SAMBIRU 24
Kumbi Angelu Mbayani Ndipuso Agwira Ntchitu Wuli?
Yehova wakhumba kuti tiliziŵi umampha banja laki lakuchanya. Mu banja lenili mwe angelu wo adanika so kuti “ŵana . . . aku Chiuta.” (Yobu 38:7) Kumbi Bayibolu likambanji vakukwaskana ndi angelu? Nanga vakuchita vawu vitiŵakwaska wuli ŵanthu? Kumbi angelu wosi ŵe mu banja laku Chiuta?
1. Kumbi angelu mbayani?
Yehova wangulenga angelu wechendapangi charu chapasi. Mwakuyanana ndi iyu, angelu tingaŵawona cha ndipu aja kuchanya. (Aheberi 1:14) Yiwu alipu mamiliyoni nganandi, ndipu mungelu weyosi we ndi mijalidu yakupambana ndi munyaki. (Chivumbuzi 5:11) Angelu ‘achita vo Yehova wakamba kweniso avwiya mazu ngaki.’ (Salimo 103:20) Mu nyengu yakali, Yehova watumanga angelu kuti akapereki uthenga kweniso kuti akawovyi ndi kutaska ŵanthu ŵaki. Mazuŵa nganu, angelu alongozga Akhristu kuti asaniyi ŵanthu wo akhumba kusambira vakukwaskana ndi Chiuta.
2. Kumbi Satana ndi viŵanda vaki mbayani?
Angelu anyaki angulutirizga cha kuja akugomezgeka kwaku Yehova. Mungelu wakwamba yo wangugarukiya Chiuta wadanika kuti “Dyaboli kweniso Satana, mweniyo walandizga charu chosi chapasi.” (Chivumbuzi 12:9) Satana wakhumbanga kuti waje wakulamuliya ndipu wangunyenga ŵanthu akwamba ndipuso angelu anyaki kuti nawu agarukiyi Chiuta. Angelu akugaruka ŵenaŵa adanika kuti viŵanda. Yehova wanguŵadikisa kuchanya ndipu pambula kuswera yapa abayikengi.—Ŵerengani Chivumbuzi 12:9, 12.
3. Kumbi Satana ndi viŵanda vaki atitilandizga wuli?
Satana ndi viŵanda vaki alandizga ŵanthu anandi chifukwa atiŵakopa kuti achitengi vamizimu, pamwenga kuti alongorongi ndi mizimu. Lenili ndi jalidu liheni ukongwa. Mwakuyeruzgiyapu, ŵanthu anyaki afumba akusanda nyenyezi, ŵanthu wo aloske vinthu vo vichitikengi kunthazi ndipuso ang’anga. Anyaki asani atama, achita vamizimu kuti panyaki angachira. Anyaki anyengeka ndipu atamba kugomezga kuti angakambiskana ndi ŵanthu akufwa. Kweni Yehova watititcheŵeska kuti: “Mungalutanga cha ku ŵanthu wo alongoro ndi mizimu pamwenga ku ŵanthu wo aloska vinthu vo vichitikengi kunthazi.” (Levitiko 19:31) Iyu watititcheŵeska kuti wativikiliyi kwaku Satana ndi viŵanda vaki. Yiwu mbarwani aku Chiuta ndipu akhumba kuti atipweteki.
SAMBIRANI VINANDI
Wonani vinthu vamampha vo angelu achita, uheni wakuchita vamizimu ndipuso mo tingajivikiliya kwaku Satana ndi viŵanda vaki.
4. Angelu atovya ŵanthu kuti asambiri vakukwaskana ndi Yehova
Angelu aku Chiuta apharazgiya ŵanthu cha. Mumalu mwaki, alongozga ŵanthu aku Chiuta kuti asaniyi ŵanthu wo akhumba kusambira vaku iyu. Ŵerengani Chivumbuzi 14:6, 7, pavuli paki kambiskanani mafumbu yanga:
-
Ntchifukwa wuli tikhumbika kuti angelu atiwovyengi pa ntchitu yakupharazga?
-
Kumbi kuziŵa kuti angelu angakulongozgani kuti mupharazgiyi ŵanthu wo akhumba kuvwa uthenga wa mu Bayibolu kutikuchiskani wuli?
