Nghena endzeni

Hundzela eka leswi nga endzeni

Wa Tsundzuka Xana?

Wa Tsundzuka Xana?

 Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u ta swi kota ku hlamula swivutiso leswi landzelaka:

Xana Mukreste a nga endla yini loko a titwa a karhele emintlhavekweni ni le moyeni?

Hi fanele hi tiva lexi hi vangelaka ku karhala. Swi nga ha pfuna ku kambisisa mikhuva ya hina ni swilo leswi hi nga na swona, hi tirhula mpingu wun’wana ni wun’wana lowu nga lavekiki. Hi nga tivekela tipakani leti hi nga kotaka ku ti fikelela hi ku ya hi swiyimo swa hina. I swa nkoka ku khathalela rihanyo ra hina ra moya naswona hi fanele hi khongela nkarhi na nkarhi hi tlhela hi anakanyisisa hi leswi hi swi dyondzaka.—8/15, matluka 23-6.

Ha yini Timbhoni ta Yehovha ti teka nhlayo ya 144 000 yi ri ya xiviri?

Endzhaku ka loko muapostola Yohane a byeriwe hi ta vanhu lava 144 000, u vone “ntshungu lowukulu, lowu a ku nga ri na munhu la kotaka ku wu hlaya.” (Nhlavutelo 7:4, 9) Loko nhlayo ya 144 000 a yi ri yo fanekisela, mongo lowu hambanisaka tindzimana letimbirhi a wu ta lahleka. Yesu u vule leswaku lava nga ta fuma na yena i “ntlhambinyana.” (Luka 12:32)—9/1, tluka 30.

Ha yini Muisrayele a a pfumeleriwa ku xavisela munhu wumbe ntsumbu wa xifuwo lexi ngati ya xona yi nga halatiwangiki?

Munhu wumbe kumbe muluveri la nga riki muproselita a a nga ri ehansi ka Nawu. Hikwalaho Muisrayele a a pfumeleriwile ku n’wi nyika kumbe ku n’wi xavisela swiharhi swo tano. (Deteronoma 14:21) Kambe muproselita a a bohiwe hi Nawu, hikwalaho a a nga ta yi dya ngati ya xifuwo xo tano. (Levhitika 17:10)—9/15, tluka 26.

I swikombiso swihi leswi kombisaka ndlela leyi vanhu va kopelaka swilo swa ntumbuluko ha yona, naswona ha yini Vakreste va khumbeka hi mhaka leyi?

Endzhaku ko tiolola milenge munjhiniyara wa le Switzerland u vone magwanda lawa a ma tele eswiambalweni swakwe ni le voyeni bya mbyana ya yena, hiloko a endla nchumu wo fana ni swimitwana swa magwanda lawa, ku nga Velcro. Vana va ka Wright na vona va endle xihaha-mpfhuka endzhaku ko xiyisisa tinyenyana letikulu loko ti haha. Ndlela leyi yo kopela swilo swa ntumbuluko yi fanele yi susumetela Mukreste ku vangamisa Muvumbi.—10/1, tluka 9.

I mani la boxiweke eka 2 Vakorinto 12:2-4 tanihi loyi a tekeriweke eparadeyisini?

Tindzimana teto ti landzela tindzimana leti Pawulo a a lwela vuapostola byakwe eka tona. Leswi Bibele yi nga vulavuliki hi munhu un’wana loyi a humeleriweke hi mhaka yo tano ni leswi ku nga Pawulo loyi a hi byelaka hi yona, swi nga ha endleka ku ve Pawulo la voneke xivono lexi.—10/15, tluka 8.

Hi tihi timfanelo tin’wana ta Yesu leti n’wi endlaka a fanelekela ku va Murhangeri la hlawuriweke hi Xikwembu?

Yesu u hlayise vutshembeki hi ku helela, naswona mahanyelo yakwe a ma kombisa ku tshembeka ni ku lulama. A a tinyiketele eka Xikwembu hi ku helela. Yesu a a khathala swinene hi vanhu naswona a a tiyimiserile ku tirha.—11/1, matluka 6-7.

Madimona ma ta va ma ri kwihi hi nkarhi wa Gidi ra Malembe?

Swa twala loko hi gimeta hileswaku ma ta va ma pfaleriwe ekheleni ro enta swin’we na Sathana hi nkarhi wa Mfumo wa Kreste wa Gidi ra Malembe. (Nhlavutelo 20:1-3) Genesa 3:15 yi vulavule ka ha ri emahlweni hi ta ku pfotlosiwa ka nyoka enhlokweni, leswi katsaka ku pfaleriwa ka yena ekheleni ro enta hi nkarhi wa Gidi ra Malembe. Mbewu yakwe yi katsa tintsumi to homboloka, kumbe madimona. Leswi ma kombiseke leswaku ma chava ku pfaleriwa ekheleni ro enta swi kombisa leswaku ma ti tiva ta ku siveriwa ka wona loku ka ha taka. (Luka 8:31)—11/15, matluka 30-1.

Ha yini munhu a fanele a tivonela malunghana ni ku nwa swakunwa leswi nga ni xihoko, hambiloko a papalata ku nwa ku fikela laha vanhu va swi vonaka leswaku u pyopyiwile?

Vanhu van’wana a va tikombi leswaku va pyopyiwile ni loko va nwe swikalo swo hlayanyana. Hambiswiritano, munhu hakatsongo-tsongo a nga godzomberiwa hi byala kutani a va ‘hlonga ra vhinyo yo tala.’ (Tito 2:3) Yesu u lemukise hi ku “tshikileriwa hi ku dya ngopfu ni ku nwa ngopfu.” (Luka 21:34, 35) Munhu a nga khudzehela ni ku ngheniwa hi vulolo bya xiviri ni bya moya hambiloko a nga nwanga a dakwa.—12/1, matluka 19-21.