Yesaya 1:1-31
1 Chiwona cho Yesaya*+ mwana waku Amozi wanguwona chakukwaskana ndi Yuda kweniso Yerusalemu, mu mazuŵa ngaku Uziya,+ Yotamu,+ Ahazi+ ndi Hezekiya,+ mafumu nga ku Yuda:+
2 Vwani, yimwi machanya, ndipu vwisiya yiwi charu chapasi,Pakuti Yehova wakamba kuti:
“Ndakuzga ŵana ndi kuŵalera,+Kweni andiyukiya.+
3 Ng’ombi yiziŵa munthu yo wakuyigula,Ndipu bulu waziŵa cho mbuyaki watimuryisiyamu;Kweni Isirayeli watindiziŵa cha,*+Ŵanthu ŵangu achita vinthu kwambula kuwamu.”
4 Soka mtundu wakubuda,+Ŵanthu wo azitiskika ndi mphulupulu,Mphapu ya ŵanthu aheni, ŵana akunangika!
Yiwu ajowo Yehova;+Ayuyuwa Mtuŵa waku Isirayeli;Yiwu amulazga misana.
5 Kumbi mupumikengi nampha panyaki, po mulutirizga kugaruka?+
Mutu wosi watama,Ndipu mtima wosi we ndi matenda.+
6 Kutuwa kuphazi mpaka paliwombu, palivi po mphamampha.
Peposi pe vilonda, vikukusa ndipuso mabala,Vaphwelereka cha,* kumangika pamwenga kudirika mafuta.+
7 Charu chinu chasambuka mahami.
Matawuni nginu ngawotcheka ndi motu.
Alendu amala charu chinu yimwi muchilereska.+
Charu chinu che nge charu chakunangika cho chathereskeka ndi alendu.+
8 Mwana munthukazi wa ku Ziyoni wajowoleka nge chisakasa mumunda wa mphereska,Nge chigongwi mumunda wa vinkhaka,Kweniso nge tawuni yo yazingilizika.+
9 Yehova wa mizinda wakalekengi kusiyaku ŵanthu amanavi akupona,Mphanyi taja nge Sodomu,Ndipuso mphanyi tayanana ndi Gomora.+
10 Vwani mazu ngaku Yehova, yimwi alongozgi ankhaza* a ku Sodomu.+
Vwisiyani dangu laku* Chiuta widu, yimwi ŵanthu a ku Gomora.+
11 Yehova watiti, “Sembi zinu zinandi za ntchitu wuli kwaku ini?”+
“Ndavuka ndi sembi zinu zakupiriza za mbereri zinthulumi+ kweniso mafuta nga nyama zakuryisika umampha,+Ndipu ndikondwa cha ndi ndopa+ za matholi,*+ ŵana a mbereri kweniso mbuzi.+
12 Asani mwaza kuziwoneke pa masu pangu,+Ndiyani yo wakukambiyani,Kuti mukandengikandengi mumabalaza ngangu?+
13 Mungazanga so cha ndi sembi za mbewu zabwekabweka.
Sembi zinu za vakununkhira zakuseruska kwaku ini.+
Musunga myezi yifya,+ masabata+ kweniso mudanisa maunganu.+Kweni ndingakunthiyapu cha kukuwonani kuti mugwiriskiya ntchitu nthazi za masenga+ asani muchita maunganu ngapade.
14 Nditinkha myezi yinu yifya ndipuso maphwandu nginu.
Vinthu venivi vaja mphingu kwaku ini;Ndavuka kuvipinga.
