Majwi aali muli Deuteronomo 22:25-27 aakali kugwasya musimbi kutali mwaalumi nkaambo mwaalumi wavumpila wakalizibinkene kuti uli amulandu. Atubone aamwi mavesi ali mulugwalo oolu.

Lugwalo lwa Deuteronomo 22:23, 24 lwaambuula atala amwaalumi woonana amusimbi “mumunzi” pesi musimbi ooyu kaali wakasyomezegwa kukwatwa awumwi mwaalumi. Mwaalumi ooyu wakali amulandu wakuchita bumambe nkaambo musimbi ooyo wakali kubonwa mbuuli muntu uukwetwe. Ani musimbi wakali amulandu na? “Tanaakakwiila nokuba kuti wakali mumunzi.” Kaansinga wakakwiila, bantu bakali kukonzya kumumvwa akumuvuna. Pesi musimbi ooyu taakakwiila pe. Nkinkaako boonse bakali amulandu.​—Dt. 22:23, 24.

Mulawu uulembedwe mumavesi atobela waamba chiimo chisiyene achaambwa muvesi ali ajulu. Uti: “Nokuba boobo, ikuti kamuli musyokwe mwaalumi ooyo mwaakamujana musimbi uusinkilidwe, eelyo wakamujata akoonana anguwe, nkokuti mwaalumi ooyo iwakoonana anguwe weelede kujaigwa alikke, musimbi tamweelede kumucita cintu cili coonse pe. Tajisi cibi ceelede lufwu. Eeci cili mbuli muntu umwi wajaya mweenzinyina. Nkaambo wakamujana musyokwe, alimwi musimbi ooyo uusinkilidwe wakakwiila pele kwakanyina uumuvwuna.”​—Dt. 22:25-27.

Muzyiimo zili boobu, babetesi bakali kuyeeyela kuti musimbi “wakakwiila pele kwakanyina uumuvwuna.” Nkinkaako musimbi taakali amulandu wabumambe. Pesi mwaalumi wakali amulandu wakuvumpila awakuchita bumambe nkaambo “wakamujata akoonana anguwe.”

Nikuba kuti mulawu ooyu wakali wakukwabilila musimbi, pesi wakali kutondeezya kuti mwaalumi wakali amulandu wakuvumpila awabumambe. Tulaachoonzyo chakuti babetesi bakali “kwaavwuntauzya cakulomya” makani aaya alubo bakali kusala kweendelana amalayilile miingi Leza ngaakabepede.​—Dt. 13:14; 17:4; Kul. 20:14.