“Ndakali kulilangilila kwaminyaka iili 19.” Mukwesu ooyu wakali kulangililaanzi? Wakali kulangilila kuzoojana Bbaibbele lya Busanduluzi Bwanyika Mpya bwa Magwalo aa Banakilisito aa Chigiliki mumulaka wakwe waBengali. Bantu biingi baamba majwi aakozyenie chiindi nibakajana Bbaibbele lya Busanduluzi Bwanyika Mpya mumulaka wabo. Nga walibuzya na kuti niinzi ziswaanizidwe mukusandulula akugwisya maBbayibbele aaya?

 Chakusaanguna, basanduluzi bapegwa mulimu ooyu abakwesu bali muKkomiti Yakulemba yaKabunga Keendelezya. Zibabwezela chiindi chilamfu biyeni basanduluzi kuti bamaninsye kusandulula Bbayibbele? Mukwesu Nicholas Ahladis uubeleka muDipatimenti lyaBusanduluzi kuWarwick, New York, wakaamba kuti: “Kuli zintu zyiingi ziswaanizidwe mumulimu ooyu. Zintu eezi ziswaanizya namba yabasanduluzi balikuchita mulimu ooyo, mulaka wabo muyumu biyeni, bantu baambuula mulaka ooyo balabumvwisisisya na buumi mbubakali kupona bantu bamuchiindi chakalembwa Bbayibbele akuti mulaka ooyo ulasiyana na mundawu muuwambuulwa. Chiindi chiingi basanduluzi balakonzya kubweza munyaka kusika kuminyaka iitatu kuti bakonzye kumaninsya Busanduluzi bwa Nyika Mpya bwa Magwalo aa Banakilisito aa Chigiliki. Alubo balakonzya kubweza minyaka iili 4 naakuti kwiinda kuti bakonzye kusandulula Bbayibbele lyoonse.”

 Basanduluzi bamulaka wamasayini balakonzya kubweza chiindi chilamfu kwiinda eechi. Kuli bamwi bantu bagwasilizya basanduluzi kuti bakonzye kusandulula Bbayibbele. Bantu aabo ngatababeleki mumulimu wakusandulula pe bali aamaponeno aasiyene-siyene alubo zimwi ziindi bazwa munyika zisiyene-siyene. Balagwasilizya kukulanga-langa zintu zinga zyakasandululwa alubo bachita oobo kabatabbadalwi pe. Zintu nzibajana chiindi nibakali kulanga-langa, zigwasya basanduluzi kuti basandulule Bbayibbele lilaamakani aachoonzyo alubo aamvwisisika. Umwi uuyiisya basanduluzi kuti bakonzye kusandulula Bbayibbele wakuSouth Africa wakaamba kuti, “basanduluzi balimvwa mbuli kuti bali aamulimu mupati ngubeelede kuchitila Jehova abantu babala Jwi lyakwe.”

 Chiindi Bbayibbele nilyamana kusandululwa lilapulintwa akujatanizya mapeji kuchitila kuti likonzye kuba bbuku. Kuti bakonzye kuchita oobo, babelesya zintu zisiyene-siyene ziswaanizya mapepa, ink, pepa lyachivumbyo, glue, maribboni azimwi zintu zisiyene-siyene zigwasya kuti lijatanisigwe. Mu2019 kwakabelesegwa mali yiinda ku20 miliyoni kuti maBbayibbele apulintwe. Bantu babelekela kumasena aakupulintila bakabeleka kwama-awa aayinda ku300 000 mumunyaka ooyo kuti bapulinte maBbayibbele akwatumizya.

 Nkamboonzi nikubelesegwa mali nyingi achiindi chiingi kumulimu ooyu? Joel Blue uubeleka muDipatimenti lyakuPulinta Munyika Yoonse wakaamba kuti, “Bbayibbele ndibbuku liyandikana loko kwiinda amwi mabbuku ngitugwisya. Nkinkaako, tuyanda kuti lipe bulemu kuli Leza wesu ngutukomba akumulumbe ngutukambawuka.”

 Kulaamwi maBbayibbele aaBusanduluzi Bwanyika Mpya aagwisigwa kuti agwasye bantu bali aazyiimo zisiyene azyabamwi. Kuli maBbayibbele aaBusanduluzi Bwanyika Mpya aagwasya bantu bataboni alubo alajanika mumilaka iili 10. Bbayibbele limwi luzutu lyabantu bataboni libweza ma-awa aasika ku8 kuti lipangwe alubo ndipati zyakuti busena mbulipangilwa kweelede kulampa mamita aasika ku2.3. Alubo tugwisya maBbayibbele aagwasya bantu bali mumajele, maBbayibbele aayo nga alaachivumbyo chapepa luzutu nkaambo ngawo aazumizigwa mumajele.

 Bantu babala Bbaibbele lya Busanduluzi Bwanyika Mpya bagwasigwa loko mubuumi bwabo. Muchikozyano, bantu banjila aambungano yamulaka wachiKiluba kuTombe iili kuDemocratic Republic of the Congo bakagwasigwa loko aBbayibbele eeli. Tombe ilikule amakkilomita aayinda ku1 700 kuzwa kudolopo pati lyachisi eechi. Kwakali Bbayibbele limwi luzutu lyakali kubelesegwa aaBakamboni kubusena oobu alubo lyakali kubelesya mabala aachiindi aatamvwisisiki pe. Bakwesu abachizi bakali kuchinchaana biya kubelesya Bbayibbele eeli kuti bakonzye kulibambila miswaangano. Pesi kuzwa muAugust 2018, Bbaibbele lya Busanduluzi Bwanyika Mpya libelesya mulaka waambuulwa mazubaano lyaabujanika mumulaka wachiKiluba alubo muntu woonse wamumbungano eeyo nga ulaalyo.

 Umwi muchizi waambuula mulaka wachiGerman wakaamba aamwi makani atala aBbaibbele lya Busanduluzi Bwanyika Mpya lyakabambululwa mumulaka wakwe. Wakati: “Lino tandichilimanikizyi biya pe kubala Bbayibbele. Pesi ndabulibuzya kuti, ‘ani zimwi ndilazibala chindiinzi?’” Umwi musungwa wakaamba kuti: “Ndakapegwa Bbaibbele lya Busanduluzi Bwanyika Mpya alubo lili kuchincha buumi bwangu. Lino ndaabulimmvwisisisya loko Jwi lyaLeza kuzwa nindakasaanguna kubala Bbayibbele eeli. Ndiyanda kuziba zyiingi atala aBakamboni baJehova alubo ndiyanda kuba umwi wabo.”

 Bantu babala Bbaibbele lya Busanduluzi Bwanyika Mpya balazilumba zipo zisangwa kuti zigwasilizye kugwisya Bbayibbele eeli. Zipo eezi zyakasangwa kuti zigwasilizye mumulimu uuchitwa munyika yoonse kakubelesegwa donate.jw.org. Tumulumba loko azipo zyanu nzimusanga.