Machitidu nga Akutumika 19:1-41
19 Pa nyengu yo Apolo+ wenga ku Korinto, Paulo wangupitiya muvigaŵa vamunena ndipu wanguchifika ku Efeso.+ Kwenuku wangusaniyaku akusambira anyaki.
2 Ndipu wanguŵafumba kuti: “Kumbi mungulonde mzimu wakupaturika mwati mwaja akusambira?”+ Yiwu angumuka kuti: “Awa, techendavwepu kuti kwe mzimu wakupaturika.”
3 Paulo wanguŵafumba kuti: “Sonu mukubatizika ubatizu nuwu?” Yiwu angumuka kuti: “Ubatizu waku Yohane.”+
4 Iyu wangukamba kuti: “Yohane wabatizanga ubatizu wo wenga chisimikizu cha kulapa+ ndipu wakambiyanga ŵanthu kuti agomezgengi mwaku Yesu yo wanguza pavuli paku iyu.”+
5 Ŵati avwa venivi, angubatizika mu zina la Ambuya Yesu.
6 Paulo wati waŵika manja ngaki paku yiwu, mzimu wakupaturika unguza paku yiwu+ ndipu angwamba kulongoro vineneru vachilendu kweniso kulongoro nge achimi.+
7 Wosi pamoza ŵengapu anthulumi pafufupi 12.
8 Kwa myezi yitatu, waserenga musinagogi+ ndi kulongoro mwachiganga. Iyu wakambanga nkhani ndi kukambiskana nawu fundu zakukopa zakukwaskana ndi Ufumu waku Chiuta.+
9 Kweni anyaki akanisisanga kugomezga* ndipu akambanga vinthu vakunyoza vakukwaskana ndi Nthowa Yeniyi+ pa masu pa ŵanthu.+ Mwaviyo wanguŵaleka kweniso wangupatuwaku akusambira ndipu zuŵa lelosi wakambanga nkhani muholu ya sukulu ya Turano.
10 Venivi vinguchitika kwa vyaka viŵi, mwakuti wosi wo ajanga muchigaŵa cha Asia, Ayuda ndi Agiriki viyo, anguvwa mazu nga Ambuya.
11 Chiuta wangulutirizga kugwiriskiya ntchitu Paulo kuchita vakuziziswa vanthazi.+
12 Ndipu chinanga ndi mathawulu pamwenga maepuloni ngo ngakwaskanga liŵavu laki, alutanga nangu ku ŵanthu wo atamanga+ ndipu achiranga kweniso mizimu yiheni yatuwanga.+
13 Kweni Ayuda anyaki wo ayendanga muvigaŵa vakupambanapambana kuti atuzgi viŵanda, nawu angwesa kugwiriskiya ntchitu zina la Ambuya Yesu kuti atuzgi mizimu yiheni mu ŵanthu. Yiwu akambanga kuti: “Nditikulamula mu zina laku Yesu yo Paulo watimupharazga.”+
14 Sonu penga ŵana anthulumi 7 a mura wa asembi wachiyuda yo wadanikanga kuti Sikeva, wo achitanga venivi.
15 Kweni mzimu uheni unguŵamuka kuti: “Yesu nditimuziŵa,+ ndipu Paulo nayu nditimuŵanika umampha,+ nanga yimwi ndimwi ayani?”
16 Pavuli paki, munthu yo wenga ndi mzimu uheni wanguŵandwikiya ndipu wangulimbana nawu yumozayumoza. Iyu wanguŵathereska mwakuti anguthaŵa ŵe nkhuli kutuwa munyumba kweniso angupwetekeka.
17 Venivi vinguziŵika ku ŵanthu wosi, kwa Ayuda ndi Agiriki viyo wo ajanga ku Efeso, ndipu ŵanthu wosi angutenthema kweniso zina la Ambuya Yesu lingulutirizga kukuzgika.
18 Ndipu anandi mwa ŵanthu wo anguja akusambira azanga kuzisumuwa ndi kukamba pakweru vo achitanga.
19 Ndipuso ŵanthu anandi wo achitanga vamasenga anguza ndi mabuku ngawu ndipu angungawotcha pa masu pa ŵanthu wosi.+ Ŵati aŵerengese mtengu waki, angusaniya kuti wakwananga ndalama zasiliva 50,000.
20 Mwaviyo, mazu ngaku Yehova* ngangulutirizga kuwanda ndi kuja nganthazi.+
21 Venivi vati vachitika, Paulo wangusimikiza mumtima mwaki kuti asani wajumpha mu Makedoniya+ ndi mu Akaya, walutengi ku Yerusalemu.+ Iyu wangukamba kuti: “Asani ndachifika kweniko, nditenere so kuluta ku Roma.”+
22 Sonu iyu wangutuma ŵanthu ŵaŵi mwa ŵanthu wo amuteŵetiyanga, Timote+ ndi Erasito+ kuti aluti ku Makedoniya, kweni iyu wangujaliya muchigaŵa cha Asia kwa kanyengu.
