Nghena endzeni

Hundzela eka leswi nga endzeni

Ku Tsundzukiwa Ka “Vahlaseriwa Lava Rivariweke”

Ku Tsundzukiwa Ka “Vahlaseriwa Lava Rivariweke”

 Xiviko Xa Vahuweleri Va Mfumo

Ku Tsundzukiwa Ka “Vahlaseriwa Lava Rivariweke”

EKU sunguleni ka 2001, Haykaz, Mbhoni ya Yehovha ya malembe ya 15 hi vukhale, u teke riendzo ro ya valanga nkombiso wa “Vahlaseriwa Lava Rivariweke” le Bern, Switzerland, lowu a wu kombisa ku xanisiwa ka Timbhoni ta Yehovha hi Manazi. Endzhaku ka riendzo rakwe, Haykaz u te: “Ndzi tshame ndzi twa hi tihanyi ni ku xaniseka loku Timbhoni ta Yehovha ti langutaneke na kona ehansi ka mfumo wa Manazi, kambe sweswi ndzi vone matsalwa ya xiviri lama tshembekaka ni swifaniso swa nkarhi wolowo. Minkombiso, swiviko swa timbhoni ta ku swi vona hi mahlo ni leswi vuriweke hi van’wamatimu enkombisweni lowu, swi khumbe miehleketo ni mbilu ya mina swinene.”

Siku rin’wana endzhaku ka kwalaho, loko Haykaz a averiwe ku tsalela swichudeni-kulobye swa xikolo xa le henhla xitsalwana, u tsakele ku tsala hi nhloko-mhaka leyi nge “Timbhoni ta Yehovha—Vahlaseriwa Lava Rivariweke Lava Xanisiweke Hi Mfumo Wa Manazi.” Mudyondzisi wa yena u pfumelelane ni nhloko-mhaka leyi kambe a byela Haykaz leswaku a katsa ni rungula leri humaka etibukwini ta matimu. Haykaz u pfumerile hi ntsako lowukulu. U te: “Ndzi tsale nkatsakanyo wa tibuku leti ndzi ti hlayeke leti vulavulaka hi Timbhoni ta Yehovha hi nkarhi wa Manazi. Ndzi tlhele ndzi phofula vonelo ra mina malunghana ni nkombiso wa ‘Vahlaseriwa Lava Rivariweke.’ Xitsalwana lexi xa matluka ya 43 a xi katse ni swifaniso.”

Hi November 2002, Haykaz u rungule xitsalwana xa yena emahlweni ka swichudeni, vadyondzisi, ndyangu ni vanghana. Endzhaku ka sweswo, u vutisiwe swivutiso, laha a kumeke nkarhi wo hlamusela tidyondzo leti sekeriweke eBibeleni, leti a ti pfumelaka. Loko nhwanyana un’wana loyi a a ri exikarhi ka ntshungu, a n’wi vutise xivangelo xo va a hlawule nhloko-mhaka leyi, Haykaz u vule leswaku tibuku to tala ta matimu a ti boxi nchumu hi Timbhoni ta Yehovha, kutani a a lava leswaku vanhu va tiva vurhena lebyi Timbhoni ti sirheleleke ripfumelo ra tona ra Vukreste ha byona. Byi ve byihi vuyelo bya xitsalwana lexi a xi runguleke?

Haykaz u ri: “Lava ndzi nghenaka na vona xikolo va sale va hlamele. A va nga swi tivi leswaku Timbhoni ta Yehovha ti tshame ti xanisiwa hi tihanyi. Nakambe, vunyingi a byi nga swi tivi leswaku Timbhoni leti a ti pfaleriwe ekampeni ya nxaniso ya Manazi, a ti veheriwe mfungho wo hlawuleka—ku nga xilapana xa xivunguvungu xa tinhla tinharhu.”

Ku sukela kwalaho, Haykaz u pfulekeriwe hi tindlela to tala to vulavula ni vadyondzi-kulobye hi xiyimo xa Timbhoni lexi sekeriweke eBibeleni malunghana ni mpompelo wa ngati, swakunwa swa xihoko ni mahanyelo. Haykaz u ri: “A nga kona exikarhi ka lava ndzi nghenaka na vona xikolo, loyi a ndzi hlekuleke. Ku tlula kwalaho, rungula ra yena sweswi ri hlayisiwe elayiburari ya xikolo. Sweswo swi ta pfuna leswaku vurhena bya Timbhoni ta Yehovha byi nga rivariwi.