Goza 5—Tiyimisele Ku Va Ni Rihanyo Lerinene Swin’we Ni Ndyangu Wa Wena
“Un’wana ni un’wana wo tlhariha u ta endla swilo hi ku tiva.” (Swivuriso 13:16) Loko u dyondza rungula ra xisekelo malunghana ni rihanyo swi nga ku pfuna ni ku ku susumetela ku endla mindzulamiso leyi lavekaka leswaku u va ni rihanyo lerinene wena ni ndyangu wa wena.
Hambeta u dyondza. Ematikweni yo tala, hulumendhe ni tinhlengeletano ti hlela minongonoko yo dyondzisa ni tibuku leti vulavulaka ngopfu hi rihanyo. Swi tirhise kutani u tidyondzisa tindlela ta xisekelo to antswisa rihanyo ra wena u tlhela u papalata ku ri veka ekhombyeni. Ti tekele enhlokweni tidyondzo teto naswona u tiyimisela ku endla mindzulamiso.
Loko u hanya hi mikhuva leyinene leyi u yi dyondzaka, swi ta vuyerisa vana va wena swin’we ni vatukulu va wena. Loko vatswari va vekela vana xikombiso lexinene loko swi ta emhakeni yo dya swakudya leswi nga ni rihanyo, ku basa, ku etlela tiawara leti ringaneke, vutiolori ni ku sivela mavabyi swi nga ha va vuyerisa.—Swivuriso 22:6.
I yini swin’wana leswi lavekaka? Swi lava matshalatshala lamakulu ku va munhu a va ni rihanyo lerinene. Ku tshika mikhuva leyi dzimeke timitsu swi nga ha nonon’hwa naswona hambi ku ri ku endla mindzulamiso hakanyingi swi lava matshalatshala lamakulu swinene. Hambi ku ri mavabyi lama nga ni khombo kumbe rifu a swi nge va susumetele vanhu van’wana leswaku va endla leswi va swi tivaka leswaku swi ta va vuyerisa. Hi swihi swilo leswi nga ta va vuyerisa? Ku fana na hina, va fanele va tiva xikongomelo xa vutomi.
[Xifaniso lexi nga eka tluka 8]Vatekani va fanele va tshama va ri ni rihanyo lerinene va tlhela va va ni matimba leswaku va ta hambeta va pfunana. Vatswari va navela ku hambeta va seketela ni ku letela vana va vona. Vana lava se va kuleke va fanele va khathalela maxaka ya vona lama dyuhaleke. Ku engetela eka leswi, vanhu lava nga ni rihanyo lerinene va tsakeriwa hi vanhu va le mugangeni wa ka vona ematshan’weni yo va ndzhwalo eka vona. Leswi hinkwaswo swi katsa ku va ni rirhandzu ni ku khathala hi vanhu van’wana.
Nchumu lowu hi susumetelaka swinene leswaku hi tinyiketela hi ku swi rhandza wu huma eka Muvumbi wa hina. Lava va tshembelaka eka Xikwembu va navela ku sirhelela nyiko leyi xi va nyikeke yona ya risima ku nga vutomi. (Pisalema 36:9) Loko hi ri ni rihanyo lerinene, hi nga tirhela Xikwembu hi ku hiseka. Lexi i xin’wana xa swivangelo leswi endlaka leswaku munhu a hlayisa rihanyo rakwe.
Tiphine hi vuyelo bya rihanyo lerinene
