Mu2020, kwakachitika mapenzi aalichitikila miingi alubo kwakazooba bulwazi bwaCorona munyika yoonse. Bakamboni BaJehova bakabagwasya biyeni aabo bakaswaanana aabuyumu-yumu bwakeetwa amapenzi aaya?

 Mumunyaka wamulimu wamu2020, * bakwesu bali muKkomiti yaBalangizi yaKabunga Keendelezya bakazumizya kuti kubelesegwe mali iisika ku$28 miliyoni * kuti igwasye aabo banga baswaanana amapenzi aalichitikila. Eezi zyakagwasya bantu bakaswaanana amapenzi aalichitikila ayinda ku200 kuswaanizya bulwazi bwaCorona, mvula mpati ilaaguwo, kupawula kwamaanzi, kubulika kwachakulya kuVenezuela anzala yakaba akaambo kakutawa kwamvula kuZimbabwe. Mali yakasangwa yakagwasya kuti kuwulwe chakulya, maanzi, aakukkala, zigogo, misamu yabusilisi, zintu zyakusalazya azimwi ziyandikana. Alubo yakagwasya kukubambululwa kwazintu akukuyakulula maanda akadilika. Atumvwe kuti bakagwasigwa biyeni bantu bakaswaana aamapenzi aaya.

 Bulwazi bwaCOVID 19. Bulwazi oobu bwapa kuti bakwesu abachizi bali munyika yoonse kubayumine kujana zintu zyakupona aazyo. Eezi zyakapa kuti kupangwe makkomiti aali 800 aagwasilizya munyika yoonse kuti agwasye bakwesu abachizi aaba. Makkomiti aaya akkala kalanga-langa kuti niinzi nzibayanda bakwesu abachizi mpawo alafwambaana kutola makani kuKkomiti yaBalangizi kuchitila kuti ibone kuti nga ilabagwasya biyeni.

 Munyaka woonse makkomiti aagwasilizya nikwachitika mapenzi aalichitikila akagwasya bantu biingi kuti bajane chakulya, meenda, zintu zyakubelesya kusalazya amisamu yabusilisi. Muli zimwi ndawu, makkomiti aaya akabelekelaamwi abaalu kuti bagwasye bakwesu abachizi kuti bajane zimwi zintu zyakali kupegwa bantu amfulumende.

 Bamwi bantu batali Bakamboni bakabona milimu yakali kuchitwa chiindi bakwesu abachizi nibakali kugwasigwa kuti bajane zintu ziyandikana. Umwi mwaalumi uutegwa Field Simwinga uuzulwida muBbooma lyaNakonde kuZambia wakabuzya bakwesu kuti: “Tumulumba loko akaambo kakufwambaana kugwasilizya bantu banga baswaanana amapenzi aalichitikila.”

 Kubulika Kwachakulya kuAngola. Bulwazi bwaCorona bwakapa kuti kube penzi lyakubula chakulya kuAngola alubo zyakulya zyakaliwo zyakasaanguna kudula. Eezi zyakapa kuti bakwesu abachizi biingi kubayumine kujana mali ikkwana kuwula chakulya.

 Bakwesu bali kumutabi wakuBrazil bakakumbilwa kuti batumizye chakulya kubakwesu bali kuAngola. Bakwesu aaba bakasaanguna bayanduulisisya kuti bajane chakulya chichipide akuti nga balachitumizya biyeni kachili chiingi kuchitila kuti bakonzye kwiibelesya kabotu mali iisangwa kuti igwasilizye chiindi nikwachitika mapenzi aalichitikila. Kuwula bbokesi limwi lyachakulya akulitumizya kwakali kuyanda mali iisika ku$22 alubo lyakali kulema makkeyiji aasika ku20. Mubbokesi oomu mwakali achakulya chili mbuli rayisi, bbinzi amafuta akujikisya. Kusikila sunu, kwakatumizigwa mabbokesi ali 33 554 alema matani ali 721. Bantu bayinda ku 50 000 bakajana chakulya eechi kuswaanizya achimwi chakali chabunganizigwa kale kuAngola.