23 Pa nyengu yeniyo, pangubuka chimtimbaheka+ chakukwaskana ndi Nthowa Yeniyi.+
24 Pakuti munthu munyaki yo wadanikanga kuti Demetiriyasi, yo wapanganga vinthu vasiliva ndipuso yo wapanganga nyumba zasiliva zakusopiyamu Atemi, wawovyanga ŵanthu alusu la vakupangapanga kuti asaniyengi phindu linandi.+
25 Iyu wanguwunganisa ŵanthu ŵenaŵa kweniso ŵanthu anyaki wo agwiranga ntchitu zenizi ndipu wanguŵakambiya kuti: “Mwaŵanthu, muziŵa umampha kuti bizinesi iyi ndiyu yititikhupusa.
26 Sonu mwawona kweniso mwavwa mo Paulo mwenuyu wakope ŵanthu anandi ndi kuŵasintha maŵanaŵanu, ndipu wakamba kuti achiuta akupangika ndi manja, mbachiuta ŵeneku cha.+ Iyu wachita ivi ku Efeso pe cha,+ kweni pafufupi muchigaŵa chosi cha Asia.
27 Ndipu chinthu chakofya ukongwa ntchakuti ndi bizinesi yidu pe cha yo yiyuyulikengi, kweni nyumba yakusopiyamu yaku Atemi chiuta munthukazi, nayu ŵanthu ayiwonengi kuti nkhanthu cha. Ndipu Atemi yo ŵanthu atimusopa muchigaŵa chosi cha Asia kweniso pacharu chosi chapasi, amutumbikengi cha.”
28 Ŵanthu wo ŵati avwa venivi, angukwiya ukongwa ndipu angudaniriza kuti: “Wanthazi ndi Atemi wa Aefeso!”
29 Sonu tawuni yosi yingutimbanyizgika, ndipu ŵanthu wosi angukhumukiya kubwalu lakuchitiyaku masaza, achikwekweta Gayo ndi Arisitako. Gayo ndi Arisitako+ ŵenga a ku Makedoniya ndipu ayendiyanga limoza ndi Paulo.
30 Paulo wakhumbisiskanga kuti waluti ko kwenga ŵanthu, kweni akusambira angumuzomereza cha.
31 Chinanga mbanyaki mwa ŵaraŵara a maphwandu ndi masaza ŵeniwo amuyanjanga, angumutumiziya uthenga wakumuŵeyere kuti wangalutangaku cha kubwalu lakuchitiyaku masaza kuti umoyu waki uleki kuja pa ngozi.
32 Ŵanthu angutimbanyizgika ndipu anandi aku yiwu aziŵanga cha chifukwa cho awunganiyana pamoza mwakuti anyaki adanirizanga vinyaki, anyaki so vinyaki.
33 Sonu angutuzga Alekizanda mu gulu lo ndipu Ayuda amututuzgiyanga kunthazi. Iyu wangusoska janja laki ndipu wakhumbanga kulongoro kuti wajivikiliyi ku ŵanthu wo.
34 Kweni yiwu ŵati aziŵa kuti wenga Myuda, angwamba kudaniriza wosi pamoza kwa maora pafufupi ngaŵi kuti: “Wanthazi ndi Atemi wa Aefeso!”
35 Sonu mura wa tawuni wati wachetamisa chigulu cha ŵanthu wangukamba kuti: “Mwaŵanthu a ku Efeso, pa ŵanthu wosi, kumbi ndiyani yo waleka kuziŵa kuti tawuni ya Efeso ndiyu yisunga chiuta Atemi ndipuso chikozgu cho chingumbotoka kutuliya kuchanya?
36 Pakuti palivi yo wangasuska venivi, fwasani ndipu mungachitanga vinthu mwabundi cha.
37 Chifukwa mwaza ndi ŵanthu yaŵa ŵeniwo kuti mbakuba munyumba zakusopiyamu cha pamwenga kunyoza chiuta widu munthukazi.
38 Sonu asani Demetiriyasi+ limoza ndi ŵanthu alusu la vakupangapanga wo wenawu ŵe ndi mulandu ndi munthu, patuŵa mazuŵa ngakuyeruzgiya milandu, kweniso nduna* te nazu, kweniko ndiku akamangali.
39 Kweni asani mukhumba vinyaki vakujumpha ivi, mbwenu vikakambiki mu mphara yakuzomerezeka mwadangu.
40 Pakuti kukamba uneneska, vo vachitika msanawale ivi, ndi nkhani yikulu ukongwa mwakuti tingambika mulandu wakuyukiya boma, chifukwa tilivi chifukwa chakuvwika chakukonkhoska cho chachitiska chivulupi ichi.”
41 Ndipu wati wakamba venivi, wangukambiya ŵanthu wo kuti akengi.
Mazu Ngam'mphata
^ Pamwenga kuti, “angulutirizga kunonopesa mitima yawu ndi kukana kugomezga.”
^ Wonani Fundu Zakukumaliya A5.
^ Nduna yachiroma yo yalamuliyanga chigaŵa. Wonani Mazu ngo Ngakonkhoskeka.
