Bayibolo likamba kuti ŵanthu wosi mbakubuda. Tikutole jalidu la kubuda kutuliya kwaku Adamu, munthu wakwamba. Ndichu chifukwa chaki nyengu zinyaki tibuda ndipu pavuli paki tidandawula ndi vo tachita. Yesu Khristu, Mwana waku Chiuta wakulipira mtengu wa ubudi mwakutifwiya. Sembi yaki yakutiwombo yikupangisa kuti Chiuta watigowokiyengi. Chenichi nchawanangwa chakutuliya kwaku Chiuta.—Ŵerengani Ŵaroma 3:23, 24.

Ŵanthu anyaki achita maubudi ngakulu ndipu aziŵa cha asani Chiuta wangaŵagowoke. Nchakukondwesa kuti Bayibolo likamba kuti: “Ndopa . . . zaku Yesu, Mwana waki, zititozga ku ulakwi wosi.” (1 Yohane 1:7) Yehova ngwakukhumbisiska kutigowoke asani te ndi mtima wakukhumba kulapa nadi chinanga tingachita ubudi ukulu.—Ŵerengani Yesaya 1:18.

Asani tikhumba kuti Yehova Chiuta watigowoke, tikhumbika kusambira vakukwaskana ndi iyu kuti tiziŵi nthowa zaki, ulongozgi waki ndipuso vo wakhumba kuti tichitengi. (Yohane 17:3) Yehova wagowoke ndi mtima wosi wo alapa ndipuso wo ayesesa kusintha mijalidu yawu yiheni.—Ŵerengani Machitidu 3:19.

Nkhwambula kusuzga kuti tije so pa ubwezi ndi Chiuta. Yehova waziŵa vo titondeka kufiska. Kweni iyu ngwalisungu ndipuso ngwachanju. Lisungu laku Chiuta litenere kukuchitiskani kuti musambirengi vinandi va mo mungamukondwese.—Ŵerengani Sumu 103:13, 14.