 Bakwesu bakamvwa biyeni atala achakulya eechi nchibakajana? Alexandra uukkala kundawu ili kwayo ayilikke kuAngola, wakaamba kuti: “Eechi nchitondeezyo chakuti Jehova ulandiyanda akuti tandili andilikke pe. Ndilayandikana mumbunga yaJehova.” Umwi mwanakazi uutegwa Mariza ooyo uukomezya bana kali alikke, wakaamba kuti: “Jehova wakazimvwa nkombyo zyangu. Ndilamulumba kuswaanizya ambunga yakwe.”

 Nzala Yakaba Akaambo Kakutawa Kwamvula kuZimbabwe. Mumunyaka wamulimu wamu2020, bantu biingi bakaswaanana aapenzi lyakubula chakulya akaambo kakuti mvula teeyakawa kabotu pe. Bakamboni biingi bakkala kuZimbabwe bakabula chakulya chikkwene.

 Kwakapangwa makkomiti aali 5 agwasilizya nikwachitika mapenzi aalichitikila kuti agwasye bakwesu abachizi kuti bajane chakulya. Basikupupulula biingi bakagwasilizya kubikka chakulya mumasaka amumabbokesi, kuchibikka mumoota alubo bamwi bakalipeda kupa moota zyabo kuti zigwasilizye kunyampula chakulya eecho. * Mumunyaka wamulimu wamu2020, kwakabelesegwa mali iisika ku$691 561 kuti igwasye bakwesu abachizi basika ku 22 700 kuti bajane chakulya azimwi ziyandikana.

 Bamwi bakwesu bakali bamaninwa aachakulya chiindi chakulya chizwa kumbunga nichakasika. Chakulya nichakasika bakwesu bakatembawula Jehova, bamwi bakasaanguna kwiimba miimbo aaBwaami.

 Kuli imwi ndawu bachizi babili bamukabafu bakayinka kumuswaangano wakali atala ambubakonzya kugwasigwa atubunga tutali twamfulumende kuti bajane chakulya. Pesi mumuswaangano ooyo bakatalika kuswaanizya twaambo twazyapolitikisi. Nkinkaako, bachizi aaba bakasala kuti batazumini pe kuchita zintu zyakali kuyandwa kuti bagwasigwe achakulya eecho. Nibakazwa aamuswaangano ooyo, bantu bakabaseka akubabuzya kuti, “Mutazoozi kumaanda eesu kamutukumbila chakulya.” Pesi nikwakayinda mviki zibili, bakwesu bakazoosika kubusena oobo akupa bachizi chakulya. Pesi bamwi bantu bamuchilawu bakali kubaseka teebakali napegwa pe chakulya atubunga ooto.

 Kugwasya bantu banga baswaanana amapenzi aalichitikila kuZimbabwe kwakapa bumboni kubantu. Muchikozyano, bona zyakachitikila uumwi muchizi utegwa Prisca. Prisca wakali kwiinka kumulimu wakukambawuka muli Bwatatu amuli Bwasanu mviki amviki nikuba kuti kwakali nzala mpati yakali yeetwa akaambo kakutawa kwamvula. Alubo wakali kwiinka mazuba aaya nikuba kuti chakali chiindi chakulima. Bantu bamuchilawu chakwe bakali kumuseka kabaamba kuti: “Ulajeya mpuli yako anzala iwe kuwamba kuti uya kukukambawuka” Prisca wakali kubasandula kuti: “Ziyume zitete Jehova takabalekelezyi pe bakombi bakwe.” Nikwakayinda chiindi chiniini biyo, Prisca wakazoojana chakulya chakazwa kumbunga. Eezi zyakabagambya bantu abaya bakali kumuseka mpawo bakabuzya Prisca kuti: “Nisimpe Leza taakakulekelezya pe. Nkinkaako tuyanda kwiiya zyiingi atala anguwe.” Lino basimayakilane bakwe bali 7 balikuswiilizya miswaangano yaBakamboni baJehova iipupululwa aarediyo.

 Mbukunga twaba kumamanino anyika eeyi, tunooswaanana aabuyumu-yumu bwiingi bweetwa amapenzi aalichitikila. (Matayo 24:3, 7) Tulamulumba azipo zyanu nzimusanga kamubelesya donate.jw.org. Zipo eezi ngazyabelesegwa kuti zigwasye bamwi banga baswaanana aamapenzi.