I kangani u vuleke marito wolawo kumbe u ma byela van’wana loko u pfula magazini lowuntshwa wa nkandziyiso wa vandlha? Swi teka nkarhi wo tala ku lunghiselela swifaniso swo tano swo saseka naswona swi hoxiwe hi xikongomelo. Swi vekeriwe ku khumba timbilu ta hina ni ku hi pfuna ku anakanyisisa hi dyondzo ya kona. Swi nga hi pfuna ngopfu-ngopfu loko hi lunghiselela kumbe loko hi hlamula eka Dyondzo ya Xihondzo xo Rindza.

Hi xikombiso, nkarhi wun’wana ni wun’wana loko u lunghiselela xihloko, anakanyisisa hi leswaku xifaniso lexi hoxiweke eku sunguleni ka xihloko xin’wana ni xin’wana lexi dyondziwaka evandlheni xi hoxiwe hi xikongomelo xihi. Xi kombisa yini? Ha yini xi hlawuriwile? Xi fambisana njhani ni nhloko-mhaka kumbe tsalwa leri xihloko xi sekeriweke eka rona? Kutani anakanya hi ndlela leyi swifaniso leswin’wana leswi nga exihlokweni xolexo swi ku pfunaka ha yona ku twisisa mhaka leyi ku buriwaka ha yona ni ndlela leyi swi ku khumbaka ha yona.

Mufambisi wa Dyondzo ya Xihondzo xo Rindza u fanele a nyika vamakwerhu nkarhi wo hlamusela xifaniso xin’wana ni xin’wana, va hlamusela ndlela leyi xi fambisanaka ha yona ni leswi dyondziwaka kumbe leswaku un’wana ni un’wana xi n’wi khumba njhani. Minkarhi yin’wana, ku tsariwa marito ekusuhi ni xifaniso lama kombisaka ndzimana leyi xi fambisanaka na yona. Kasi minkarhi yin’wanyana, mufambisi wa dyondzo a nga ha hlawula leswaku xifaniso xo karhi ku ta buriwa ha xona eka ndzimana yihi. Hi ndlela yoleyo, hinkwavo va ta vuyeriwa swinene eka leswi endliweke ku pfuna muhlayi a ti twisisa kahle tidyondzo leti kumekaka eRitweni ra Xikwembu.

Makwerhu un’wana u swi veke hi ndlela leyi, “Endzhaku ko hlaya xihloko lexi tsariweke hi ndlela yo xonga swinene, swifaniso swi endla leswaku xihloko xi tsakisa swinene.”