CHIIYO 17
Jesu Ulibiyeni?
Kuti twayiya atala azintu nzyaakaamba Jesu anzyaakachita kachili aanyika, tulakonzya kwiiya buntu bukonzya kutugwasya kuti tuswene afwiifwi anguwe aJehova. Mbuubuli buntu oobo? Kujana twamutobelezya biyeni Jesu?
1. Jesu ukozyenie biyeni aWisi?
Jesu wakakkalaamwi aWisi kujulu kwaminyaka myiingi loko. Eezi zyakapa kuti ayeeye, kulimvwa akuchita zintu mbuli Wisi. (Bala Johane 5:19.) Jesu wakatondeezya buntu bwaJehova munzila iimaninide zyakuti wakaamba kuti: “Kufwumbwa ooyo wandibona wamubona awalo Taata.” (Johane 14:9) Kuti wayiya zyiingi atala aJesu, uyoomuziba kabotu Jehova. Muchikozyano, nzila njaakali kubajataayo bantu Jesu itondeezya kuti Leza ulaandaba anduwe.
2. Jesu wakatondeezya biyeni kuti ulamuyanda Jehova?
Jesu wakati: “Ikutegwa nyika izyibe kuti ndilamuyanda Taata, ndilacita mbubonya Taata mbwaakandilailila kuti ndicite.” (Johane 14:31) Chiindi Jesu naakali aanyika, wakatondeezya kuti ulamuyanda Wisi kwiinda mukumuswiilila nikuba nikwakali kuyumu kuchita oobo. Alubo, Jesu wakatondeezya kuti ulamuyanda Wisi kwiinda mukwaambuula atala anguwe akugwasya bamwi kuti babe beenzinyina baWisi.—Johane 14:23.
3. Jesu wakatondeezya biyeni kuti ulabayanda bantu?
Bbayibbele lyaamba kuti chintu nchaakali “kuyanda kapati [Jesu] mbantu.” (Tusimpi 8:31, makani aamunsi) Wakatondeezya kuti ulabayanda bantu kwiinda mukubasungwaazya akubagwasya. Wakachita zigambyo katondeezya kuti ulaamanguzu akuti ulaaluzyalo. (Marko 1:40-42) Wakali kubajata munzila iilikabotu bantu boonse alubo taakali kusaluula pe. Zintu nzyaakali kwaambuula zyakali kubawumbulizya akubapa bulangilizi bantu bakali kumuswiilila. Jesu wakalipeda kupenzegwa akujayigwa akaambo kakuti ulabayanda bantu. Pesi bantu mbayanda loko mbaabo bapona kweendelana anjiisyo zyakwe.—Bala Johane 15:13, 14.
YIYA ZYIINGI
Yiya zyiingi atala abuntu mbwalaabo Jesu. Alubo ubone mbukonzya kutondeezya luyando akupa bamwi mbuli mbaakali kuchita Jesu.
4. Jesu ulamuyanda Wisi
Chikozyano chaJesu chituyiisya mbutukonzya kutondeezya kuti tulamuyanda Leza. Bala Luka 6:12 a Johane 15:10; 17:26. Nimwazwa aakubala magwalo aaya, musandule mubuzyo uutobela:
-
Kujana twatondeezya biyeni kuti tulamuyanda Jehova mbuli mbachita Jesu?
Jesu wakali kumuyanda Wisi alubo wakali kukkala kakomba kulinguwe
5. Jesu wakalaandaba abantu bakali kuyanda lugwasyo
Jesu wakali kuchita zintu ziyandwa aabantu kwiinda nzyaakali kuyanda. Nikuba chiindi naakakatede, wakalipeda kugwasya bantu. Bala Marko 6:30-44, mpawo musandule mibuzyo iitobela:
-
Mulugwalo oolu, niinzi zitondeezya kuti Jesu wakalaandaba abantu?—Langa vesi 31, 34, 41, a 42.
-
Niinzi chakapa kuti Jesu agwasye bantu?—Langa vesi 34.)
-
Mbukunga Jesu utobelezya buntu mbwalaabo Jehova, eezi zituyiisya kuti Jehova ulibiyeni?
-
Nziizili zimwi nzila nzitukonzya kutondeezya kuti tulaandaba abamwi mbuli Jesu?
6. Jesu ulapa
Jesu wakali kupa nikuba kuti wakali aazintu ziche alubo wakatusungwaazya kuti andiswe tube bantu bapa. Bala Milimo 20:35, mpawo musandule mubuzyo uutobela:
-
Jesu wakaamba kuti niinzi chipa kuti tubotelwe?
Mweebele KAVIDIYO, mpawo musandule mubuzyo uutobela.
-
Niinzi nzitukonzya kupa bamwi nikuba katutakwe zintu zyiingi pe?
Walizi na?
Bbayibbele litusungwaazya kuti tukombe kuli Jehova muzina lyaJesu. (Bala Johane 16:23, 24.) Kukomba muzina lyaJesu kutondeezya kuti tulamulumba akaambo kakutugwasya kuti tube beenzinyina baJehova.
BAMWI BAAMBA KUTI: “Leza takwe ndaba pe akufwaba kwesu.”
-
Mbukunga Jesu utondeezya buntu bwaWisi, zintu nzyaakachita zitondeezya biyeni kuti Jehova ulaandaba andiswe?
CHIFWIINSYO
Jesu ulamuyanda Jehova alubo ulabayanda bantu. Mbukunga Jesu utobelezya buntu mbwalaabo Jehova, kuti twamuziba Jesu tuyoomuziba kabotu Jehova.
Mibuzyo Yakwiindulula
-
Nga tulatondeezya biyeni kuti tulamuyanda Jehova mbuli mbaakali kuchita Jesu?
-
Kujana twatondeezya biyeni kuti tulabayanda bantu mbuli mbaakali kuchita Jesu?
-
Mbuubuli buntu mbwalaabo Jesu mbuyandisya loko?
YANDUULISISYA
Bona buntu Jesu mbwalaabo mbukonzya kutobelezya.
“Kutegwa Mumwiiye Jesu, Amube . . .” (Jesu—Nenzila, Ngokasimpe, Mbobuumi, peeji 317)
Bona kuti nkamboonzi nikuyandikana kubelesya zina lyaJesu chiindi nitukomba.
“Nkamboonzi Nitukomba Muzina lyaJesu?” (Ngaziyakulinda, February 1, 2008)
Bbayibbele lilaamba na kuti Jesu ulibiyeni?
“Jesu Wakali Biyeni?” (Chiiyo chijanika aaIntaneti)
Twiiyaanzi kunzila Jesu njaakali kubajataayo banakazi?
“Leza Ulaandaba Alubo Ulabalemeka Banakazi” (Ngaziyakulinda, September 1, 2012)
