Eka nhlokomhaka leyi hundzeke hi kambisise xikombiso lexi Yesu a xi nyikeleke. Xikombiso xexo xi swi veka erivaleni leswaku Mfumo wa Xikwembu wu simekiwile etilweni laha Yesu Kreste a nga Hosi ya wona.

Bibele yi vula leswaku loko Yesu a sungula ku fuma etilweni u hlongole Sathana ni madimona yakwe. Sweswi va hlasela misava naswona leswi hi swona swi endleke leswaku swilo swi ya swi nyanya ku biha ku sukela hi 1914.—Nhlavutelo 12:7, 9.

Ku nga khathariseki ku nyanya ka swiyimo swa misava, Yesu tanihi Hosi ya Mfumo wa Xikwembu, u endle swo karhi leswaku a pfuna vanhu emisaveni hinkwayo. Vo tala va dyondza ni ku tlhela va tirhisa misinya ya milawu ya Bibele evuton’wini bya vona hikwalaho ka ntirho lowu endliwaka emisaveni hinkwayo wo dyondzisa Bibele lowu Yesu a profeteke ha wona. (Esaya 2:2-4) Timiliyoni ta vanhu ti dyondze ku nga rhangisi ntirho wo tihanyisa evuton’wini bya vona, ku antswisa ndlela leyi va hanyaka ha yona endyangwini ni ku va ni langutelo lerinene hi rifuwo. Vanhu volavo va dyondza leswi nga va vuyerisaka sweswi naswona va va muxaka wa vanhu lava Xikwembu xi va lavaka ehansi ka Mfumo wa xona.

Hambileswi Yesu a fumaka etilweni, mimfumo ya vanhu ya ha fuma laha misaveni. Hambiswiritano, Xikwembu xi byele Yesu xi ku: “Famba u ya hlula exikarhi ka valala va wena.” (Pisalema 110:2) Ku nga ri khale Yesu u ta herisa hinkwavo lava nga yimiki na yena kambe lava tiyimiseleke ku yingisa Xikwembu u ta va herisela swiphiqo.

Hi nkarhi wolowo Mfumo wa Xikwembu wu ta teka goza ro

• Herisa vukhongeri bya mavunwa. Vukhongeri lebyi dyondziseke vanhu mavunwa hi Xikwembu byi tlhela byi tikisela vanhu vutomi byi ta va byi herisiwile. Bibele yi fanisa vukhongeri bya mavunwa ni nghwavava. Ku herisiwa ka byona ku ta tsema vanhu vo tala nhlana.—Nhlavutelo 17:15, 16.

• Herisa ku fuma ka vanhu. Mfumo wa Xikwembu wu ta teka goza ro herisa mimfumo ya vanhu.—Nhlavutelo 19:15, 17, 18.

• Herisa vanhu vo homboloka. Ku ta endleka yini hi vanhu lava tiyimiseleke ku endla swilo swo biha naswona va alaka ku yingisa Xikwembu? “Loko ku ri lavo homboloka, va ta dlayiwa emisaveni.”—Swivuriso 2:22.

• Herisa Sathana ni madimona. Sathana ni madimona a va nge he swi koti ku “hambukisa matiko.”—Nhlavutelo 20:3, 10.

Xana leswi hinkwaswo swi ta vula yini eka lava amukelaka Mfumo wa Xikwembu?

Leswi se a fumaka tanihi Hosi etilweni, Yesu u ta endla swilo swo tala leswi mimfumo ya vanhu yi tsandzekaka ku swi endla. U ta pfuniwa hi lava 144 000 lava nga ta fuma na yena lava hlawuriweke evanhwini. (Nhlavutelo 5:9, 10; 14:1, 3) U ta tiyiseka leswaku ku rhandza ka Xikwembu ka endleka laha misaveni. I yini leswi Mfumo wa Xikwembu wu nga ta swi endlela vanhu lava nga ta va va hanya laha misaveni?

• Wu ta herisa mavabyi ni rifu. “Ku hava munhu la tshamaka kona la nga ta ku: ‘Ndza vabya,’” naswona “rifu a ri nge he vi kona.”—Esaya 33:24; Nhlavutelo 21:4.

• Wu ta endla leswaku ku va ni ku rhula ni nsirhelelo. “Ku rhula ka vana va wena ku ta tala” naswona “va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka.”—Esaya 54:13; Mikiya 4:4.

• Wu ta nyika vanhu ntirho lowu enerisaka. “Ntirho wa mavoko ya vona, vahlawuriwa va mina va ta wu tirhisa hi xitalo. A va nge tirheli swa hava hi matimba.”—Esaya 65:22, 23.

• Wu ta lulamisa swiphiqo swa mbango. “Mananga ni ndhawu leyi nga riki na mati swi ta khana, ni timbala ta le kwandzasini ti ta tsaka, ti rhumbuka kukota safroni.”—Esaya 35:1.

• Wu ta dyondzisa vanhu leswi va faneleke va swi endla leswaku va hanya hilaha ku nga heriki. “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Xikwembu xi lava leswaku u tiphina hi mikateko leyi. (Esaya 48:18) Nhlokomhaka leyi landzelaka yi ta hlamusela leswi u nga swi endlaka sweswi leswaku u tiphina hi vutomi lebyi byo tsakisa.