Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Ha yini Timbhoni ta Yehovha ti teka nhlayo ya 144 000 leyi boxiweke ebukwini ya Nhlavutelo yi ri ya xiviri ku nga ri yo fanekisela?

Muapostola Yohane u tsarile: “Ndzi twa nhlayo ya lava funghiweke, va 144 000.” (Nhlavutelo 7:4) EBibeleni, xiga lexi nge “lava funghiweke” xi vulavula hi ntlawa wa vanhu lava hlawuriweke exikarhi ka vanhu leswaku va fuma na Kreste etilweni, va fuma misava ya Paradeyisi leyi nga ta ta. (2 Vakorinto 1:21, 22; Nhlavutelo 5:9, 10; 20:6) Nhlayo ya vona ya 144 000, yi tekiwa yi ri ya xiviri hikwalaho ka swivangelo swo hlayanyana. Xivangelo xo sungula, hileswi ku nga wona mongo wo rhanga eka Nhlavutelo 7:4.

Endzhaku ka loko muapostola Yohane a kombisiwe ntlawa lowu wa vanhu va 144 000 exivonweni, u tlhele a kombisiwa ntlawa wun’wanyana. Yohane u hlamusela ntlawa lowu wa vumbirhi a ku i “ntshungu lowukulu, lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato.” Ntshungu lowu lowukulu i vanhu lava nga ta pona ‘nhlomulo lowukulu’ lowu taka, lowu nga ta herisa misava ya sweswi yo homboloka.—Nhlavutelo 7:9, 14.

Hambiswiritano, xiya ku hambana loku Yohane a ku kombisaka exikarhi ka ndzimana 4 na 9 ya Nhlavutelo ndzima 7. Nhlayo ya ntlawa wo sungula wa “lava funghiweke” u yi boxe hi ku kongoma. Kambe, nhlayo ya ntlawa wa vumbirhi ku nga “ntshungu lowukulu,” a yi boxiwanga. HikwaIaho ka sweswo, swi fanerile ku teka nhlayo ya 144 000 yi ri ya xiviri. Loko nhlayo ya 144-000 a yi ri yo fanekisela naswona yi vulavula hi ntlawa lowu nhlayo ya wona a yi nga boxiwanga, mongo lowu hambanisaka tindzimana letimbirhi a wu ta lahleka. Hikwalaho, mongo wu kombisa leswaku nhlayo leyi ya 144 000 yi fanele yi tekiwa yi ri ya xiviri.

Swidyondzi swo hambana-hambana swa Bibele swa nkarhi lowu hundzeke ni swa sweswi, swi fikelele xiboho lexi fanaka—xa leswaku nhlayo leyi i ya xiviri. Hi xikombiso, loko Dok. Ethelbert W. Bullinger, mutsari wa swihlamusela-marito wa le Britain a vulavula hi Nhlavutelo 7:4, 9, emalembeni ya 100 lama hundzeke, u te: “Ntiyiso wa mhaka hi lowu: Eka ndzima leyi ku vulavuriwa hi nhlayo leyi tiviwaka ni nhlayo leyi nga tiviwiki.” (The Apocalypse or “The Day of the Lord,” tluka 282) Robert L. Thomas, Lontsongo, profesa wa Testamente Leyintshwa eka The Master’s Seminary le United States wa ha ku tsala a ku: “Mhaka ya leswaku nhlayo leyi i yo fanekisela a yi na xisekelo lexi tiyeke.” U engeterile: “I nhlayo leyi tivekaka [eka 7:4] ku hambana ni nhlayo leyi nga boxiwangiki eka 7:9. Loko nhlayo leyi yo tekiwa yi ri yo fanekisela, tinhlayo hinkwato leti nga ebukwini leyi a ti nge tekiwi ti ri ta xiviri.”—Revelation: An Exegetical Commentary, Vholumo 1, tluka 474.

