Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Ku Pfuna Vahlayi Va Hina Hi Ku Tirhisa Swifaniso

Ku Pfuna Vahlayi Va Hina Hi Ku Tirhisa Swifaniso

Minkandziyiso yo tala ya Timbhoni ta Yehovha yi ni swifaniso swa mihlovo-hlovo leswi fambisanaka kahle ni marito ya kona kambe khale a swi nga ri tano. Nkandziyiso wo sungula wa Zion’s Watch Tower lowu kandziyisiweke hi 1879, a wu nga ri na swifaniso. Ku hundze makume ya malembe minkandziyiso ya hina yi ri ni marito ntsena, kambe minkarhi yin’wana a yi va ni swifaniso swa muvala wa ntima ni wo basa.

Sweswi minkandziyiso ya hina yi tele hi swifaniso. Vampfampfarhuti va hina ni vateki va swifaniso hi vona va endlaka ntirho lowu u wu vonaka eka minkandziyiso ni le ka Website leyi. Ku endla ndzavisiso hi vukheta ni hi vurhon’wana swa pfuna eku endleni swifaniso leswi dyondzisaka matimu ya nkoka ni ntiyiso wa Bibele.

Hi xikombiso, languta xifaniso lexi kombisiweke eka xihloko lexi, lexi humelelaka eka ndzima 19 ya buku leyi nge ‘Chumayela Mfumo Wa Xikwembu Hi Rixaladza.’ Yi kombetela eKorinto wa khale. Hilaha ku hlamuseriweke hakona eka ndzima 18 ya buku ya Bibele ya Mintirho, muapostola Pawulo u le mahlweni ka xitshamo xa vuavanyisi. Valavisisi va nyike vampfampfarhuti rungula malunghana ni swilo leswi tshuburiweke leswi yelanaka ni ndlela leyi swilo a swi ri ha yona ni muvala wa muako wa laha swi nga endlekaka leswaku Pawulo a yime kona emahlweni ka Galiyo. Nakambe valavisisi va nyikele rungula leri vulavulaka hi swiambalo swa vufumi leswi a swi tirhisiwa hi lembe-xidzana ro sungula le Rhoma leswaku hosana Galiyo loyi a nga exikarhi ka xifaniso a ta vonaka a ambale swona. U ambale tinguvu leti vuriwaka tunic na toga leti nga ni layini leyikulu ya muvala wa xivunguvungu ni tintangu leti vuriwaka calcei. Va tlhele va xiya leswaku loko Galiyo a yime emahlweni ka xitshamo xa vuavanyisi swi nga endleka a a langute n’walungu vupela-dyambu. Xisweswo mumpfampfarhuti a a ta swi kota kahle ku mpfampfarhuta xifaniso lexi hi ndlela leyi a xi ri ha yona.

Ku Hleriwa Ni Ku Humelela

Hi endla nhlengeleto wa swifaniso leswaku hi endla ndzavisiso ni ku va swi tlhela swi tirhisiwa. Se i malembe yo tala hi hlanganisa mimpfampfarhuto ni swifaniso hi ku ya hi minkandziyiso leyi swi humelelaka eka yona. Swifaniso a swi vekiwa hi ku ya hi nhloko-mhaka ya kona. Loko nhlengeleto lowu wu ya wu andza, ku kuma xifaniso ni ku tlhela u xi tirhisa a swi ya swi tika swinene.

Hi 1991, hi endle programe leyi vuriwaka Image Services System leyi kotaka ku hlengeleta rungula leri fikelelaka swilaveko swa hina swo hlawuleka. Sweswi progreme yoleyo yi hlayise swifaniso leswi tlulaka 440 000. Ku engetela eka swifaniso leswi humelelaka eka minkandziyiso ya hina, ku hlengeletiwe magidi ya swifaniso leswi engetelekeke leswi nga ta tirhisiwa enkarhini lowu taka eka minkandziyiso.

Ku hlayisiwe rungula ro tala leri katsaka leswaku xifaniso xin’wana ni xin’wana xi tirhisiwe rini naswona kwihi, mavito ya lava nga eka xifaniso ni nkarhi lowu swi humeleleke ha wona. Endlelo ro kuma swifaniso leswi faneleke hi xihatla ra pfuna loko ku lunghiseleriwa minkandziyiso leyintshwa.

Minkarhi yin’wana hi lava mpfumelelo wo tirhisa swifaniso swo karhi eka van’wamabindzu. Hi xikombiso, hi nga ha lava xifaniso xa ndlela leyi pulanete ya Saturn yi nga ha yona leswaku hi xi tirhisa eka nhloko-mhaka yo karhi eka Xalamuka! Vatirhi va hina va swa elektroniki va ta lava xifaniso lexi faneleke ivi va tihlanganisa ni n’wini wa xona ku kuma mpfumelelo wo xi tirhisa. Van’wana loko va xiya ntirho wa hina wo dyondzisa Bibele emisaveni hinkwayo, va hi nyika mpfumelelo mahala. Van’wana va lava leswaku hi hakela mali kumbe hi tsala vito ra n’wini wa xifaniso. Loko hi pfumelelanile, xifaniso xa kona hi xi tirhisa eka nkandziyiso naswona xi hlayisiwa eka nhlengeleto wa hina.

Namuntlha minkandziyiso ya hina yin’wana yi ni swifaniso swo tala. Hi xikombiso, eka website leyi hi ni Swifaniso Swa Timhaka Ta Le Bibeleni. Hi ni tibroxara leti nga ni mivalavala leti kumekaka eka website ni leti kandziyisiweke to tanihi leyi nge “Yingisa Xikwembu,” leyi dyondzisaka tidyondzo ta nkoka hi ku tirhisa marito ma nga ri mangani. Minkandziyiso leyi ni yin’wana leyi printiweke ni leyi nga eka Internet, hinkwayo yi sekeriwe eBibeleni.