; 1 Tihosi 16:18; Matewu 27:3-5.