Van’wana va vula leswaku tanihi leswi buku ya Nhlavutelo yi tirhisaka ririmi ro fanekisela swinene, kutani tinhlayo hinkwato leti kumekaka ebukwini leyi, ku katsa ni nhlayo ya 144 000, ti fanele ti ri to fanekisela. (Nhlavutelo 1:1, 4; 2:10) Hambiswiritano, makumu wolawo a hi ntiyiso. Ina, buku ya Nhlavutelo yi ni tinhlayo to tala to fanekisela kambe yi tlhela yi va ni tinhlayo ta xiviri. Hi xikombiso, Yohane u vulavula hi “mavito ya 12  ya vaapostola va 12 va Xinyimpfana.” (Nhlavutelo 21:14) Swi le rivaleni leswaku nhlayo ya 12 leyi boxiweke eka ndzimana leyi i ya xiviri, a hi yo fanekisela. Ku tlula kwalaho, muapostola Yohane u tsale hi “malembe ya 1 000” ya ku fuma ka Kreste. Nhlayo yoleyo na yona yi fanele yi tekiwa yi ri ya xiviri hilaha nkambisiso wa vukheta wa Bibele wu kombisaka hakona. * (Nhlavutelo 20:3, 5-7) Hikwalaho, leswaku nhlayo leyi kumekaka ebukwini ya Nhlavutelo yi fanele ku tekiwa yi ri ya xiviri kumbe yi ri yo fanekisela swi titshege hi mongo wa mhaka.

Mhaka ya leswaku nhlayo ya 144 000 i ya xiviri ni leswaku yi vulavula hi nhlayo ya vanhu vo karhi, ku nga ntlawa wutsongo loko wu pimanisiwa ni “ntshungu lowukulu,” yi tlhela yi twanana ni tindzimana tin’wana ta le Bibeleni. Hi xikombiso, endzhakunyana eka xivono lexi voniweke hi muapostola Yohane, lava 144 000 va hlamuseriwa va ri lava “xaviwe[ke] evanhwini leswaku va va swirhangana.” (Nhlavutelo 14:1, 4) Rito leri nge “swirhangana” ri vula swilo switsongo swo sungula leswi hlawuriweke. Nakambe loko Yesu a ha ri laha misaveni, u vulavule hi lava va nga ta fuma na yena eMfun’weni wa le tilweni kutani a va vitana “ntlhambinyana.” (Luka 12:32; 22:29) Hakunene, vanhu lava hlawuriweke ku ya fuma etilweni a va talanga loko va pimanisiwa ni vanhu lava nga ta tshama emisaveni leyi nga Paradeyisi leyi taka.

Hikwalaho, mongo wa Nhlavutelo 7:4 swin’we ni swivulwa swin’wana leswi kumekaka eBibeleni wu swi veka erivaleni leswaku nhlayo ya 144 000 yi fanele yi tekiwa yi ri ya xiviri. Wu vulavula hi lava va nga ta fuma misava leyi nga paradeyisi swin’we na Kreste etilweni, laha misava leyi yi nga ta va yi tele hi vanhu lava tsakeke lava gandzelaka Yehovha Xikwembu, lava nhlayo ya vona yi nga tivekiki.—Pisalema 37:29.

[Nhlamuselo ya le hansi]

^ par. 7 Loko u lava rungula leri engetelekeke malunghana ni Mfumo wa Kreste wa Gidi ra Malembe, vona buku leyi nge Nhlavutelo—Ku Chaputa Ka Yona Loku Hlamarisaka Ku Tshinele! matluka 289-90, leyi kandziyisiweke hi Timbhoni ta Yehovha.

[Marito lama tshahiweke exihlokweni lama nga eka tluka 31]

Nhlayo ya vadyandzhaka va le tilweni i 144 000

[Xifaniso lexi nga eka tluka 31]

Nhlayo ya “ntshungu lowukulu” a yi tiveki

[Laha Xifaniso Xi Humaka Kona eka tluka 31]

Stars: Courtesy of Anglo-Australian Observatory, photograph by David Malin