Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Loko muapostola Yohane a tsale leswaku “rirhandzu leri hetisekeke ri cukumetela ku chava ehandle,” xana i yini “rirhandzu leri hetisekeke,” naswona i “ku chava” kwihi loku cukumeteriwaka ehandle?

Muapostola Yohane u tsarile: “A ku na ku chava erirhandzwini, rirhandzu leri hetisekeke ri cukumetela ku chava ehandle, hikuva ku chava ku vanga xirhalanganya. Kunene, loyi a nga ehansi ka ku chava a nga si endliwa a hetiseka erirhandzwini.”—1 Yohane 4:18.

Mongo wu kombisa leswaku Yohane a a hlamusela hi ntshunxeko wo vulavula—ngopfu-ngopfu vuxaka lebyi nga kona exikarhi ka rirhandzu ra hina eka Xikwembu ni ntshunxeko wo vulavula na xona. Leswi swi nga voniwa eka leswi hi swi hlayaka eka ndzimana 17: “Leyi hi yona ndlela leyi rirhandzu ri endliweke ha yona ri hetiseka eka hina, leswaku hi va ni ntshunxeko wo vulavula hi siku ra vuavanyisi.” Mpimo lowu Mukreste a rhandzaka Xikwembu ha wona ni ku titwa a rhandziwa hi Xikwembu wu endla leswaku a va ni ntshunxeko wo vulavula—kumbe a nga vi na wona—loko a tshinelela Xikwembu hi xikhongelo.

Xiga lexi nge “rirhandzu leri hetisekeke” i xa nkoka. Hilaha ri tirhisiweke hakona eBibeleni, rito leri nge “hetisekeke” a hi minkarhi hinkwayo ri vulaka ku hetiseka hi ku helela, kambe hakanyingi ri vula ku hetiseka hi mpimo wo karhi kumbe hi ndlela yo karhi. Hi xikombiso, eDyondzweni ya yena ya le Ntshaveni, Yesu u te: “Mi fanele mi va lava hetisekeke, tanihi leswi Tata wa n’wina wa le tilweni a hetisekeke.” Yesu a a byela valandzeri va yena leswaku loko va rhandza ntsena lava kombisaka rirhandzu eka vona, rirhandzu ra vona a ri ta va ri nga hetisekanga, a ri ta va ri kayivela. A va fanele va endla leswaku rirhandzu ra vona ri hetiseka hi ku rhandza hambi ku ri valala va vona. Kutani, hi ku fanana, loko Yohane a tsale malunghana ni “rirhandzu leri hetisekeke,” a a vulavula hi rirhandzu leri kombisiwaka Xikwembu ku suka embilwini, leri hlakuleriwaka hi xitalo, leri munhu a ri kombisaka eka hinkwaswo leswi a swi endlaka evuton’wini byakwe.—Matewu 5:46-48; 19:20, 21.

Loko Mukreste a khongela eka Xikwembu, u swi tiva kahle leswaku i mudyohi naswona a nga hetisekanga. Hambiswiritano, loko rirhandzu ra yena eka Xikwembu ni ku titwa a rhandziwa hi Xikwembu swi kule hi ku helela, a nga siveriwi hi ku chava ku soriwa kumbe ku bakanyiwa. Ematshan’weni ya sweswo, u ni ntshunxeko wo vulavula, a phofula leswi nga embilwini ya yena ni ku kombela ku rivaleriwa exisekelweni xa gandzelo ra nkutsulo, leri Xikwembu xi hi nyikeke rona hi rirhandzu hi ku tirhisa Yesu Kreste. Wa tiyiseka leswaku Xikwembu xi swi amukela kahle swikombelo swa yena.

Xana munhu a nga “hetiseka erirhandzwini” hi ndlela yihi, xisweswo a xi ‘cukumetela ehandle’ xiphiqo xa ku chava ku soriwa kumbe ku bakanyiwa? Muapostola Yohane u te: “Mani na mani la hlayisaka rito ra [Xikwembu], entiyisweni rirhandzu ra Xikwembu ri hetisekisiwile eka munhu yoloye.” (1 Yohane 2:5) Anakanya: Loko Xikwembu xi hi rhandzile loko ha ha ri vadyohi, xana a xi nge hi rhandzi swinene loko hi hundzuka hakunene kutani hi hisekela ku ‘hlayisa rito ra xona’? (Varhoma 5:8; 1 Yohane 4:10) Hakunene, loko ntsena hi hambeta hi tshembekile, hi nga tiyiseka ku fana na muapostola Pawulo loko a vula leswi landzelaka malunghana ni Xikwembu: “Lexi hambi ku ri N’wana wa xona xi nga n’wi tsetselelangiki, kambe xi n’wi nyiketeke hikwalaho ka hina hinkwerhu, nakambe, xana a xi nge hi nyiki hi musa swilo leswin’wana hinkwaswo hikwalaho ka yena?”—Varhoma 8:32.