Nghena endzeni

Hundzela eka leswi nga endzeni

Abrahama—Wanuna Wa Ripfumelo

Abrahama—Wanuna Wa Ripfumelo

 Abrahama—Wanuna Wa Ripfumelo

Abrahama u yime ehandle endhawini leyi rhuleke nimadyambu. Loko a ri karhi a languta ehenhla ematilweni lama vangamaka lama nga ni tinyeleti, a a ehleketa hi xitshembiso xa Xikwembu xa leswaku vatukulu vakwe a va ta tala ku fana ni tinyeleti teto. (Genesa 15:5) Eka Abrahama, tinyeleti i xitsundzuxo lexi vonakaka xa xitshembiso xa Yehovha. Nakambe a ti ri xitiyisekiso. Phela, loko Yehovha a ri ni matimba yo tumbuluxa vuako hinkwabyo lebyikulu ni swilo hinkwaswo leswi nga eka byona, xana a a nga ta swi kota ku endla leswaku Abrahama na Sara va kuma n’wana? Rolero i ripfumelo leri Abrahama a ri na rona.

I YINI RIPFUMELO? Hilaha ri tirhisiweke hakona eBibeleni, “ripfumelo” ri kombetela eka ku pfumela eka nchumu lowu nga voniwiki. Ripfumelo ro tano ri sekeriwe eka vumbhoni lebyi tiyeke. Munhu loyi a nga ni ripfumelo eka Xikwembu u dzika eka ku hetiseka ka switshembiso swa Yehovha, a ri ni ntshembo wa leswaku hambi ko ba lexi dumaka se swi hetisekile.

XANA ABRAHAMA U RI KOMBISE NJHANI RIPFUMELO? Abrahama u kombise leswaku a a tshembela eka switshembiso swa Xikwembu. Hikwalaho ka ripfumelo rakwe leri tiyeke, Abrahama u rhurhe etikweni leri a velekiweke eka rona, a ri ni ntshembo wa leswaku Yehovha a a ta hlayisa xitshembiso xakwe xo n’wi komba tiko rin’wana. Hi ripfumelo, Abrahama u tsendzeleke ni tiko hinkwaro ra Kanana, a ri ni ntshembo wa leswaku eku heteleleni vatukulu vakwe a va ta kuma tiko rero. Hi ripfumelo, Abrahama u yingise lerova a tiyimisela ku nyikela Isaka tanihi gandzelo, a ri ni ntshembo wa leswaku loko swi koteka, Yehovha u ta n’wi pfuxa Isaka.—Vaheveru 11:8, 9, 17-19.

Abrahama a a dzike eka swilo swa nkarhi lowu taka ematshan’weni ya swilo swa nkarhi lowu nga hundza. Hambileswi Abrahama na Sara swi nga ha endlekaka leswaku va tiphine hi vutomi bya vulovolovo eUra ku tlula ndlela leyi va tiphineke ha yona eKanana, “a va nga tshameli ku tsundzuka ndhawu leyi va  humeke eka yona.” (Vaheveru 11:15, Today’s English Version) Ematshan’weni ya sweswo, va dzike eka ndlela leyi Xikwembu a xi ta va katekisa ha yona ni vatukulu va vona enkarhini lowu taka.—Vaheveru 11:16.

Abrahama a ri ni xivangelo lexinene xo va ni ripfumelo eka Xikwembu. Yehovha u hlayise switshembiso hinkwaswo. Vatukulu va Abrahama eku heteleleni va andzile va va tiko leri tiviwaka tanihi Israyele. Hi ku famba ka nkarhi, Vaisrayele va sungule ku hanya etikweni ra Kanana, tiko leri Yehovha a ri tshembiseke Abrahama.—Yoxuwa 11:23.

I YINI LESWI HI SWI DYONDZAKA? Hi nga tiyiseka leswaku Yehovha a nga hlayisa switshembiso swakwe. Hambiloko swin’wana swa swona swi vonaka swi nga koteki hi ku ya langutelo ra munhu, hi tshemba leswaku “eka Xikwembu swilo hinkwaswo swa koteka.”—Matewu 19:26.

Xikombiso xa Abrahama xi hi dyondzisa ku dzika eka leswi hi nga ta tiphina ha swona enkarhini lowu taka, ku nga ri swilo swa nkarhi lowu hundzeke. Leswi hi swona leswi wanuna la vuriwaka Jason a dyondzeke ku swi endla. U khomiwe hi vuvabyi lebyi tsanisaka lebyi n’wi siyeke a lamarile hi ku helela. U ri: “Ndza pfumela leswaku ku ni minkarhi leyi ndzi tikumaka ndzi ri karhi ndzi ehleketa hi swilo swa nkarhi lowu nga hundza.” U engetela a ku: “A swi talanga swilo leswi ndzi swi kumbukaka swinene ku tlula ku vukarha nsati wa mina, Amanda.”

Nilokoswiritano, Jason u ni ripfumelo leri heleleke ra leswaku Yehovha u ta hetisisa switshembiso swakwe, ku katsa ni xitshembiso xa leswaku ku nga ri khale misava ya hina yi ta va paradeyisi naswona vanhu vo tshembeka va ta kuma vutomi lebyi nga heriki lebyi nga ni rihanyo leri hetisekeke. * (Pisalema 37:10, 11, 29; Esaya 35:5, 6; Nhlavutelo 21:3, 4) Jason u ri: “Ndzi ti tsundzuxa leswaku minkarhi leyinene yi kwala nyongeni, ku nga ri khale swilo leswi hinkwaswo swi ta hela—ntshikilelo, mivilelo, gome, ku titwa nandzu—naswona swi ta heriseriwa makumu.” Mawaku xikombiso lexinene xa ripfumelo ro fana ni ra Abrahama!

[Nhlamuselo ya le hansi]

^ par. 9 Leswaku u kuma rungula leri engetelekeke malunghana ni paradeyisi ya laha misaveni ya nkarhi lowu taka, vona tindzima 3, 7 na 8 ta buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.