Ku Lavana Ni Tinhlamulo
Ku Lavana Ni Tinhlamulo
“Un’wana ni un’wana u ni vonelo rakwe ro hlamusela leswaku [Yesu] i mani. Ku nga khathariseki leswaku hi ni ripfumelo kumbe ha kanakana, hinkwerhu hi tivutisa xivutiso lexi nge: ‘I mani wanuna loyi?’”—MUTSARI STAN GUTHRIE.
VANHU va lava ku tiva hi Yesu. Ku xavisiwe tibuku to tala leti vulavulaka ha yena. Tifilimi leti vulavulaka ha yena ti rhandziwa swinene. Hambiswiritano, vanhu vo tala va ha ri ni swivutiso malunghana na Yesu. Vanhu va ni mavonelo yo hambana-hambana malunghana ni leswaku Yesu kahle-kahle a a ri mani.
Emalembeni ma nga ri mangani lama hundzeke, vateki vambirhi va mahungu va kombele vanhu leswaku va hlamula xivutiso lexi a xi ri eka Internet lexi nge: “Xana Yesu a a ri mani?” Tinhlamulo ta kona a ti katsa leti landzelaka:
● “Ku vuriwa leswaku a a ri rabi (mudyondzisi) loyi a vekeke xikombiso hi ku va ni ntwela-vusiwana evuton’wini byakwe.”
● “A a ri munhu la tolovelekeke loyi a a hanya vutomi lebyi xiyekaka.”
● “A ku na vumbhoni bya leswaku Yesu u tshame a va kona.”
● “Yesu i N’wana wa Xikwembu loyi a velekiweke, a fa ivi a pfuxiwa eka lava feke leswaku a hi ponisa eka swidyoho swa hina. Namuntlha wa hanya naswona U ta tlhela a ta laha misaveni.”
● “Ndza tshemba leswaku Yesu Kreste i n’wana wa Xikwembu a ri yexe, i munhu wa nyama ni ku tlhela a va munhu wa moya hi nkarhi wun’we.”
● “I swihlangi ntsena leswi tshembaka switori swa Yesu.”
Swi le rivaleni leswaku a hi mavonelo hinkwawo lama nga ntiyiso. Xana xi kona xihlovo xin’we xa rungula lexi tshembekaka lexi nga nyikelaka tinhlamulo leti tshembekaka ta swivutiso swa hina malunghana na Yesu? Vakandziyisi va magazini lowu va tshemba leswaku Bibele i Rito ra Xikwembu ni leswaku hi rona ntsena ri hi byelaka ntiyiso lowu heleleke malunghana na Yesu. *—2 Timotiya 3:16.
Eka xihloko lexi landzelaka, hi ta kambisisa tinhlamulo ta le Bibeleni ta swivutiso swin’wana leswi tolovelekeke malunghana na Yesu. U vule leswaku ku pona ku nga kumiwa hi “un’wana ni un’wana loyi a kombisaka ripfumelo eka yena.” (Yohane 3:16) Ha ku rhamba leswaku u kambisisa tinhlamulo ta kona kutani u tiendlela xiboho loko u lava ku dyondza leswi engetelekeke hi Yesu ni leswaku u nga kombisa ripfumelo eka yena hi ndlela yihi.
[Nhlamuselo ya le hansi]
^ par. 11 Leswaku u kuma rungula leri engetelekeke, vona ndzima 2 ya xihloko lexi nge “Bibele I Buku Leyi Humaka Eka Xikwembu” ebukwini leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.
