Kumuswaangano waamwaka wa Watch Tower Bible and Tract Society of Pennsylvania mu October 6, 2018, mabbuku mapya obilo akamwaigwa. Bbuku lyakuti Bukombi Busalala Bwabukulusyigwa! lyaamba zyabusinsimi bwa Ezekieli, mpoonya broshuwa yakuti Amusungwaale Kubala Alimwi Akuyiisya yabambilwa kugwasya Bakamboni ba Jehova kuyaambele mukubala akuyiisya.

Bbuku lya Bukombi Busalala lyamu Cingisi alimwi abroshuwa ya Kubala Akuyiisya iili mumyaambo minji nkozili lino awebbusaiti ya jw.org aa JW Library app. Kumbele, bbuku lya Bukombi Busalala liyakumwaigwa mumyaambo aimbi.

Alimwi kwakaambilizyigwa kuti bamu Kabunga Keendelezya bakazumizya kuti mawebbusaiti eesu alimwi ama applications zibambululwe. Webbusaiti ya jw.org lino inoobikkilizya azintu alimwi azibeela zili a JW Broadcasting aa LAIBBULALI YAA INTANETI ya Watchtower. Kuyungizya waawo, JW Library app inoobikkilizya azintu alimwi azibeela zili aa Watchtower Library alimwi azyeezyo zyakali kujanika buyo awebbusaiti ya jw.org. Mboinoolibonya webbusaiti mpya alimwi a app mpya zinookozyenye alimwi tazinookatazyi kubelesya. Mucikozyanyo, kutegwa webbusaiti mpya alimwi aa app kazitakatazyi kubelesya, zibeela zimwi zilaubisyigwa kutegwa bantu kabafwambaana kujana cakulya cakumuuya. Mulimo ooyu mupati wakubambulula wakatalika kale. Mumyezi buyo misyoonto mulatalika kubona kucinca.