5. Kanani vamizimu
Satana ndi viŵanda vaki mbarwani aku Yehova. Mwaviyo, isi nasi mbarwani ŵidu. Ŵerengani Luka 9:38-42, pavuli paki kambiskanani fumbu ili:
-
Kumbi viŵanda vitiŵawofyeza wuli ŵanthu?
Tikhumbika cha kuzomereza viŵanda kuti vitilongozgengi pa umoyu widu. Ŵerengani Dotoronome 18:10-12, pavuli paki kambiskanani mafumbu yanga:
-
Kumbi ndi vinthu nivi vo viŵanda vikhumba kuti tichitengi? Nanga ndi vinthu wuli vakukwaskana ndi nkhani yeniyi vo vichitika ukongwa muchigaŵa chinu?
-
Kumbi muwona kuti Yehova wachita umampha kutikaniza kuchita vamizimu? Ntchifukwa wuli muwona viyo?
Woneriyani VIDIYO, pavuli paki kambiskanani mafumbu yanga:
-
Kumbi muwona kuti njirizi zo mwana waku Palesa wanguvwala zenga zamampha? Ntchifukwa wuli muwona viyo?
-
Kumbi Palesa wakhumbikanga kuchitanji kuti wajivikiliyi ku viŵanda?
Akhristu auneneska nyengu zosi akana kulongozgeka ndi viŵanda. Ŵerengani Machitidu 19:19 ndipuso 1 Akorinto 10: 21, pavuli paki kambiskanani fumbu ili:
-
Ntchifukwa wuli tikhumbika kuwotcha chechosi chakukwaskana ndi mizimu?
6. Thereskani Satana ndi viŵanda vaki
Viŵanda vilongozgeka ndi Satana. Kweni angelu aku Chiuta alongozgeka ndi mungelu mura yo wadanika kuti Mikayeli. Lenili ndi zina linyaki laku Yesu. Kumbi Mikayeli we ndi nthazi wuli? Ŵerengani Chivumbuzi 12:7-9, pavuli paki kambiskanani mafumbu yanga:
-
Kumbi ndiyani wanthazi ukongwa, Mikayeli ndi angelu ŵaki pamwenga Satana ndi angelu ŵaki?
-
Kumbi muwona kuti pe chifukwa chechosi chakuti wosi wo alondo Yesu awope Satana ndi viŵanda vaki?
Mungathereska Satana ndi viŵanda vaki. Ŵerengani Yakobe 4:7, pavuli paki kambiskanani fumbu ili:
-
Kumbi mungachita wuli kuti mujivikiliyi kwaku Satana ndi viŵanda vaki?
ŴANTHU ANYAKI AKAMBA KUTI: “Nkhunanga cha kuchita masaza pamwenga kuwonere mavidiyo ngakukwaskana ndi vamizimu. Munthu wativichita kuti wakondweku waka.”
-
Ntchifukwa wuli tingakamba kuti maŵanaŵanu ngenanga ngaheni ukongwa?
KUMBI MWASAMBIRANJI?
Angelu akugomezgeka atitiwovya. Kweni Satana ndi viŵanda vaki mbarwani aku Yehova ndipu agwiriskiya ntchitu vinthu vamizimu kuti alandizgi ŵanthu.
Kuweriyamu
-
Kumbi angelu aku Yehova atiŵawovya wuli ŵanthu kuti asambiri vakukwaskana ndi iyu?
-
Kumbi Satana ndi viŵanda vaki mbayani?
-
Ntchifukwa wuli mukhumbika kuwotcha chechosi chakukwaskana ndi mizimu?
FUFUZANI
Wonani ukaboni wo ulongo kuti Yesu ndi Mikayeli, mura wa angelu.
“Kumbi Mikayeli, Mura wa Angelu Ndiyani?” (Nkhani ya pa webusayiti)
Wonani ukaboni wo ulongo kuti Dyaboli ndi maŵanaŵanu waka ngaheni cha ngo ngaja mumitima yidu, kweni ndi munthu chayiyu.
Wonani mo munthukazi munyaki wanguleke kulongozgeka ndi viŵanda.
“Wanguziŵa Chifukwa cho Yehova Wakutilenge” (Chigongwi cha Alinda, July 1, 1993)
Wonani mo Satana wagwiriskiya ntchitu vinthu vamizimu kuti wapusisengi ŵanthu.
“Uneneska Wakukwaskana ndi Masenga Kweniso Ufwiti” (Nthowa Yakuluta ku Umoyu Wamuyaya, chigaŵa 5)
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
