Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Hikwalaho ka yini Vuhundzuluxeri Bya Misava Leyintshwa eka Deteronoma 31:2 byi vula leswaku Muxe a a nga ha ta “[pfumeleriwa] ku huma ni ku nghena” tanihi murhangeri wa Israyele, kasi vuhundzuluxeri byin’wana byi kombisa leswaku a a nga ha swi koti ku endla tano?

Hambileswi rito ra Xiheveru eka ndzimana leyi ri nga ha hundzuluxeriwaka hi tindlela timbirhi, vuhundzuluxeri byin’wana bya Tibibele ta Xitsonga byi kombisa leswaku eku heleni ka vutomi bya yena, Muxe a a tsanile, a nga ha swi koti ku hetisisa vutihlamuleri bya yena tanihi murhangeri. Hi xikombiso, Bibele Ya Xitsonga yi vula leswaku Muxe u te: ‘Namuntlha ndzi ni malembe ya 120; ndzi ta hluleka ku huma ni ku nghena exikarhi ka n’wina.’ Hilaha ku fanaka, Bibele—Mahungu Lamanene yi ri: “A ndza ha swi koti ku va mufambisi wa n’wina.”

Hambiswiritano, Deteronoma 34:7 yi kombisa leswaku, hambileswi Muxe a a kurile swinene, a a nga tsananga. Yi ri: “Muxe a a ri ni malembe ya 120 hi vukhale loko a fa. Mahlo yakwe a ma nga si tsana naswona ntamu wakwe lowukulu a wu nga si hela.” Xisweswo, Muxe a a swi kota ku rhangela tiko, kambe Yehovha a a nga ha swi rhandzi leswaku a ya emahlweni a va murhangeri. Sweswo swi kombisiwa hi leswi Muxe a nga swi vula loko a ku: ‘Yehovha u ndzi byerile a ku, “A wu nge wu peli nambu lowu wa Yordani.”’ Swi tikomba onge Yehovha a a phindha marito lawa a ma vuleke endhawini ya mati le Meriba.—Tinhlayo 20:9-12.

Muxe u hanye vutomi byo leha bya swiendlakalo swo tala, lebyi nga avanyisiwaka hi swiyenge swinharhu. Malembe ya 40 u ma hanye aEgipta, laha a “[leteriweke] hi vutlhari hinkwabyo bya Vaegipta” naswona “a a ri ni matimba emaritweni yakwe ni le swiendlweni swakwe.” (Mintirho 7:20-22) Eka malembe man’wana ya 40, u tshame eMidiyani. Kwalaho u hlakulele timfanelo ta moya leti n’wi pfuneke leswaku a rhangela vanhu va Yehovha. Eka malembe ya 40 yo hetelela, Muxe u kongomise Vaisrayele ni ku va langutela. Kambe sweswi, Yehovha u endle xiboho xa leswaku Yoxuwa, ku nga ri Muxe, a va yena loyi a rhangelaka tiko ri pela Nambu wa Yordani ri ya eTikweni leri Tshembisiweke.—Deteronoma 31:3.

Xisweswo, Vuhundzuluxeri Bya Misava Leyintshwa byi ni nhlamuselo leyi pakanisaka eka Deteronoma 31:2. Muxe u tshikisiwe hi Yehovha ku rhangela Vaisrayele, a nga tshikanga hikwalaho ka ku tsana ka miri.