15 Ndipu asani mutambasuwa manja nginu,Ndibisa masu ngangu kuti ndileki kukuwonani.+
Chinanga mupereki mapempheru nganandi,+Ndivwisiya cha;+Chifukwa manja nginu ngazaza ndopa.+
16 Jisambiseni, jitoweseni;+Tuzganipu ntchitu zinu ziheni pa masu pangu;Lekani kuchita vinthu viheni.+
17 Sambirani kuchita vinthu vamampha, penjani urunji,+Chenyani wakukandirizga anyaki,Vikiliyani wanangwa wa mwana mulanda,Ndipuso miyani choko pa mulandu waki.”+
18 Yehova watiti: “Sonu zani, tiyeni tikambiskani kuti tinyoloski vinthu.”+
“Chinanga maubudi nginu ngangaŵa ngayera,Ngajengi ngatuŵa ukongwa,*+Chinanga ngangatchesama nge salu yiyera,Ngajengi ngatuŵa nge weya utuŵa.
19 Asani mulongongi kuti mukhumbisiska kundivwiya,Muryengi vinthu vamampha va mucharu ichi.+
20 Kweni asani mukanengi ndi kugaruka,Mumalengi ndi lipanga+Pakuti mulomu waku Yehova ndiwu walongoro venivi.”
21 Tawuni yakugomezgeka+ yasambuka huli!+
Yinguzaza ndi urunji;+Urunji wenga mutawuni yo,+Kweni sonu mwe ŵanthu akubaya.+
22 Siliva winu wasambuka vinthu vabwekabweka,*+Ndipu moŵa* winu wasongonoleka ndi maji.
23 Alongozgi ŵinu mbamtafu ndipuso mbanyawu ŵa ankhungu.+
Weyosi waku yiwu watanja vinyeda ndipu wawunukiya mphasu.+
Yiwu atimuchitiya urunji cha mwana mulanda,Ndipu mulandu wa choko alivi nawu ntchitu.+
24 Mwaviyo, Ambuya auneneska, Yehova wa mizinda,Wanthazi waku Isirayeli, wakamba kuti:
“Ehe! Ndituzgengepu wosi wo atinkhana nani,Ndipu ndiweziyengi arwani ŵangu.+
25 Nding’anamuwengi janja langu kuti ndilimbani namwi,Ndisongonongi vinthu vinu vosi vinthu vabwekabweka* ndi vakusongonole,Ndipu ndituzgengepu vinthu vinu vosi viheni.+
26 Ndiweziyengepu akweruzga ŵinu nge mo venge pakwambaNdipuso ndiweziyengepu akulunguchizga ŵinu nge mo venge pakwamba.+
Pavuli paki, mwazamudanika kuti Tawuni ya Urunji, Tawuni Yakugomezgeka.+
27 Ziyoni wazamuwomboleka ndi urunji,+Ndipu ŵanthu wo azamuwe, azamuwomboleka ndi urunji.
28 Ŵanthu akugaruka kweniso akubuda azamunangikiya limoza,+Ndipu wo ajowo Yehova azamumala.+
29 Pakuti azamuchita soni ndi vimiti vanthazi vo mwakhumbiranga,+Ndipu mwazamulengeseka chifukwa cha minda* yo mungusankha.+
30 Pakuti mwazamuja nge chimiti chikulu cho mani ngaki ngafota,+Ndipu mwazamuja nge munda wo ulivi maji.
31 Munthu wanthazi wazamuja nge uteka wakumira,Ndipu ntchitu yaki yazamuja nge kamotu;Vosi pamoza vazamukufya ndi motu,Kwambula munthu wakuvizimwa.”
Mazu Ngam'mphata
^ Kung’anamuwa kuti, “Utaski waku Yehova.”
^ Pamwenga kuti, “watimuziŵa cha mbuyaki.”
^ Mazu ngaki chayingu, “Vakamika cha.”
^ Pamwenga kuti, “yimwi akulamuliya.”
^ Pamwenga kuti, “chisambizu chaku.”
^ Matholi mbana a ng’ombi.
^ Mazu ngaki chayingu, “ngatuŵa nge sinoo.”
^ Vinthu vo vijaliya asani ayengetuwa visulu.
^ Pamwenga kuti, “moŵa wa tirigu.”
^ Vinthu vo vijaliya asani ayengetuwa visulu.
^ Viwoneka kuti vimiti ndi minda vikoliyana ndi kusopa angoza.
