HI NTOLOVELO vanhu va le Kazakhstan a va hanya tanihi vatsendzeleki. Ninamuntlha, varisi van’wana va le Kazakhstan va yisa mintlhambi ya vona emadyelweni yo hambanahambana hi ku ya hi tinguva ta kona. Hi ximumu, va risela mintlhambi ya vona etindhawini ta le tintshaveni laha ku nga hisiki ngopfu. Leswi hi xixika ku vaka ni gamboko va yisa mintlhambi ya vona etindhawini leti kufumelaka.

Vanhu van’wana va le Kazakhstan va tshama emadorobeni ya manguva lawa lama hluvukeke. Hambiswiritano, swilo swo tala swa ndhavuko, swakudya ni swilo leswi endliweke hi mavoko swi kombisa leswaku vakokwa wa vona a ku ri vatsendzeleki. Vanhu va le Kazakhstan i vanhu lava rhandzaka swiphato, tinsimu ni vuyimbeleri bya swichayachayana.

 Tindlu leti rhwalekaka ta xirhendzevutana leti vanhu va le Kazakhstan a va tshama eka tona khale se ti hlayiseriwa ku va xikombiso xa ndlela leyi khale a va hanya ha yona. Varisi va ha ti tirhisa tiyindlu leti naswona vanhu lava tshamaka etindhawini leti hluvukeke va tala ku ti tirhisela swiendlakalo swo hlawuleka. Nakambe ti tirhiseriwa ku rhurhela vanhu lava teke ku ta valanga. Tiyindlu leti ti tlhela ti tirhiseriwa ku navetisa swilo swa mavoko leswi endliwaka hi vavasati va le Kazakhstan.

Vanhu va le Kazakhstan lava tshamaka emakaya va rhandza tihanci. Ku ni marito ya 21 ya Xikazakh yo vula hanci, lama hinkwawo ka wona ma nga ni tinhlamuselo naswona ku ni marito yo tlula 30 yo hlamusela mihlovo ya malapi lama vekiwaka ehenhla ka hanci. Hanci leyi hanyeke kahle ya durha naswona yi tekiwa yi ri ya nkoka swinene. Emakaya vafana va dyondza ku khandziya tihanci va ha ri vatsongo.

Hi ku ya hi ndhavuko wa vanhu va le Kazakhstan, swakudya swa vona swi katsa ni nyama naswona hi ntolovelo a va cheli swipayisisi. Koumiss, i swakunwa leswi rhandziwaka ngopfu eKazakhstan, leswi endliweke hi meleka wa hanci naswona ku vuriwa leswaku swi ni rihanyo kasi shubat i swakunwa leswi endliweke hi meleka wa kamela.

Rhavi ra Timbhoni ta Yehovha ra le Alamty ri rhamba vaendzi leswaku va ta valanga.