Hinkwerhu ha swi navela ku hanya emisaveni leyi nga ni ku rhula. Se swi ni malembe varhangeri va ri karhi va ringeta ku kondletela ku rhula. Mikarhi yin’wana matshalatshala ya vona ya endla leswaku ku va ni ku rhula swa xinkarhana. Kambe lexi twisaka ku vava, ku rhula koloko a ku tlhaveriwi hi dyambu. Xana ku ta pfuka ku ve ni ku rhula emisaveni? Ina! Xiya leswi hi nga swi dyondzaka eka Yesu.

Leswi Yesu a nga ta swi endla

 Bibele yi kombisa leswi Yesu a nga ta swi endla leswaku a tisa ku rhula emisaveni.

•   “[Yesu] U ta thyiwa . . . Hosana Ya Ku Rhula. U ta fuma misava hinkwayo, Hi ku rhula hilaha ku nga heriki.” (Esaya 9:6, 7) Tanihi Hosi ya Mfumo wa Xikwembu, Yesu u ta endla leswaku ku va ni ku rhula emisaveni hilaha ku nga heriki.

•   “Yi ta pfuna swisiwana leswi kombelaka mpfuno. . . ni un’wana ni un’wana la nga riki na mupfuni.” (Pisalema 72:12-14) Yesu u ta tirhisa matimba yakwe leswaku a tisa vululami, a herisa tinyimpi, madzolonga ni ku xaniseka.

•   “Tiko a ri nge he tlakusi banga ku lwa ni tiko rin’wana, naswona a va nge he dyondzi nyimpi.” (Esaya 2:4) Loko Yesu a fuma misava, vanhu hinkwavo va ta dyondza ndlela yo kondletela ku rhula ku nga ri nyimpi.

 Ku dyondza leswi engetelekeke hi ndlela leyi Yesu a nga ta tisa ku rhula hayona nileswi sweswo swi vulaka swona eka wena, vona vhidiyo yo koma leyi nge Mfumo Wa Xikwembu I Yini?

Leswi Yesu A Swi Dyondziseke

 Ninamuntlha leswi Yesu a swi dyondziseke swi pfuna vanhu va timiliyoni leswaku va hanya hi ku rhula. Eka Dyondzo leyi dumeke Ya Le Ntshaveni, Yesu u dyondzise leswi nga hi pfunaka leswaku hi tirhisana ni van’wana hi ndlela yo rhula. Xiya swikombiso leswi landzelaka.

•   “Va tsaka lava kondletelaka ku rhula.” (Matewu 5:9) Yesu u khutaze vadyondzisiwa vakwe leswaku va nga papalati timholovo ntsena kambe va tlhela va kondletela ku rhula.

•   “Rhanga u ya lunghisa mhaka ya kona ni makwenu, kutani u vuya u ta nyikela nyiko ya wena.” (Matewu 5:23, 24) Yesu u tsundzuxe vayingiseri vakwe leswaku va hatla va lulamisa timhaka loko va tlulane milenge. U dyondzise leswaku loko hi lava ku va ni vuxaka lebyinene na Xikwembu, hi fanele hi kondletela ku rhula ni vanhu van’wana.

•   “Tshikani ku avanyisa van’wana leswaku mi nga avanyisiwi.” (Matewu 7:1) Yesu u hi lemukise leswaku hi nga avanyisi van’wana hi ndlela yo biha kumbe ku langutela leswaku va endla swilo leswi na hina swi hi tikelaka ku swi endla hikuva sweswo swi nga endla leswaku ku va ni timholovo. Ku ri ni ku xopaxopa, Yesu u dyondzise valandzeri vakwe leswaku va “nga tshiki ku rivalela van’wana” swihoxo swa vona.—Luka 6:37.

 Vanhu vo tala va tirhisa leswi Yesu a swi dyondziseke. Hambi ku ri eka tindhawu leti taleke madzolonga ni ku avana, va ringeta ku lulamisa timholovo handle ko hlundzuka, va rivalelana naswona va kombisana rirhandzu hambiloko van’wana va nga va khomi kahle.

 Loko u lava ku dyondza ndlela leyi tidyondzo ta Yesu ti pfuneke van’wana leswaku va kuma ku rhula hayona, hlaya nhlokomhaka leyi nge “Ku Va Ni Ku Rhula Hambiloko Ku Ri Ni Nyimpi Ni Madzolonga Ya Swa Tipolitiki.”